السبت، نوفمبر 21، 2009

نظرة على الأحداث





ما حدث في مباراة كرة القدم بين مصر والجزائر أثارت الكثير والكثير من الآراء والمواقف المتضاربة وبغض النظر عن موقفنا الشخصي الذي لن يعني الكثيرين فسوف نحاول فيما يلي استعراض الأصوات التي تتردد في الإعلام والأوساط الشعبية حول ما جرى وحقيقة ما جرى وما يحب أن يكون مع ملاحظة أننا لن ندلي بدلونا في هذا الموضوع لأن دلونا قد امتلاء ورفض الكثير من الجيران إعارتنا دلوهم حيث أننا نماطل في إعادة الدلاء

 وجهة النظر الأولى وجهة نظر الجمهور المتحمس وغالبية الأفراد

ويقود هذه الفكرة الإعلام الرياضي على الفضائيات وتجد رواجاً في الأوساط الشعبية خاصة بعد المشاهد التي تم عرضها على الفضائيات والأحداث المؤسفة التي يرويها شهود عيان بالتعديات على المشجعين المصرين بالأسلحة البيضاء وحرق العلم المصري وتوجيه اتهامات بالعمالة والخيانة للنظام الحاكم في مصر واتهام المجموعة المشجعة بأنهم حفنة راقصات إلى آخره من المشاهد المؤسفة التي تذيعها وسائل الإعلام عندنا وتقول وجهة النظر هذه بأننا يجب أن نرد اعتبارنا وكرامتنا المهدرة في أم درمان وذلك بعدة وجهات نظر ... منها طرد السفير الجزائري بمصر ... وطرد الجالية الجزائرية بمصر ... وقطع العلاقات الدبلوماسية بين البلدين ... وسحب الاستثمارات المصرية هناك ووقف التبادل التجاري بين البلدين ...واستدعاء الرعايا المصرين بالجزائر وتنادي هذه الوجهة بالإلتفاف حول النظام الحاكم والقيادات السياسية التي ظهرت بوضوح في الأحداث وأعطت ضوءاً أخضر للحديث والكلام في هذا الإتجاه .... وهؤلاء ينتظرون قرارات يتم بها رد الإعتبار والكرامة للمصرين المعتدى عليهم وكافة المصريين عموماً ... كما يتزعمون حملة اعلامية كبيرة للترويج للقضية

وجهة النظر الثانية وهي وجهة نظر البعض الآخر غير المتحمس للرياضة

ترى هذه الفئة أن المسئول الأساسي عن ضياع الكرامة المصرية في كل مكان هم القادة والمسئولين حيث لايتحرك هؤلاء إلا بعد وقوع الكوارث وتكون دائماً محصلة تحركاتهم تزيد عن العدم بقليل ... وأن الكرامة المصرية إنما أهدرت في الداخل قبل الخارج وبعدها استبيحت بيضة المصرين في كل مكان ولم يكن ما جرى في أم درمان سوى نتيجة طبيعية لسوء الإدارة والتخطيط والمتابعة والتمثيل الخارجي للقنصليات والسفارات كان على أعلى درجات الانحطاط .. وهذه الضجة إنما مصدرها يعزو لأن الجمهور المعتدى عليه هو جمهور النخبة المنتقاة لكرة القدم المُسيّسة في الوقت الحالي لكسب تأييد شعبي للنظام من خلال الحب والتشجيع الجارف للجموع المصرية التي لاتجد متنفس للتعبير عن الغضب والفرح والجنون إلا من خلال كرة القدم .. بالإضافة إلى أن مرارة الهزيمة قد دفعت هؤلاء المنتفعين من مط أحداث ومواد اعلامية خصبة للحديث والجدل وإثارة الجمهور حتى المحطة التالية وهي البطولة الأفريقية التي سينشغل بها العامة والغوغاء عن الحدث الجاري ثم ينجرفون رويداً رويداً مع الدوري العام وكأس العالم وفي هذه الأثناء يخطط البعض لسيناريو مابعد انتهاء فترة الرئاسة الحالية ووضع أكثر من سيناريو لانتقال الحكم حيث باتت السيناريوهات القديمة (محروقة) ولابد من ايجاد سيناريوهات جديدة ومفاجاءات سارة للشعب الحبوب المحتقن ضد طواحين الهواء المتمثلة في الجزائرين الذين يمكن تحويلهم بسهولة للعرب المستبدين المستبيحين لكرامة المصريين البسطاء فتتعالى الأوات أن كفى ماتفعلونه بالمصريين الذين لهم الفضل كل الفضل على كل عربي ومن هنا تلتف الشعوب حول القيادة الحكيمة في مبايعة جديدة لكل ماتره بعد التوحد حول عدو مشترك واحد .... ليس اسرائيل بالطبع التي تتربص وتضحك وتهزأ بنا ... وليست أمريكا بالطبع التي تزداد احتقاراً لنا وتزداد شراهتها ونهمها لاشباع مصالحها في المنطقة بنسبة 100% بدلاً من 80% فقط ولكنها طواحين الهواء التي تتربص دائماً بالكرامة المصرية 

وطبعاً نحن نشاهد ونستمع لوجهات النظر ولانحرك ساكناً (وأنا بالطبع من هؤلاء) لأن الخرق قد اتسع على الراتق فلم يعد بالثوب مكان (للترقيع) حيث أصبحت الحلول غير ممكنة في هذه المرحلة وفعلاً لايوجد حل إنما هو التعامل مع آثار الكوارث المترتبة على الفساد والانهيار الذي ضرب كل المجالات فلم تعد تجدي الحلول ولم يعد هناك سوى محاولات التخفيف من وطأة الكارثة والتعامل معها بنظام الأمر الواقع حتى تمر وهو ما تفعله الإدارة الحكيمة بالضبط حيث أدركت عدم جدوى محاولة الحل لأن أول من ينتبه للكارثة وحجمها وأبعادها عادة هو المتسبب فيها لذلك تجده فعلاً يتعامل معها بخبرة شديدة

كان هناك شخص مصري ذهب للجزائر فوجد كل الجزائرين ينادون بعضهم ..بومدين ..بوتفليقة ... بوعلام ... بوعباس...فما كان منه في محاولة جميلة للانخراط في مجتمعه الجديد إلا ان أطلق على نفسه ... بو كيمون

أرأيتم أيها السادة كيف أن المصرين ودودين ومهذبين 
يا لعبة الأيام :)
في انتظار رد الفعل المزلزل للقيادة الحكيمة

ملحوظة : هناك وجهة نظر أخرى ولكن لايجوز نشرها على الانترنت حرصاً على الاخلاق الحميدة :) أ.هــ  

هناك 34 تعليقًا:

صبرني يارب يقول...

انا بقيت باكره كل وسائل الاعلام والاعلاميين والصحافه

واينعم الحكايه حصل فيها تمثليات كتير كتير كتير كتير

واستهبال للشعب كتير كتير كتير

الا انا برضه انا شايفه اننا مش المفروض نقف ساكتين

مش عشان الماتش

لا عشان العرب ولاد التيت دول محتاجين حد يلمهم بجد عننا

عشان هما زي القطط بره ومش بيتشطروا غير علينا

لكن كلي يقين ان الحكومه بتاعنا مش هاتعمل حاجه

ولو عملت يا حليله هاتبقى عشان تكسب بنط على حس الجزائر وما حديث منها

هى بقت منظومه مقرفه وبسسسسسسسسسسسسسسسس

Ahmed يقول...

الوضوع كبر ومسخ واوحش اوي
لو عملت زياره واحده بس للجرايد الاسرائيليه هتلاقي شماته غير عاديه
هتلاقي يدعوت احرنوت بتقول ياريت ديه كانت مباراه بين فتح وحماس

الموضوع اعلام بيستعبط وسياسه -اسف في اللفظ- قذره وناس فاضيه
وديه كلها مقادير الوصفه السحريه للكارثه

المهم عشان ضغطي عالي
هنفضل نسرق دلو الجيران كده كتير

Unknown يقول...

هو انا اميل للرأى الثانى
و بعدين خلاص معدش فيه اخلاق يا استاذ تامر و لا ايه
انشر رأيك الثالث و لا يهمك

بس هو اختصار أ.هـــ ده ايه
؟!
ممكن اتطوع و اقول ان اختصار لجملة
أنا ههبدك لوكامية فى وشك لو شوفتك قدامى يا اخ يا جزائرى
ههههههه
و ده مش رأيى طبعاً

إيمان يقول...

سيذكر التاريخ بعد كام شهر

ان العرب كانوا بيضربوا بعض علشان ماتش

كوره .

وهيقعدوا يضحكوا علينا وعلى تخلفنا

وجهلنا وهنبقى مضرب الامثال زى حرب داحس والغبراء تمام
ويقعد كده حفيد حفيد حضرتك وحفيد حفيد حضرتى ويقولوا لبعض يا نهار ملحوس الناس دى مكانتش لاقيه تاكل وسنينها سوده واسرائيل مبهدلاهم ومهزأه اللى خلفوهم وهم بضربوا بعض على ماتش كوره ههههههههههههههه
هههههههههههههههههههههههههههه
هههههههههههههههههههه
انا اكتر حاجه عجبانى فى الاحداث بصراحه ان المصريين زعلانين من الجزائريين بجد .. فى الأول كنت فكراهم بيهزروا
وبعدين لقيتهم مصدقين
يلا..... نبعت لحضرتك دلو

mahasen saber يقول...

اغلب وجهات نظرنا العربيه بتقول اننا للاسف امه نظرها ضعيف

قول يا رب نفوق لنفسنا بئا كفايه تقطيع فى بعض لحد كدا

بحر الإبداع يقول...

السلام عليكمـ

أخي الحبيب

تعرف والله العظيم اللي صار عيب في حق كل مسلم قبل ما يكون عيب في حق المصريين والجزائريين.!

يا رجل عيب ..
كل الأمة ، يمكن قول كل العالم عرف بمباراة مصر والجزائر ، واللي ببشوف هالحرب الإعلامية يقول خلص حررنا القدس وطعمينا فقراء المسلمين كلهم.؟!

روح شوف مدى الكره ولبغض اللي صار بين كل واحد جزائري وكل واحد مصري ، أنا اليوم بأتصفح احد المنتديات تفاجأت بتوقيع أحد الأعضاء بيقول عن الجزائر وهي معروف عنها بلد المليون شهيد بيقول " هذه بلد المليون كلب"
ألهذه الدرجة أصبح الشهيد في عيوننا كلب.!

والله عييييب ..

بس للأسف ..
مع احترامي لكل المصريين ومع حبي الهم ، المصري أداة رخيصة في يد الحكومة والإعلام المصري ، وفي النهاية المصري مضروب بجزمة وما بيعرف يقول غير " بدي لقمة العيش"

دمت بكل الود

د. ياسر عمر عبد الفتاح يقول...

بس أنا كنت مستني وجهة نظرك إنت يا أستاااااااذ

كل اللي أقدر اقوله
إني بحمل الإعلام في البلدين المسؤلية
وحطلي أربع خطوط تحت البلدين دي

ونفسي بجد الموضوع ده ينتهي على خير

يــوم جــديد يقول...

هي حرب البسوس اللي استمرت 40 سنة بين قبيلتين عربيتين كانت على ايه ؟
مش كانت على ناقة الست هانم البسوس
دا بقى كان المجتمع الجاهلي
أما الآن فالزمن تغير والإنسان في تطور بقت الحرب بتقوم على الكورة
ولا الناقة سبب ولا الكورة سبب
في أسباب أخرى مختلفة تماما عرفنا أسباب حرب البسوس لأنه لم يكن هناك سياسة
ولن نعرف الأسباب الحقيقية وراء حرب أم درمان لأن المصالح كثيرة والسياسات أكثر

إبن مصر يقول...

السلام عليكم

الأول ازيك يا تامر

مش عارف وجهة نظرك مش ظهرت ولكن وجهة نظرى انها لعبه وقعتنا فى بعض ولكن مش معناها اننا نقف ساكتين فى ظل اللى بيحصل وحصل وهيحصل من الجانب الأخر

مش كده ولا انا غلطان :)
محدش فاهم حاجه خااااااااالث
ههههههه
تحياتى تامر واحيك على قرائتك للأحداث
وان صدقت ربنا يستر :)

إسلام السطوحي يقول...

الإعلام المصري أثبت أنه إعلام متميز لم يأخذ موقعه بعد (في صفيحة الزبالة)
http://www.khwtr.blogspot.com/

حفيدة عرابى يقول...

انا حسيت انى مش هقدر اتابع الحرب
الحمد لله
كنت بسمع عن الفيديوهات والاحداث
وامنع نفسى انى اتعرف عليها بتفاصيلها
اكتر حاجة تضايق نغمة المعايرة اللى سادت بين اعلام البلدين

ربنا يصلح احوالنا
كل سنة وحضرتك والاسرة والمسلمين بخير
السنة الجاية ان شاء الله ربنا يكتب لنا جميعا الحج

هــو..مش ..نـو يقول...

إدلي بدلوك...وأبعت لك دلوي
كل دلو مسئول عن دولته ..
وكل دوله تبعت دلوها ..
يدلو بدلوه في دوله دولتهم .
تقدر دولتنا تدلي بدلوها
في دوله دولتهم زي ما دولتهم
أدلت بدلوها في دوله دولتنا .
سلام ...بقي
خلي الجرادل تشتغل...

تامر علي يقول...

صبرني يارب

قبل ما نلمهم عننا لازم نلم نفسنا عن بعض الاول .... هل يجوز انسان بلا كرامة في بلده تطلع له كرامه في بلد آخر ؟؟؟ دي حتى تبقى كرامه شطاني :)

تامر علي يقول...

أحمـــــــــــــد أبو العلا

هنعمل ايه يابوحميد والله كل المواضيع ماسخة وسخيفة والأمور خارج حدود العقل لدرجة انك بتحس احياناً انك في دولة التنمية الفكرية ..لكن هنعمل ايه ؟؟ لازم نحاول ندلي بدلونا ... شكلنا هانشتري دلو الجيران وخلاص :)

تامر علي يقول...

بدراوى

أ.هـ يعني انتهى :)

ورأيي هاكتبه وخلاص لان زي زعلول ما قال مفيش فايدة:)

تامر علي يقول...

إيمان

لن يذكر التاريخ أي من هذه الترهات لأن مكانها سيكون مزبلة التاريخ :)

لكن التاريخ سيذكر بكل خير الدلو:)

تامر علي يقول...

mahasen saber

فعلاً يا استاذة محاسن والله احنا نظرنا ضعيف لدرجة اننا مش شايفين بعض وبنلطش :)

أهم حاجه كل واحد ياخد باله من قفاه علشان متحصلش اصابات ملاعب :)

تامر علي يقول...

بحر الإبداع

هو ده اللي بنحاول ننبه له
لن تكون للأمة كرامة مالم نصنع لها كرامة بمعيار نحترمه نحن أولاً فيحترمه الجميع
تحياتي :)

تامر علي يقول...

د. ياسر عمر عبد الفتاح

يا عم ياسر مفيش موضوع اصلاً انت بتصدق ولا ايه

دي سبوبة وغلوشة وخلاص ولا في حاجة هتحصل وبكرة تشوف
اللي بيصعدوا النهارده هيهدوا بكرة وخلاص على كده ونشوف مباراة طلائع الجيش وحرس الحدود وخلاص :)

تامر علي يقول...

يــوم جــديد

لن تكون هناك حرب فنحن اضعف من ان نخوض اي حروب حتى ضد نفسنا لكن المقصود زرع الكراهية فقط لمصلحة عدو مشترك
هي دي القضية

تامر علي يقول...

إبن مصر

كيفك انت يا اخي :)
واحشني :)

متخافش مفيش حاجه هتحصل غير زيادة الضغينة والكراهية بين العرب وخلاص

هذا كل ما في الامر

تامر علي يقول...

إسلام

لا ياعم معلومات متأخرة جداً
ده واخدها من زمان وله الريادة فيها كمان

تحياتي لمرورك الأول :)

تامر علي يقول...

لقد خلقنا الله احرارا

ممكن الجزائرين والمصريين يتحرشوا ببعض في الحج؟؟:)

ممكن ايه المانع
السفاهة متوافرة
والتفاهة موجودة بكثرة
والضغينة مزروعة
مش فاضل غير ابليس يضع مكانه على النصب شعار العروبة وستقوم الجموع برجمها :)

تحياتي

تامر علي يقول...

هــو..مش ..نـو

مسألة دلو الدلاء تدلت حتى لم يعد لدلو مكان من كثرة الدلاء .. وكل دولة فعلاً دلدلت دلوها في مستنقع الدلاء حتى اصابها داء الدلاء أو انفلوانزا الدلاديل:)

Ahmed يقول...

العسل الجميل اجمل مدون غايب عننا ليه

كل سنه وانت طيب يااستاذنا كلنا
عيد سعيد
بحبك في الله

Tamer Nabil Moussa يقول...

اللى حصل دة جنون بجد

كل سنة وانت طيب.


عيد سعيد

مع خالص تحياتى

مجرد مدونة يقول...

صدقت جزاك الله خيرا

تقبل الله منا ومنكم صالح الأعمال

Remas يقول...

كل سنة وانت طيب يا استاذ تامر

عيد سعيد عليك يارب وعلى اسرتك الكريمة

Soul.o0o.Whisper يقول...

كل سنة و انت طيب

و عيد سعيد عليك يارب و على العائلة


و أنا عن نفسى أخترت الصمت




دمت بكل الخير

إسراء توكل مسعود يقول...

كل عام وأنتم إلى الله أقرب .. لكم في "بلاوطن" سلام وبشرى وهدية ..جزاكم الله خيرا

micheal يقول...

كل سنة وانت طيب
عيد سعيد
اللي حصل في الماتش ده أن النظامين السياسين أردا إلهاء الشعبين مستخدمين إعلام موجه يقوده حفنة من المرتزقة
تحياتي

غير معرف يقول...

السلام عليكم ورحمة الله وبركاته

تسر رابطة هويتى إسلامية أن تدعوك للمشاركة فى قص شريط إفتتاح أحد أكبر وأهم مشروعاتها وهو مدونة " إحنا شباب النهارده " من خلال تاج هدية من الرابطة .

نتمنى قبول التاج ونشر إجابته بمدونتك مشاركة منك فى افتتاح المدونة

نرجو زيارة المدونة للحصول على أسئلة التاج والإطلاع على كافة التفاصيل حول فكرة المدونة

مع خالص تحيات
أسرة رابطة هويتى إسلامية
فريق عمل إحنا شباب النهارده

بعبعه يقول...

سلام عليكم

موضوع جميل تسلم اديك


اتمنى حضرتك تشرفني بالزياره وتجاوب على استطلاع الراي محتاجه اخد اكبر عدد من الاراء عشان النتيجه تكون معبره عن الواقع

شكرا لك

Unknown يقول...

فينك يا استاذ تامر
اخبارك ايه
يارب تكون بخير