الأحد، ديسمبر 13، 2009

إعادة تقييم


لابد للانسان أن يعيد حساباته كل فترة ويعيد تقييم مواقفه كلها ويقدم كشوف حسابات عن أعماله حتى يعرف أبعادها وانعكاساتها عليه وعلى الآخرين .. وحيث أن تلك المدونة قد مر عليها قرابة العام فأرجو من السادة المدونين الكرام التفضل بالمساعدة في تقييم هذه التجربة من خلال مناقشة المحاور الآتية

هل هذه المدونة تمثل أي إضافة في أي جانب من جوانب الحياة؟؟؟ علل لما تقول مع ذكر أمثلة
ما هي الجوانب السيئة في هذه المدونة التي تتمنى أن تختفي ؟؟
ما الذي ينقص هذه المدونة من وجهة نظرك حتى تؤدي دور ايجابي؟
هل تنصح بتخصص المدونة في جانب حياتي معين كالسياسة فقط أو الدين فقط أو الأدب فقط أم تفضل تنوعها؟وما الفرق بين ما تنصح به والوضع الراهن ؟
متى تنصح صاحب هذه المدونة بالتوقف عن التدوين ؟ ولماذا
ما هو معدل نشر موضوعات جديدة الذي لايصيبك بالملل ولايجعلك تنسى وجود المدونة ؟
ما الذي يجعلك لاتكمل قراءة موضوعاتي وتفقز للرد مباشرة من باب المجاملة فقط ؟
هل التعليق يمثل لك عبء أحياناً وتتمنى عدم الرد
اذكر فائدة واحدة حصلت عليها من هذه المدونة ...بدون التفكير طويلاً أو مراجعة أسماء البوستات القديمة:)

شكراً لكل من واسانا بالبرق أو الرعد وعبرنا بالتعليق واقتطع من وقته للتجاوب

- أرجو أن تكون الاجابات بعيدة كل البعد عن المجاملات أو التكلف حتى تكون فائدتها حقيقية ومسيرك هاتتزنق برضه:)

هناك 34 تعليقًا:

أحمـــــــــــــد أبو العلا يقول...

تقييم تقييم وماله, ده شئ جميل وياريت يساعد

هل هذه المدونة تمثل أي إضافة في أي جانب من جوانب الحياة؟؟؟ علل لما تقول مع ذكر أمثلة
لأ مش هقولك انها اضافه لجوانب الحياه (عشان ده موضوع كبير اوي يعني), بس هقولك انها بوابه رقيقه وجميله, عامله زي الاستراحه او زي البستان الصغير أحيانا بشوف فيها مرايه لحاجات كتيره في حياتنا زي البوست اللي كتبته بشكل كبسولات عن موضوعات مختلفه وبشكل زائر ومن كل ورده بستان

الجوانب السيئه؟ الاختفاء, حقيقي بقلق لما المدونه وموضوعاتها الجديده يختفوا لفتره طويله

ما الذي ينقص هذه المدونة من وجهة نظرك حتى تؤدي دور ايجابي؟
الدور الايجابي انا حاسس انه موجود ومعنديش اقتراح محدد في المجال ده

هل تنصح بتخصص المدونة في جانب حياتي معين؟
لأ انا بحب التنوع بس طبعا القرار بيرجع لصاحب المدونه بالشكل اللي يريحه اكتر من أي حد تاني. دلوقتي فيه تنوع بس الغياب الطويل كتير اوي

متى تنصح صاحب هذه المدونة بالتوقف عن التدوين ؟ ولماذا
لما يكتأب
ربنا يبعده عنك
لأن الكتابه في الوقت ده بتكون انعكاس للاكتئاب ومش بتساعدك على تخطيه بالعكس بتزوده

ما هو معدل نشر موضوعات جديدة الذي لايصيبك بالملل ولايجعلك تنسى وجود المدونة ؟
لأ احنا مش ماشيين بالساعه, لما تحتاج تكتب اكتب بس هيا الفكره لما بتغيب عننا كتير بنقلق


ما الذي يجعلك لاتكمل قراءة موضوعاتي وتفقز للرد مباشرة من باب المجاملة فقط ؟
هل التعليق يمثل لك عبء أحياناً وتتمنى عدم الرد
مقدرش اعلق عندك من غير ماأقرأ ولما بقرأ موضوع بعيد عن اهتمامي (يعني مثلا انا مليش في القصص او التعليق الأدبي) بفضل السكوت والقراءه فقط عشان ميبقاش كلامي فاضي في غير موضوعه


اذكر فائدة واحدة حصلت عليها من هذه المدونة ...بدون التفكير طويلاً أو مراجعة أسماء البوستات القديمة:)
الاستمتاع

تقبل صراحتي وزيارتي

ستيته حسب الله الحمش يقول...

انت لقيتني عايشة جو الإمتحانات قلت تخش في الحسبة؟ :)
حاضر يا بيه وهو احنا نرفض ازاي بس

1- اه تمثل إضافة مهمة ومعتبرة جدا على موقع مستر بلوج سبوت .. وذلك لأن صاحبها يمتلك مقومات رائعة للكتابة مع ثقافة ما شاء الله راقية مع تحليل ديني ودنيوي بديع مع شوية ابتسامات من غيرها العيشة تبقى مرار

2- اهم جانب سيء فيها إختفاء المدون فترات طويلة بدوافع خفية

3- ينقص هذه المدونة انها تتبنى موضوع وتسلسله "يعني تعمله مسلسل 30 حلقة" ساعات بيكون فيه مواضيع على الساحة أزعم "حلوة أزعم دي" انك قادر تكتب فيها ولكن نعمل إيه في "فيرب"أنتخ

4- خسارة كبيرة تخصص المدونة في جانب واحد
ولو ليك نفس ان جانب ما يطغى على بقية الجوانب خصخصله مدونة جديدة خصوصي على جنب :)

5- لن انصح صاحب المدونة بالتوقف عن التدوين فإن توقفه الحالي مؤلم للحياة البلوجية والله

6- بوست كل يوم .. ولو جديا يبقى نفس معدل ما قبل الأنتخة بوست كل اسبوع على الأكثر

7- للحق اقول والشهادة لوجه الله ولا مرة حصلت معايا حداكم

8- لو حصلت مش ها أرد عادي ولو مشغولة ها اقرأ ومش ها ارد برضه عادي وعارفة ان سيادة صاحب المدونة ها يلتمس لأخيه حاجة وسبعين عذر كده

9- عرفت ان هناك اديب ألمعي يكتب ببراعة وتمكن من أدواته وأفكاره خلاني أخجل جدا من كتاباتي وخاصة بالفصحى .. والله ما غشيت يا استاذ :)

ها أتزنق أكتر من كده ايه؟
بقى اجيب لك سؤالين تخبطني تسعة :)

سارة احمد يقول...

ازيك ياتامر...يااارب تكون بخير...حلو الموضوع...احنا ناقصين استرس تيست...يلا اسعنا علي الشقاء بالله...وكمان سين وجيم يااارب احنا ناقصين:)))...اه ياتامر المدونة تمثل اضافة للجانب الاجتماعي والنفسي اكيد ان الناس الي بتكتب ديبتفكر كتير ومشغلة دماغها اكتر واكيد انهم بيحبوا يحللوا الدنيا والاحداث...ونظرا لان مبقاش في قاعدت زي بتاعت زمان ولا تجمعات زي بتاعت زمان ولا صالونات اجتماعية ولا قاعدات ثاقفية...الناس بتنفس بالمتاح امامها...مع الاعتبار ان اعبئنا مش زي اعباء زمان وزماننا بقي اصعب في استمرارية الحياةعن زمان...علي راي ام كلثوم قول للزمان ارجع يازمان:))...السؤال التاني ومن غير ماجملة خالص مافيش عيوب في هذة المدونة...معادا انك شلت الاغنية بتاعت مولناقد نامت عيون...بجد كانت حلوة اوي وكنت بحب ادخل اسمعها مخصوص...وكنت ساعات بكون مضيقة ومجرد اني ادخل المدونة عندك واسمعها واقرا المواضيع الساخرة علي الواقع كنت بغير المود...انما الفترة الي فاتت كانت المواضيع حلوة بس مش اوي يعني دا راي من غير مجاملة...السؤال التالت الاغنية الي قلت لك عليها:)السؤال الرابع...لا ياريت المدونة تتنوع في كل حاجة معادا النقض زي نقض عزازيل كدة معلش دا راي يعني وبراحتك:)))من غير زعل...السؤال الخامس... عمري ما حنصح حد بالتوقف كل الي نفس ينفس ينفس نموت الناس طقنا من الغيظ مثلا:))علي فكرة في ناس المدونة كل حياتها ومعندهاش حياة اجتماعية...وفي ناس زهقنا ومش بتحب طلع زهقها علي المجتمع الي حواليها...فتكتب تستنجي بعالم الزهقنين مع اختلاف نقطة زهقهم واختلاف مهارتهم واسلوبهم في الكتابة...لان في منهم فعلا موهبين زيك كدة...السؤال السادس...احنا مش ناقصين قيود علشان نقيد بعض كل واحد ينشر وقت مايحب...احنا بنساعد بعض وبنحترم بعض واول حاجة لازم نقدرها في بعض احساس بعض...الي النهاردة في ناس كتير مش بتقدرة وتحترمة...السؤال السابع لما يكون الواحد في الي ماكفي ومش عايزك تزعل:)...السؤال التامن ساعات بسبب حالتي النفسية مش اي حاجة تانية لان لو الموضوع حلو حعلق اقول دا حلو ولو زفت حقول بردة مافيش مايدعي للنفاق بعض...الهروب من مشاكل الحياةو نافذة لتبادل الفكر والراي...والاغنية ايها:)))

لقد خلقنا الله احرارا يقول...

بسم الله الرحمن الرحيم
الاجابة

تونس

بدون مجاملة
مدونة حضرتك مميزة وممتعة وراقية

المدونة جميلة جدا بكم الفلسفة والسخرية المريرة الموجوده فيها

مفيش جوانب سيئة أتمنى انها تختفى

ينقص المدونة غياب صاحبها لفترات طويلة
وفكرة دكتورة ستيتة جميلة
عن الموضوعات المتسلسلة

لا انصح بتخصصها
التنوع أفضل
لا انصح صاحبها بالتوقف ابدا
لانى شايفة ان التدوين ده فعل ايجابى جدا
انا السنة اللى قضتيها فى العالم ده
تخلينى مافكرش ابدا
انصح نفسى او غيرى بالتوقف
فى روح حلوة جدا فى مدونات كتير
خسارة الواحد يفقدها
وفى عمل خير
وفى نصائح لله
وفى حب فى الله بين بشر
بيتواصلوا بس عن طريق الكيبورد
فى مناقشات جميلة جدا بتتم
وخبرات كتير بتكتسب
ازاى ننصح حد بالتوقف عن ده
اتمنى ان معدل النشر يكون تلقائى
بس ماتزيدش فترة الغياب عن اسبوع او عشرة ايام مثلا

مفيش حاجة بصراحة بتخلينى مااكملش قراءة الموضوعات

احيانا التعليق بيكون عبء
بس ده لاسباب شخصية
ومش هنا بس
وغالبا بيكون
لان الكلام جميل جدا
وبزهق من نفسى اوى
لما استمر فترة طويلة
فى ابداء اعجابى بالمكتوب وبس
من غير ماتكون عندى القدرة
وأحيانا الصحة وطول البال للمناقشة



الفوائد كتير

بس لو واحدة
هتكون

رواية عزازيل
سمعت عنها كتير ونسيت كتير أقرأها
وبوست حضرتك عنها
شجعنى على قراءتها
والحقيقة مااستمتعش من زمان اوى برواية كده
اسلوبها حلو اوى
والاحداث المرتبطة بالتاريخ فيها جميلة جدا
والاجمل
انى كنت صاحية
لنقد حضرتك ليها
معلش هو مش وقته
بس حضرتك على ما اذكر انتقدت سرعة سقوطه فى الخطيئة رغم انه راهب ورجل دين

الرواية حسستنى انه منطقى جدا سقوطه
لانه كان مهزوز
جواه اسئلة وحيرة
بتعذبه
استمعت اوى بالكلام عن الاختلافات الدينية بين المذاهب المسيحية
لانى درست شبهه فى الكلية

وبعدين دايما اقول لصحابى اقرأوا عزازيل
انا سمعت عنها من مدونة مفيدة جدا


شكرا لحضرتك
الامتحانات حلوة برده
انا كمان عيد ميلاد مدونتى كان من ايام
بس حسابى كان بينى وبين نفسى
كنت عايزة اقدم انا كشف حساب بس الظروف ما سمحتش
فاكتفيت بذكرياتى مع بدايتها
لو حضرتك قدمت البوست ده شوية


كان زمانى غشيت كتير


اسفة على الاطالة

سارة احمد يقول...

استاذ تامر ممكن لو سمحت لو حضرتك لو عندك ايميل تكتبه...علشان انا ساعات كتير ببعد عن عالم التدوين لاسباب خارجة عن ارادتي وبجد بكون نفسي اتواصل مع الناس

مصطفى أبوزيد يقول...


بص ياباشا

مساء الخير الاول

اولا مش لازم المدونه تكون بتمثل إضافه مع ان كلمة اضافه دي كلمه واسعه جدا
مش لازم تكون بتقدم اضافه بقدر ما هي بتعبر عنك و عن مشاعرك وعن ارائك في المواضيع اللي بتكتبها و مشاركتك للناس برأيك و افكارك

ثانيا ان شخصيا بفكر في كل اللي بتكتبه و رايك بناقشه حتى لو مكتبتش تعليق عليه

و انا شايف ان مدونتك مش واخده لون واحد لا هي متنوعه وده شيء كويس

اما بقى متى انصح المدونه بالتوقف عن الكتابه فده بيرجع لحضرتك انت طالما حاسس انك عايز تكتب يبقى لازم تكتب ورأي لناس دايما مختلف بين القبول و الرفض
اكتب انت بس و ملكش دعوه و انت لوحدك هتتوقف عن الكتابه لما تحس فعلا انك مش عايز تكتب


اما امتى مش بكمل موضوعاتك للآخر ده بسبب واحد لو انا مش متحمس للموضوع او مش من اهتماماتي يعني مثال لو واحد مش بيفهم شيء في الكوره و انا عملت بوست عن الكوره و قاعد اتكلم طبعا هو مش هيكمل لانه مش فاهم فيالكوره و لا بيحبها انا كده لو مش بحب الاتجاه مش هقرا الموضوع ومش هرد مجامله لا انا مش هكمل و هطلع

اما الفايده الواحده اللي لقيتها في المدونه هيا التنوع و ارائك المنطقيه و بوستاتك الظريفه

نصيحه اخيره استمر في التدوين و الكتابه طالما انك حاسس انك عايز تكتب

تقبل مروري

Hager Za3bal يقول...

ان ان ااااان
يعني انا هربانه من امتحانات العملي اجي الاقي امتحان هنا :(((((((
لااااااااا
انا احتجججججججج
واعتررررررررررررض


امممم
خلاص خلاص
هجاوب عشان خاطرك..

ايوه طبعا اكيد ضافتلي كتير .. في اي موضوع قريته .. مواضيعك عموما بحبها وبتمسني اوي .. وساعات بلاقي فيها كمية فلسفه ورأي حد بحسه دايما بيبص علي كل حاجه بعمق اوي ..

حبيت بوستات كتير هنا في رمضان كان في بوستات جميله ومكسرات وكبسولات حلوه اوي .. وبوستات قبل رمضان جميله اوي ..

انا كمان بحس انك بتختفي وترجع تاني مش عارفه ليه ..

ممكن معلقش عشان معنديش وقت او ورايا مليون حاجه في اليوم لكن مفيش اي سبب ليه علاقه بالمدونه نفسها ..

امممم
ايه كمان ؟؟

غلق المدونه ؟؟
انا ضد الفكره دي .. امحيها من دماغك خااااالص :))

مقصره معاك بس غصب عنني :$ :$

أم مالك يقول...

العزيز استاذ تامر
يمكن مش حقدر اجاوب على الاسئلة
بشكل تسلسلى ولكن اقدر اقول بالمجمل
وبدون مجاملة بمعنى والله العظيم اقول الحق
انى بستمتع جدا بدخولى فيها
وطبعا فيها افادة واجمل حاجة انها
كثيرا ماتضع الابتسامة على وجهى
طبعا التنوع فى المواضيع من شخص زى حضرتك بيكون فيه اضافة
وطبعا لاانصح صاحبها ابدا بالتوقف عن التدوين هو صحيح بيطول الغيبة لكن برضه
حسه فى المدونة ربنا مايحرمنا منه
بالنسبة لعدم تكملة المواضيع والمسارعة
بالتعليق عمرى ماعملتها ممكن اعمل العكس اقرا بل اكثر من مرة ولا اعلق
المهم انى اقسمت ان ماقلته هو الحق
ربنا يبارك فيك ويكثر من امثالك

ebn roshd 777 يقول...

اولا مش لازم المدونه تكون بتمثل إضافه مع ان كلمة اضافه دي كلمه واسعه جدا
مش لازم تكون بتقدم اضافه بقدر ما هي بتعبر عنك و عن مشاعرك وعن ارائك في المواضيع اللي بتكتبها و مشاركتك للناس برأيك و افكارك

حلو اوي تعليق اخونا مصطفي ابو زيد
انا كان نفسي اقول اني متفق معاه وشكرا
بس قلت مفيش مانع نتعب دماغنا شويه
احتراما لمجهودك الواضح في تلك المدونه اللي انا عن نفسي نادرا ما يفوتني قرائتهاوبتمعن
اذن وبنتهي الاختصار طالما هناك من يقرا لك فمن المؤكد ان بعضهم سيستفيد
وبجد من غير مجامله معظم كتاباتك تخاطب العقل وتتميز بالحياديه وهذا ما اتمناه دائما لنفسي وادعو الله ان يوفقني ان اعمل عقلي في كل شيء
وبغض النظر عن موهبه حضرتك في الكتابه والتحليل الادبي
الا انني افضل ان تكون المدونه لهاطابع شخصي لاني اري ان تبادل الاراء والافكار بين اصحاب العقول المنزوعه الهوي والغرض والتي لا تبغي الا الحق والخير لكل البشر
لهي اسمي رساله واعظم هدف ندعو الله دائما ان يوفقنا في الوصول اليه بنهايه الحياه
هل تتصور ان اخر ما كتبته بمدونتي كان نوع من التسجيل لحقائق علي امل ان ياتي من يبحث عن الحقيقه فيجد نقطه ولو صغيره اعتقد من وجهه نظري انها تمثل الحقيقه
كفايه كده علشان مكنش سبب في قفل المدونه بالاسهاب الطويل ده
روق يا عم تامر وادينا مونسين بعض في بحر الظلمات

صبرني يارب يقول...

ايه كل الاساله دي

طب والنبى مراعاة لظروفي الصحيه والنفسيه

انا هاجاوب كده على اد ما اقدر

شوف انا باحب اوي فى كتاباتك العربيه الفصحى
عشان قليل الى بيعرف يكتب بها كويس

كمان الطريقه الساخره بتاعتك مميزه فعلا لها طابع خاص

اهم حاجه فى اي مدونه باهتم بها الدماغ

طريقة التفكير والافكار عموما

المدونه هنا وصاحبها الدماغ فيها انا باحترمها جدا جدا

بافضل تخليها متنوعه زي ما هى

وعلى الله تقفلها واحنا نيجى نجيبك من بيتكم وانت عارف ان انا ليا سكه مع الحكومه
ههههههههههههه

انت بس ساعات بطنشنا شويه كتير مش عارفه بتختفي فين

وحكاية التعليقات دي

والله الحقيقه انا السبب الوحيد الى يخلينى افتح موضوع ومش اكمله عموما
انى الاقي صاحبه بيقول كلام فارغ ما استحملوش عشان انا شايله المراره

وده الحمد لله مش موجود هنا

وساعات اقرا الموضوع وما اعلقش ده بيكون غصب عني حصل حاجه وقفلت ونسيت ارجع اعلق مثلا

انما سواء متفقه مع البوست او مختلفه لازم اضع بصمتي على كل مكان


وتحياتي ليك ويارب بالتوفيق دايما

زائر يقول...

لماذا تدون ؟
يمكن اشارك لو اجبتني

mimi يقول...

ده امتحان .. بس هجاوب
1- ممكن بقلمك ، أخرج من حالة نفسية سيئة وأدخل في موود تاني أحسن كتير ( مش في دماغي أمثلة حاليا)
2 - مش فيه جوانب سيئة من وجهة نظري ، حتي أبسط الأشياء وهو تصمصم المدونة ، يهدئ أعصابي
3- يمكن ينقص المدونة شوية معلومات عنك شخصية
4- أنا مقتنعة إن المدونة دي تعبر عن صاحبها ، فلا أشترط أن أقرا عن جانب واحد من جوانب اهتمامات صاحبها ، اكتب ان شالله حتي ريان يا فجل ، هقرالك برده

5- لا أنصح بترك التدوين ، ممكن فترة أجازة ، بس ترجع تاني تباشر كتاباتك

6- مرة كل أسبوع ، حلو أقدر أتابعك وأتابع غيرك ، وتقدروا كمان تتابعوني بدون تقصير

7 - لو قريت بوست طويل ممل ، مش هكمله لو مش هيفيدني ، شأنه شأن مقال في جريدة

8 - لا أعتقد ذلك
9- تعرفت علي أصدقاء جدد ، من خلال تواصلهم معك ، زياراتك لي تزيدني تشجعا لمواصلة الكتابة..

برافو عليك ،

تامر علي يقول...

باشمهندز أحمـــــــــــــد باشا أبو العلا

شكراً على موقفك الايجابي دائماً ومردودالك في الافراح ان شاء الله :)
بس ميكونش في فالفرح اغنية قولوا لابوها ان كان جعان يتمشى :)

تامر علي يقول...

د/ ستيته حسب الله الحمش

ايوه طبعاً اشمعنى انا طول عمري اتسأل :) خليني اسأل شوية من نفسي

شكراً للتجاوب الذي أثرى الحياة التدوينة كلها وليس مدونتي فقط ... وفعلاً أنا بفكر أعمل سلسلة من زمان لكن كل ما اروح اجيبها يقولولي مفيش غير جنزير بس :)
جزيتم خيراً وسيتم تفعيل الاقتراحات بعون الله

تامر علي يقول...

سارة احمد

أولاً دي الانشودة علشان لو عاوزه تسمعيها في اي وقت
http://www.4shared.com/file/168923307/e546750f/_online.html

ثانياً ده الميل وهو مسجل على المدونة بالفعل
tame472@gmail.com

ثالثاً شكراً للتفاعل الايجابي والنصائح الغالية
:)

تامر علي يقول...

لقد خلقنا الله احرارا

الاجابة الصحيحة هي
المكرونة :)


شكراً لك لمشاركتك بالرأي الذي هو قطعاً مفيد جداً وان شاء الله يتم تفعيله

تحياتي

تامر علي يقول...

مصطفى أبوزيد

جزيل الشكر والامتنان للمشاركة الفعالة البناءة

والاضافة المقصودة قد تكون بمعلومة لم تكن تعرفها مثلاً (ولو معلومة واحدة) أو موقف معين تم عرضه باسلوب مختلف

الاضافة لها ابعاد كثيرة جداً وانا استفدت كتير من مدوناتكم على المستوى الشخصي

تحياتي وتقديري

تامر علي يقول...

Hager Za3bal

كويس ان هنا امتحانات نظري بس مش عملي :)

انا في غاية التشكرات لسيادتكم على التفضل بالمشاركة وابداء الرأي الذي سيؤخذ في الاعتبار ان شاء الله

تحياتي :)

تامر علي يقول...

أم مالك

بعد هذا الرد لا أجد ما يقال إلا ان اتوجه الى الله بالدعاء أن يجعل كل الناس تراني بعيون "أم مالك" :)

أسعد الله أيامك :)

تامر علي يقول...

ebn roshd 777

ولو ان بن رشد تاعبني ومش عارف اخلص "بداية المجتهد" لكن ماشي علشان خاطرك :)

طبعاً أن متفق مع الرؤية الخاصة بكم لكن من الاسئلة بتتضح أشياء لم تكن على علم بها لاختلاف اذواق الناس حتى المجموعة القليلة التي تقرأ ما تكتب وهو مفيد جداً لمعرفة الاخطاء التي قد تقع بها

أنا مروق والله بس عاوزين نطلع من بحر الظلمات :)

تامر علي يقول...

صبرني يارب

طبعاً في حالة سيادتك فأنا لا أقدر إلا أن اقف في مقام المستمع المغلوب على أمره نظراً للعلاقات الدبلوماسية التي قد تعمل مشاكل في الدوائر الحكومية لذلك فأنا اتوجه لسيادتكم بوافر الشكر على ابداء الرأي وسوف يتم تفعيل النصائح بعون الله بالطرق السلمية :)

تحياتي

تامر علي يقول...

زائر
بدون تقعر في الاجابة لأن التدوين يناسب ميولي الادبية والثقافية ويشجعني على المشاركة التفاعلية في الاحداث

أنا أدون إذاً أنا كركوب:)

تامر علي يقول...

mimi
بداية اشكر لك اهتمامك ومحاولة التواصل وابداء الرأي لنفع الغير

وكمان رأي حضرتك مختلف عن غيرك ويمثل اضافة يجب أخذها في الحسبان

واخيراً تحية عاطرة تمتد لانحاء شبرا والمناطق المجاورة :)

تحياتي :)

Hager Za3bal يقول...

ممكن بوست جديد بقي ولا اعادة التقييم دي هتفضل كتير

محمد الجرايحى يقول...

أخى الفاضل
السلام عليكم ورحمة الله وبركاته
وكل عام وأنت بخير
هذه زيارتى الأولى لمدونتك لذلك لن أستطيع
تقييمها، ولكن أنا أحيي صراحتك مع نفسك ومع قرائك وموضوعيتك وأتمنى لك كل التوفيق
أخوك
محمد

فتافيت يقول...

هل هذه المدونة تمثل أي إضافة في أي جانب من جوانب الحياة؟؟؟ علل لما تقول مع ذكر أمثلة

طبعا اضافة يا عم تامر يا بتاع الجلاش.. ومش موضوع علل.. ولا اذكر السبب.. كفايه انها المدونة اللي كنت بدخلها كل ما ينزل فيها بوست وانا منقطعة.. وده لوحده يأكد انها اضافة ليا انا شخصيا

**********************

ما هي الجوانب السيئة في هذه المدونة التي تتمنى أن تختفي ؟؟

ندورة البوستات.. اي والله ندرة واخاف يجي يوم وتنقرض

*********************

ما الذي ينقص هذه المدونة من وجهة نظرك حتى تؤدي دور ايجابي؟

هو انت اصلا دورك ايجابي.. بس الفكرة ان قليل مستمر.. خيرا من كثير متقطع حضرتك.. يعني ممكن تكون سيمي ايجابي بس عشان مستمر هاتأثر بسهولة وأسرع.. فهمت عاجة؟؟ :)

********************

هل تنصح بتخصص المدونة في جانب حياتي معين كالسياسة فقط أو الدين فقط أو الأدب فقط أم تفضل تنوعها؟وما الفرق بين ما تنصح به والوضع الراهن ؟

لا انصح ابدا بكده.. هاتخسر ناس كتير مش مهتمة بالجانب اللي انت خصصخصت له المدونة.. ممكن تعمله اوضه كده فوزق سطوح المدونة بمنافعة.. وتخصخص فيها براحتك حاجة واحدة.. وانا هابلغ الضرايب العقارية :)

******************

متى تنصح صاحب هذه المدونة بالتوقف عن التدوين ؟ ولماذا

انا لا انصح ابدا.. بجد والله ابدا ابدا
ولماذا.. عشان انا ليا عزومة حمام.. لما اكله ابقى توقف بقى براحتك :))))

***************

ما هو معدل نشر موضوعات جديدة الذي لايصيبك بالملل ولايجعلك تنسى وجود المدونة ؟

بس يا عمنا.. في ناس مهما تقرا لهم.. ماتملش ومهما يبعدوا ماتقدرش تنساهم.. وانت واحد من الناس ديه
بس والله بجد بوست كل 3 او 4 ايام.. بالنسبة لك مش هايعطلك.. وبالنسبة للناس ماينسوش عم تامر
لكن لو علينا احنا معشر ربطة مشجعي تامر علي.. والله لو كل يوم بوستين ما هنزهق ولو كل سنة بوست مستنين على نار ... حلو التثبيت ده :).. بس والله حقيقية.

***********************

ما الذي يجعلك لاتكمل قراءة موضوعاتي وتفقز للرد مباشرة من باب المجاملة فقط ؟

انا لا اجامل.. ابدا وبالذات في الرد

*********************

هل التعليق يمثل لك عبء أحياناً وتتمنى عدم الرد ؟

لا ساعة بتكسف ارد.. بس برد برضو.. من العشم
يعني ساعات بيكون كلامك كبير اوي.. وحاسة ان ردي هيكون جنبه مالوش اي اي قيمة.. بس برضو.. عشان ماقدرش ما اردش

************************

طبعا انا متابعة المدونة على طول
حتى وقت البيات الصيفي شتوي بتاعي اللي فات
بس لو ماكنتش برد.. فلاني كنت فاقدة القدرة على كتابة اي كلمة لها معنى
عشان كده ماردتش على البوستات اللي فاتت

قولي النتيجة هاتظهر امته؟؟
واخبار التنسيق ايه؟؟

فتافيت يقول...

والله خايفة اسقط بسبب الأخطاء الإملائية عاااااااااااااااااااا

بص يا مستر.. انا هاكتب الكلمات صح
وانت دور على الغلط في الكومنت اللي قبل كده واقراه صح
هع هع هع هع.. عيييش بقى

* ندرة
* خصخصت
* فوق
* بمنافعها

حداكم لجنة رقفة :)))))

Beram ElMasry يقول...

العزيز الغالي تامر علي
يسلم أسمك وجسمك من كل مكروه ولن يتشح حالنا بالسواد إذا كانت عينك وأصحابك يقظة واعية ولا تخدعنا الأكاذيب صدقني سيتحقق كل ما نصبوا إليه والسلامة ولا سلام مع بني إسرائيل قتلة الأطفال والأنبياء .

الجواز و سنينه يقول...

بص انا اول مره ادخل عندك
بس لقيت تعليق ليك عند ستيته فى موضوع عشر حاجات بكرها فى من اجب

تعليقك تحفه

ضحكنى جدا و حبيت ادخل اشوف مين ده
لقيت تقيم
طيب اقيم ايه و انا لسه مستجده
بس اكيد اكيد جميله
انا حاسه بكده و ان شاء الله اتابع

تامر علي يقول...

Hager Za3bal

اصل ده تقييم سنوي يا فندم
وعلى كل خلاص انا هاكتفي بالسادة اللي شرفوني بالاجابة ونستكمل المسيرة :)

تحياتي

تامر علي يقول...

محمد الجرايحى

يشرفنا زيارتك ونورتنا على كل الاحوال ونتمنى ان لاتنقطع حبال الود :)

تحياتي

تامر علي يقول...

فتافيت

النتيجة بتاعتك محجوبة علشان مدفعتيش المصاريف :)

والكتابة بالعامية مفيهاش اخطاء املائية لانها دارجة ولها قواعدها الخاصة فخدي راحتك سيادتك :))

شكراً جزيراً على الاهتمام والمشاركة ونعدكم بالتفكير في موضوع الحمام ده لو كان لسه ماطارش :)

تحياتي وسلاماتي

تامر علي يقول...

Beram ElMasry
شرفتنا يا عمنا وفي انتظار ابداعاتك دائماً

تامر علي يقول...

الجواز و سنينه

يا اهلاً وسهلاً على كل الاحوال يا فندم ةنتمنى ان تحوز المدونة على شيء من رضاكم دائماً :)

تحياتي :)