الاثنين، مايو 04، 2009

أصول التباتة ... في فنون الشحاتة








المصري عمل كل حاجة .... وصل لنهاية التاريخ .... بنى الهرم .... حفر قناة السويس .... قتل ولادة .... دفع في فرح 50 مليون .... زرع .... (قلع) .... حصد .... أكل حمير .... سرق .... نصب .... جاهد .... صلى ... صام ... حج واعتمر .... حارب وانتصر.... وقف طوابير أطول من نهر المسيسيبي .... عمل بطاقة تموين حمراء وخضراء ... استحل الميتة والدم ولحم الخنزير ... فنان .... حقير .... وغد .... قذر .... عمل كل حاجة .... واحد صديقي مغترب دائماً قال لي في مثل جزائري بيقول "يا رايح مصر ... في منك ألف " قلتله يعني إيه ؟؟.... قاللي يعني اللي هايروح مصر لا يمكن يكون متميز في أي حاجه .... احنا عملنا كل حاجه .... عملنا كل حاجة في عصرنا الحالي من أجل الحصول على المال .... ولو بالشحاته ..... والشحاتة لها طرق وأساليب .... وفن .... أيييوه لا تتعجب الشحاتة فن ..... كيف تستخرج من جيب الآخرين الأموال بالرغم من أنهم يعرفون أنك (غالباً) نصاب ..... هانستعرض فنون الشحاتة من خلال مواقف بسيطة حصلتلي وبتحصلنا كلنا يومياً .

آخرها كان النهاردة في صلاة العشاء وقبل السلام (مباشرة) سقط مغشياً عليه .... طبعاً كل الناس (هرعت إليه) لانقاذ الموقف فقد يكون مريضاً .... أو حالة غيبوبة سكر أو ضغط عالي ..... أنا قريت الحالة أول ما حصلت مباشرة علشان توقيت الإغماء شككني لأعلى درجة ... لكن قلت أراقب الموقف من بعيد يمكن يكون أنا ظالم الراجل وسيء الظن .... صليت السنة وفوجئت إن في ناس بتفوقه وواحد جايبله عصير جهينة بطعم الفراولة .... اتغظت جداً ... وقلت في عقل بالي ...يا واد اترمي في الأرض انت كمان وأديهم عارفينك برضه مش هاتهون عليهم ... وهايشوفوك بعلبة عصير .... مكدبتش خبر .... وقعت في الأرض (وعملت صوت ارتطام كمان) ... وانتظرت شوية .... محدش خد باله للأسف الشديد ... حاولت مرة تانية (بصوت ارتطام أعلى) .... ولقليت ولد صغير جاي نحيتي ... غمضت عيني وقلت بصوت خافت ... "جوافة" (علشان ميجيبوليش فراوله ..أنا عاوز جوافة) .... لقيت (الكلب) الصغير ده راح مدهوس في بطني وأنا ملقى على الأرض علشان كان رايح يملى ميه للراجل المغمى عليه .... المهم ملقتش أمل في الموضوع ده قمت ونفضت هدومي .... وصليت الوتر ودعيت ربنا (اللي أكرم من الكل ) انه يرزقنا بحاجه حلوة كده ..... (مش عاوزين تهريج بقى ...خلونا نتكلم جد شويه)



طبعاً صدق حدثي .... بيقولوله أنت منين ...قال أنا من الفيوم ... جاي لمين هنا .... أنا بدور على شغل بقالي 4 أيام ومش لاقي ..... المهم أنا سيبتهم وطلعت ومعرفش الليلة دي خلصت على إيه بس (عادة) الناس الطيبين بيدوله حاجة ويمشوه وخلاص .

****

موقف تاني يدل على إن الشحات المصري (خلاّق) ... كلنا شفناه قبل كده ..... شخص قاعد بيبكي في الأرض وجنبه 3-4 بيضات مكسورين .... أو أحياناً .... سائل أبيض مراق على الأرض يدي الناظر انطباع ان ده لبن .... طبعاً الماره في الطريق بيصعب عليهم الوضع ده وكل واحد يديله حاجه .... اللي لاحظته في الحالات دي إن في شخص أو اتنين (مشتركين في المسرحية) .. بيلفتوا أنظار الناس للحدث .... يقولوا (لاحول ولا قوة إلا بالله ) بصوت مسرحي مبالغ فيه ... وممكن حد فيهم يطلع حاجه يديها للشخص (الباكي على اللبن المسكوب) علشان يفتح المزاد.... الغريب جداً تفاعل البعض مع المسرحية دي ..... وكنت أفضل كثير انهم يعملوا العرض ده بصفتهم ممثلين وياخدوا حاجه على التمثيل (زي بره) أحسن من الوضع المقزز ده

****



موقف ثالث وكلنا بنشوفه دائماً في الطريق وهو قصة المسافر (زاده الخيال) اللي عاوز يقطع تذكرة القطر (مش عارف ليه كلهم مصرين على القطر) ... وبيقولك عاوز حق تذكرة المترو (لحد رمسيس) وبعدين حق تذكرة القطر لحد (والاشيا العظمى بلد الكونت دراكيولا) ... ومينفعش واحد والتانية لاء علشان الثواب يبقى كامل ..... واحد منهم قابلني وكنت رايح رمسيس بالصدفة ...قلتله تعالى معايا أقطع لك التذكرة .... قاللي ماشي يالا .... وبعدين لما لاقاني بتكلم بجد ورايح فعلاً .... قاللي انت هاتعطلني معاك ليييه؟؟؟؟ قلتله آسف جداً اني هاقطع عليك (الوردية) اتفضل روح كمل شغل



****



الموقف الأخير (علشان متزهقوش ) الشحاتة المباشرة ... بمعنى (حسنة قليلة تمنع بلاوي كتيرة .... لله يا محسنين ) .... ودي مفيهاش لف ولا دوران .... شحات قاعد في حاله وانت اللي بتروحله زي الباشا ..... ودي أنجح الطرق حتى الآن ... نظراً لتعرضه لشريحة كبيرة جداً من الناس منهم أصناف كتير جداً فأكيد بعضهم بيحن :)



****

ما يستفاد من هذا البوست



1- الشحات له نص الدنيا

2- شحات شحت من شحات طلعت في (إيده) حسنه :))))

3- شحات وعاوز عيش فينو

4- علمناهم الشحاته سبقونا على الأبواب

5- قبل ما تترمي في الأرض يكون في ايدك ورقة مكتوب فيها نوع العصير اللي بتشربه (الراجل مكانش حابب الفراولة ... أيوه أخدت بالي )

6- الشحاته فن مش تقطيع هدوم

7- من فضلك (تحرى) للصدقة فأولى بها (مليون مرة) محتاج حقيقي مش هايطلب منك أبداً .... دور عليه وأنت المستفيد مش هو .

8- لا تساعد شحط لو علقوه في مقطورة هايشدها على مكسب بلا مجهود علشان يصبح عالة عليك دائماً

9- الشحات ده ممكن يكون مدمن أو مجرم لكن بيشتغل شحات (بارت تايم) بيزود دخله يعني ... لو سمحت متساعدهوش

10 - لو خلاص الحسنة زنقتك أوي ومقدرتش تقاوم نفسك إدعى ربنا أن يصلحه بها لو لم يكن يستحقها ... وأن يغنيه بها إن كان يستحقها .

ــــــــــــــــــــــــــــــــــــــــــــــــــــــــــــــــــــــــــــــ

ملحوظة : التدوينة دي أنا مكنتش ناويها خالص أنا كنت بكتب موضوع تاني بس بعد الصلاة حسيت إن الموقف ده (مأثر في جداً علشان الجوافة) لازم أنقلهلكم ونتبادل الآراء حوله .... إيه رأيك في الشحاته ؟؟؟؟؟؟؟؟؟؟ أصل في ناس كتييير بتقول اديله وملكش دعوة وبيستدلوا بكلام في غير محله . قول رأيك لو سمحت :)

العدد القادم : مغامرات منحوس .... في بلاد الهكسوس :)




هناك 54 تعليقًا:

ستيتة يقول...

طيب عاوزة اسألك بعد ما خلصت ضحك ع الجوافة
1- مش الآية بتقول للسائل والمحروم
يعني اللي يسألني وأقدر بعقلي الضعيف انه محتاج ادي له

2- واحد عجوز جدا "كتير والله" حتى لو قلت لي زي أخي ما قال يا بنتي حرام عليكي ده واقف هنا بشكل دائم
قلت له راجل فوق السبعين منتظر يشتغل يعني
طالما شحات ها يفضل لحد القبر شحات

بس ده لا يمنع اني اتمنيت انا كمان جوافة وزعلت قوي من الواد اللي فعفص في بطنك
شبه عفرتو شوية؟ تقريبا

مسدس صغير يقول...

جميلة الشحاتة
المفروض البوست ده يبقى عبارة عن تعريق للشحاتة اولا ثم انواعها ثم طرق الشحاتة ثم اشكال الشحاتين ثم حسنة قليلة تمنع بلاوى كتيرة
ههههههههههه
بوست هايل
انا عن نفسى هجرب موضوع الجوافة عندنا بكرة ان شاء الله لو جاب نتيجة هقولك تجيب نفسك وتيجى عندنا جرى
هههههههههه
سلام

رحلتنا في الحياة يقول...

هههههه كل ده علشان عصير الجوافة يعمل فى حضرتك كده لالالا انا مش يرضينى خالص انا هجيب لحضرتك علبة عصير كاملة

بجد الشحاتة بقيت ازمة وملهاش حل بقيت اسهل حاجة الناس بتعملها

رئيس التحرير يقول...

بسم الله الرحمن الرحيم
السلام عليكم ورحمه الله وبركاته.
الشحات..
سؤال صعب ..
بس كل ما استطيع قوله..
أن عدسه كاميرا حضرتك مراقبه كويس و صورها واضحه قوي .
الذين يستحقون الحسنه هم الذين لا يسألون الناس ... تحسبهم أغنياء من التعفف .
لو قابلك شحط يجر مقطوره ...
أديله...أديله علي قفاه ...

إيمان يقول...

هههههههههههه

انا عن نفسي بوزن الأمور الاول

لو حسيت انها فعلا محتاج وخاصة لو طفل

او طفله وعموما بعمل زيك لو حد عايز دوا او تذكرة سفر او اكل اقوله تعالى نشترى وغالبا بيفلسع
وبعدين ايه الشكل الجديد الراااااااايق ده بجد جميل ومريح للعين جداااا
مبروك فى انتظار العدد القادم
ياريت متعوقش علينا

د/عرفه يقول...

اكيد احنا شعب الابتكارات
انا معاك اوى فى حكاية ان احنا بنخترع فى كل حاجة حتى الشحاتة

عجبنى اوى الموضوع

بس للاسف احيانا بكون عارف ان اللى قدامى شحات وكده ورغم كده احيانا بديله برضه
هههههههههههههه

ebn roshd 777 يقول...

طبعا حضرتك قلت نصيحه فعلا
مهمه جدا جدا وهي اننا يجب ان نجتهد
في البحث عن من يستحق الصدقه
ولكن هذا لا يمنع ان تعطي من يسالك
ولو بقدر قليل جدا وده اذا كان
فيه في جيبك عمله اصلا
وعلي فكره من يتصدق غير مطالب ابدا بالتحري عن من يطلب الصدقه
ولكن اعمال العقل مطلوب

د. ياسر عمر عبد الفتاح يقول...

هههههههههههههههههه
كالعادة موتنا من الضحك
يا باشا مالها الفروالة بس؟
دي حتي الجوافة فيها أملاح كثير وبتتعب الكلي


شوف هقلك علي حاجة
أنا معاك في كل ده
وأكثر كمان

لكن اللي يسألك
يا إما تديله .. يا إما تقله كلمة حلوة

مستنين عمنا المنحوس
وخاصةً إن ليا مع النحس مغامرااات

MǿиY El-Shreef يقول...

الشحاته بقت مكسب دلوقتي وبتدر دخل لا بأس بيه :D

وناس كتير اوي بتتخذها منهاج

بس ربنا يعافينا من المسأله المفروض الشحات يخلي عنده حياء ومايمدش ايده

اذا سألت فاسأل الله

ربنا يصلح الاحوال

عموما عصير الجوافه عليا هههههههههههه

غير معرف يقول...

تدوينة جميلة جدا لكن اولها خلانى سرحت كتير ومش مركزة اوى فى الكلام
كلامك صح فعلا عن المصرى اللى وصل لنهاية التاريخ وعن المثل الجزائرى اللى حرم المصريين من التميز
تصدق احنا بقينا كده فعلا وكمان مش واخدين بالنا
يمكن وصلنا لنهاية التاريخ علشان احنا هنا من زمان وكمان مبنقولش للزمان ارجع لانه لو رجع مش هنلاقى حاجة متغيرة نفس الفقر والاستبداد والضنك اللى بيفرز الاحتيال للوصول للثروة
متقعرة أنا مش كده ؟
نتكلم جد شوية
أنا يافندم قابلت الشحات اللى بيشتمك وبيدعى عليك لو لم ينل مراده مع انى كنت فاكراه فى الافلام بس
اغلب الاوقات بحس بالانتصار على نفسى وعليه لو ما خدش منى حاجة لكن بيصعب على بجد اصحاب السن الكبير
انا بحب عصير التفاح سيادتك

لقد خلقنا الله احرارا
معلش عندى مشاكل غريبة فى الجهاز

Atef Shahin يقول...

رسالة تحمل الكثير بين السطور

لجين أبو الدهب يقول...

للاسف الشحاتة شئ منتشر جدا وبشكل ممل جدا فى مصر ..

واشكال الشحاتة بقيت فنون فعلا ..

اتذكر شحاتة كانت ملازمة للمكيف ( المواصلات ) وكل مرة تطلع بشكل علشان تستجلب العطف ..

مرة تطلع حاطة رقبة .. مرة تطلع مجبسة ايدها .. مرة تطلع شاحتة عيل من اى حتة ..

مرة توزع كتب اسلامية .. مالقتش عليها اقبال ..

ابتديت فى توزيع كتب تانية ممكن تلاقى قبول ..

وكل يوم ما بتملش ..

لدرجة انى بقيت استناها كل يوم اشوف المنظر الجديد لها ..

بس كانت المعلمة دايما تقولنا خلوا معاكم فكة فى شنطتكم وادوا الشحات اى حاجة من باب عدم رد السائل ..

وهو ونيته بقى بينه وبين ربنا ..

فشكووول يقول...

صبا الخير يا تامر
ايه اللى بينك وبين الشحاتين
هى علبة العصير تخليك تنق عليهم كدا
خد عندك الموقف ده
واحد شكله خواجه : انا فيه قاعد فو لوكاندا وبعدي فيه واحد مراتى مريض انا ما فى فلوس عشان انا فيه فلوس عشان واحد دكتور لو فيه 5 جنيهات فيه متشكرين ... بعدين انا رديت وقلت له ايه بعد ما كنت انا اللى مكسوف وكانى عامل عمله قلت له:
لأ مش فيه 5 جنيه ممكن فيه واحد جنيه. قام هو بص لى بقرف وبعدين برضه خد الجنيه وما عتقوش
على فكره السحات اللى شحت من الشحاته وطلع فى ايده حسنه عارف كان اصله ايه
اصله ابن :
فقير اتجوز فقيره خلفوا شحات صغير
تحياتى تامر

مجرد مدونة يقول...

حلوة حركة الجوافة دى ههههههه

فى المدينة اللى انا كنت ساكن فيها سابقا، كان الموضوع ده منتشر بشكل وهمى..
وبكافة الأساليب والطرق المبتكرة جدا لأبعد الحدود!!

آخرها مثلا بالنسبة لى ان فى أخ فى الله قابلته مرة فسألنى هو انت فى طب؟
قلت له لا !
قال لى أصلى قابلت دلوقت راجل غلبان فى المكان الفلانى عنده فيروس كبدى ومحتاج يعمل تحاليل فافتكرتك فى طب وتعرف حد فى مستشفى الجامعة وكده وأخدت نمرته احتياطى اصل شكله غلبان اوى!!

قلت لا والله مع الأسف..

وسبت الأخ ومشيت..
ومرت الأيااام والأسابيع... :)

وفى يوم جمعة وانا خارج مع صديقين ليا على الطريق عدينا على المكان الفلانى ده ولقينا نفس الراجل اللى هو كان بيحكى عليه ومعاه ورق ومستندات وكده..
(معلش يا تامر باشا هكمل بعدين ان شاء الله :) )

Rosa يقول...

يا أستاذ تامر الشحاتة هي الشحاتة في النهاية المعنى واحد.

أنا بس بأكد مع حضرتك انه ديننا بيحثنا بشكل شديد جداً على تحري الجهة اللي هتروح فيها الصدقة قبل ما نطلعها لازم تروح للي يستحقها حتى انه تحري الصدقة يكاد يكون أهم 100 مرة من إخراج الصدقة نفسها.

فبالله عليكم جميعاً ماحدش يساعد الشحاتين بتوع الشوارع دول مهما حسينا انهم محتاجين لانهم كلهم للأسف بيمثلوا و المحتاج الحقيقي متداري و حيائه بيمنعوا من السؤال و هو في أشد الإحتياج لصدقتنا.

حضرتك تعرف انه ظاهرة الشحاتة مش بس في الشوارع؟؟ في شحاتين من منازلهم!!

آه و الله و أنا شفت بعيني بيبقوا مشتركين في أكتر من جمعية خيرية من اللي بيطلعوا مرتبات شهرية للمحتاجين و بيبقوا معرفي الناس كلها انهم محتاجين و بالتالي تلاقي أهل الخير كلهم بيساعدوا و دخلهم بيوصل لآلافات في الشهر الواحد

علشان كدا ربنا يبارك للك أرجوكم تحروا الصدقة

آسفة على الإطالة و شكراً للموضوع الجميل

Hajar Jackoub يقول...

ليه بس مش بتحب جهينة بالفراولة دا حتى طعمه حلو!! ^ ^
بس البوست ده بيأكد بما لايدع مجالا للشك أن المصري دايما قادر على الإبتكار و خصوصا في مجال النصب على الآخرين!
كل يوم و التاني تطلعلنا طريقة نصب جديدة . . سبحااان الله مايبتكرولهم طريقة شريفة في كسب العيش أحسن مش في النصب!
أنا قابلت حكاية ( الشغالة اللي بتقول أنا رايحة ميدان رمسيس ممكن توصفيلي أمشي إزاي. . قولتلها أركبي حاجة من الشارع الرئيسي قالتلي معلش أصلي رايحة مشي!!! )

-أنا عن نفسي باحترم اللي قاعد يبيع مناديل أو شاي على الكورنيش ، وبساعده لأنه بيشتغل فعلى الأقل هو أحسن من الشحات. . .

و دمت بود و عافية :)

حواء يقول...

السلام عليكم
بص ياستاذ تامر
هحكيلك قصه قريبه من موضوع القطار والتذكره ده لحد قريب مني اوي


صلي علي النبي

واحده ست في أواخر الاربعنيات ريحه في الفيلا بتاعت جوزها في الساحل الشمالي
وكان معها بنتها واختها وعيالها وعيال ناس قرايبها
يعني كانوا حوالي 18 شخص او اكثر وكلهم أو معظمهم اطفال لايتراوح اعمارهم بين 10 سنين و 15 سنه
وطبعا كلهم عيال يادوب معاهم كل واحد 20 أو 30 جنيه
وكل واحد منهم ادي الحاجه الكبيره الفلوس
المهم قرروا ينزلوا من الساحل
نزلوا وركبوا القطر لحد محطه رمسيس
وجم علشان يدفعوا للميكروباص من رمسيس ليهم كلهم
كل واحد يدور في جيبه مفيش ولا مليم
الكل حتي اختها
اضطرت بنتها انها تروح لاي شخص تقوله اديني فلوس اروح
وطبعا الراجل مصدقهاش
فحكتله علي الحكايه
فقلها طب هما فين اللي معاكي
راحت واخده ووريته فين الناس
الراجل كتر خيره سعتها دفع للكل وروحوا بعد لما اتأكد انهم فعلا ممعهمش فلوس
وشاف ستات واضح عليهم انهم محترمين ومش شحاتين

الخلاصه اللي عايزه اقوله
ان في ناس فعلا بتتزنق في الشارع وبيبقي مش معها فلوس

فياريت قبل منتسرع نتأكد الاول في الرفض ونفهم
زي معملت مع الراجل

انا مره حصل فيا كده وفضلت اروح مشي علي اني اطلب من حد حاجه
وده علشان للاسف محدش يظن اني بشحت وخصوصا بالنقاب


وفعلا في ناس كتير محتاجه أولي من الناس اللي بتشحت ديه


في ناس فعلا مش لاقيه اللقمه

وصحيح حكايه المثل اللي بيقول الشحات ليه نص البلد

تحياتي علي البوست الجميل ده

سارة احمد يقول...

ياتامر الناس فعلا بقت غلابه...غلاء وازمه اقتصاديه...الناس مش بتلقي العيش حاف...الواحد مش بيعرف مين المحتاج ومين الى مش محتاج...ممكن يكون معاك حق فان الشحات الى نص الدنيا بس ساعات مبيبقاش لقئ حاجة من الدنيا...ناس بتدفع فى الفرح خمسين مليون وتاكل ريتش باك وسنيكرز وكتكات وناس مش بتلاقئ الرغيف الحاف...اصبحنا دلوقتى فى عصر الجياع...المشكله ان ممكن يكون فى موظف غلبان بياخد 500جنيه فى الشهر ومش قادر يفتح بيت ويكمل عشاء نوم والناس مش حاسه ومش شايفه...حتي عسكري المرور غلبان مرتبه كام يعنى...والله الواحد ماعارف ازاى يساعد ولا يعمل اية ...الموضوع عايز تنظيم...ازاى؟؟؟؟

تامر علي يقول...

د/ستيته حسب الله الحمش
أكيد طبعاً الحالات الواضحة مفيهاش كلام بالعكس بعض العلماء قال بوجوب السؤال على من خشي الهلاك على نفسه ... بس لما تتحول لمهنة ووسيلة للمكسب والإثراء مع البطالة التامة فيجب على المجتمع كله التوعية للتحري فمثلاً كم باب للصدقة مفتوح وجاهز وأولى من أي شحات ؟؟؟
- باب الجهاد وتجهيزه في العالم كله في كام شعب بيذبح ومحتاج مساعدة ؟
- باب النفقة على طلاب العلم اللي بيكون فضلة ممتد حتى قيام الساعة (في طلبة كتير مش لاقية هدوم تروح بيها مدارسها)
- باب النفقة على الأيتام
- باب النفقة على الأرامل وكبار السن

علشان الأبواب كترت جداً واحنا مواردنا محدودة جداً برضه يجب التحري وعدم الاستسهال فيها ... لكن الموضوع شرعاً هو مفاضلة بين فاضل وأفضل مش أكتر :)

تحياتي وتقديري دائماً :)

تامر علي يقول...

مسدس صغير

خلاص الله يكرمك تبلغني على طول علشان العملية (ناشفة أوي )

بس سيبلي شويه من العلبة بتاعتك :)

تحياتي :)))

تامر علي يقول...

ايوشة

طيب خليهم علبتين علشان آخد واحده بالجوافة وواحده بالمانجه :)))

طبعاً الشحاتة حرفة المكسب السريع وتدر أرباح طائلة ولها مافيا في مصر

تحياتي بالجوافة:)

تامر علي يقول...

رئيس التحرير

والله فعلاً ...نديله على قفاه ونقول له روح شفلك شغلانة .... في ناس عدت الستين وبتشيل زلط علشان تأكل عيلتها والله

تحياتي وتقديري للمرور الجميل والمشاركة الفاعلة .

تامر علي يقول...

إيمان

للأسف الأطفال بيكون في وراهم عصابة مشغلاهم في الشحاتة ... عموماً فعلاً الإعتماد على التقييم العقلي أفضل كتير من استسهال إلقاء الصدقة بلا تفكير

... إيه رأيك ؟؟؟؟ شكل من الآخر :)
مش أنا اللي نقيته ...المودام هي اللي منقياه بس أنا اللي اعطيت إشارة البدء:)

تحياتي وتقديري :)

تامر علي يقول...

د/عرفه

فعلاً ساعات الواحد بيشك وبيفضل يعطي غير مستحق احتمال كونه مستحق ومنعه:)

إحنا عملنا كل حاجه يا باشا ... فاضل نشحت عن طريق المراسلة :)

تحياتي :)

تامر علي يقول...

ebn roshd 777

طبعاً الموضوع فاضل ومفضول لكن لكثرة أبواب الحاجة وجب التنويه على الأفضل لكثرة احتياج الناس وأبواب الانفاق

تحياتي :)

تامر علي يقول...

د. ياسر عمر عبد الفتاح

طيب ما الفراولة فيها أملاح بس مش متهرمنه ببشاعة زي الفراولة .... كل جوافة أحسن :)

طبعاً "وأما السائل فلا تنهر" ولو لم تشك فيه اعطيله أكيد

ممكن تقوله كلمة حلوة أوي ...جوافة:)

تحياتي :)

تامر علي يقول...

MǿиY El-Shreef

خلاص الجوافة عليك بس بسرعة قبل الشتا :)

الرسول علم رجل الاحتطاب وقال له خير من أن يسأل الناس ... أعطوه أو منعوه... يعني المفروض تكون في حيز ضيق مش عمال على بطال :)

فين الجوافه:)

تامر علي يقول...

لقد خلقنا الله احرارا

طبعاً مفيش تقعر أبداً في الكلام دي حقائق ...لكن احنا وصلنا لنهاية التاريخ من جانبه السلبي للأسف ...

في هنا ناس كتير اتبرعوا بعصير جوافة اللي بيحب التفاح ممكن يجيب ونبقى نبدل :)

تحياتي :)

تامر علي يقول...

Atef Shahin

مرحباً بأول ظهور ...يحمل الكثير من الشرف لنا :)

تحياتي وتقديري :)

تامر علي يقول...

لجين أبو الدهب

فعلاً أحياناً الشحات بيشحت وهو عارف ان الناس فقساه خلاص بس بيلعب على الزبائن الجدد :)

تحياتي وتقديري :)

تامر علي يقول...

أستاذنا/ فشكووول العزيز

إشمعنى هو يشرب عصير وأنا لاء ... لازم يكون في حقد طبقي :)

الراجل ده كان شكله هندي ...
فيه واحد نصاب ... في واحد افاق ... مفيش واحد مريض :)

فعلاً وراثة الفقر أصبحت زي الأمراض الوراثية للمصريين ... الله يخرب بيت اللي في بالي :)

تحياتي وتقديري :)

تامر علي يقول...

مجرد مدونة

أساليب الشحاتة جديدة زي التكنولوجيا كل يوم في جديد :)

في انتظارك ... عارف الامتحانات وبوظانها:)

تحياتي :)

تامر علي يقول...

Om HAGAR

فعلاً في ناس محترفة شحاتة فعلاً ... وربنا مش بيباركلهم وبيزيدهم فقر على فقرهم وجشع على جشعهم ... فعلاً التحري مطلوب لأن أبواب الصدقات أصبحت عديدة

جزاكم الله خيراً على المشاركة الفعالة :)

تامر علي يقول...

Hajar Jackoub

فعلاً اللي بيبيع حاجة أهو اسمها سلعة وخلاص مش شحاته يعني ممكن ربنا يكرمة ويغنيه عن ذل السؤال

وبعدين أنا بحب الجوافة أكتر :)

تحياتي وتقديري :)

تامر علي يقول...

حواء

فعلاً ساعات الواحد بيتحط في مواقف سخيفة يضطر فيها انه ممكن يشحت ...ربنا يسترها علينا .... أحسن الشحاته دي فن مش أي حد يعرفه

تحياتي :)

تامر علي يقول...

سارة احمد

فعلاً 500 و 1000 كمان ميفتحوش بيت أبداً في الزمن ده .... لكن احنا بنتكلم عن اللي واخدها حرفة للتكسب والبطالة مش سائل عن حاجه حقيقية

تحياتي وتقديري :)

سارة احمد يقول...

انا فهمه اقصدك ...بس ماهو الخوف ان الواحد ياخد العاطل فى الباطل فينمع المساعدة وفى الاخر ممكن يكون الناس دي محتاجه...انا بس عايزه اقول الواحد يساعد وخلاص طلما حد سال المساعده يساعده وهو منه لضميره وربنا ...مش عارفه بس فعلا حال الناس بقى صعب اوى والواحد بيحس انه مفتري اوى لما يكون بياكل جاتوه وشيكلاوته ومياسعدش محتاج العيش...الله اعلم فى الاول وفي الاخر:)والاختلاف في الراي لا يفسد للود قضية

MaNoOoSh يقول...

فى معظم الاحيان اللى واخدها حرفة بيبان علية عن اللى فعلا محتاج.. بس انا رايي بردو ان الواحد يتحرى صدق اللى قدامه.. يعنى مثلا انا افضل اجيب كيس مناديل بضعف تمنه مثلا من حد بيبيع مناديل وفضل يعمل كدة عن انه يمد ايده.
بس الواحد من كتر ما شاف مناظر الشحاتين اللى بتمثل وصوتهم المفتعل اللى كانهم فى مسرح بالظبط مبقاش يصدق اى حد.
بس انا مش معاك فى موضوع الجوافة دة على فكرة.. الفراولة احلى بكتييييييييييييييييييييييير.
ههههههههههههه

MaNoOoSh يقول...

نسيت اقولك الف مبروك على شكل المدونة الجديد.. اختيار موفق وألوانة جميلة وهادية

الازهرى يقول...

تعرف انت نسيت حاجة
واحد شحات كان بيطلب جاتوه
فصاحبة البيت قالت له اطلب عيش حتى
قال لها لأ النهاردة عيد ميلادى

دائما ما انادى بان نتحرى من نعطيه الصدقة وان كان هذا لا يمنع ان هناك احيانا من يكونون فى ورطة حقيقية ونسارع اليهم وان كان هؤلاء عادة يكون طلبه معقولا وليس خياليا كالاخرين

http://kawarith.blogspot.com/2009/04/blog-post_14.html

تحياتى دوما

شمس النهار يقول...

طبعا بعد الضحك من هذا البوست الضاحك

الشحاته في مصر اصبحت علم وفنون تدرس طبعا ممالاشك فيه
شيخنا الجليل رحمه الله الدكتور المسير
سألته مره عن الموضوع ده قال لي شحاتين الشارع والاشارات ماتديهمش حاجه خالص
دول مش شحاتيين دول نصابين وانت كده بتسعديهم علي النصب والاحتيال

لي صديقه ظابط شرطه كنت معاها في مشوار بعربيتها بس هي لابسه عادي
وكنا في اشاره وكان في شحات ماشي يتهز ومحني وبيموت تحس انه ميت من يومين
وبيوطي علينا يشحت هو شاف وشها لاقيته مره واحده بقا والا عيل صغير عنده عشر سنين جري بسرعه واختفي في لمح البصر
اتضح انه لسه كان معمول له محضر تسول عندها ولسه طالع
وعايزه اقول لك ان الشحاتين دول ليهم لللأسف محاميين مخصوص في الموضوع ده بيمسكوا قضاياهم وبيحلوها وبيطلعوهم


اما الحبه الاولانين في البوست بصراحه زعلوني جدا
ماينفعش نقول كده علي نفسنا
لكن ينفع نحارب السلبيات بالايجابيات

ٌرحيـــــــــــــــــــــــل يقول...

من شوي كنت في مدونة إيمان وقريت حلمها قصدي كابوسها اللي صعقني الله يهديها، بس الحمدلله تدوينتك خفيفة الدم صحصحتني وضحكتني وعدلت مزاجي، قال جوافة قااال! ولا تزعل طرشلي عنوانك و انا اطرشلك كرتونة عصير جوافة ههههه

تامر علي يقول...

سارة احمد

مفيش خلاف ولا حاجة المسألة كلها فاضل ومفضول مش أكتر ... لكن طبعاً اللي مش هيقدر يتحرى خلاص لازم يتصدق لأن الصدقة فضلها من أعظم الفضل

تحياتي :)

تامر علي يقول...

MaNoOoSh
فعلاً أن يبيع الانسان أي شيء حتى لو عارف ان الناس بييصدق عليه بأكثر من ثمنها لهو أفضل وأكرم مائة مرة من ذل السؤال

لاء الجوافة أحسن دلوقتي بأه ...الفراولة خلاص باظت كلها بقت هرمونات أنا طلقتها بالتلاتة زي الخوخ .... جوافة يعني جوافة

أي خدمة مع ان مش أنا اللي منقي الشكل :)

تامر علي يقول...

الازهرى

والله معاه حق يطلب تورته وجاتوه كمان وحاجه ساقعة عيد ميلاده برضه ...هو أقل من باقي الناس :)

هو ده اللي انا بتكلم فيه فعلاً التحري هو محاولة لتمييز من يستحق ممن لا يستحق

تحياتي :)

تامر علي يقول...

شمس النهار

لازم يكون فى شفافية في معالجة الأمور ... ولو كان النقد قاسي فالسلبيات أكيد استفحلت حتى استحقت هذا النقد وأكتر:)

أوا مرة أسمع ان فيه ظباط ستات بيمسكوا المجرمين .... دي حاجه كويسه أوي ... لمكافحة الجريمة:)

أسعدني مرورك الكريم :)

تامر علي يقول...

ٌرحيـــــــــــــــــــــــل

طبعاً هي خضتني أنا كمان بالبوست ده ..بس الحمدلله طلع حلم :)

ابعتي انت بس الكرتونة واكتبي عليها تامر علي وألف مين هايوصلها :) بس خليهم كرتونتين:)

مالها الجوافة .... حلوة جداً خصوصاً باللبن :)

تحياتي وتقديري :)

Ahmed يقول...

تامر بيك كعب الغزال

جوافه؟
هههههههه
لأ بجد اسلوب شحاته تحفه

انتا عارف ليه منجحتش, عشان ديه فن محتاج تدريب ومهارات وشهادات كمان
لازم تقنع اللي أمامك

الناس بتدفع وبتساعد الشخص ده بسذاجه وده بيشجعه
من ساعة ما وعيت على الدنيا في دايما واحد بيمشي في المنطقه وماسك في أيده زجاجه بلاستك وفيها سائل شفاف ممكن يكون ميه وعامل على انها محلول متوصل تحت الجلبيه وينده بصوت جهوري وكله صحه ساعدوا المريض العجز

من يجي اكتر من عشرين سنه والزجاجه متغيرتش
سبحان الله يامؤمن

الرسول صلى الله عليه وسلم قال فيما معناه وليس نصه أن مسألة الناس نقطه سوداء في وجه الانسان يوم القيامه

الشغلانه ديه ممكن تكون فعلا حرام لأن فيها كدب وخداع وتزييف وتواكل ومصايب كتير

بس عندنا في مصر ناجحه عشان الناس بتستمتع بالسذاجه وبتحب تعيشها
عارف انه نصاب بس برضه يمكن اساعده

وعجبي

بجد ياتامر انا بعشق كلامك وبستمتع بزيارة مدونتك الجميله ديه
انت انسان جميل جدا

تامر علي يقول...

باشمهندز أحمد أبو العلا

أيوه الجوافه تستاهل أكتر من كده كمان :)

هي دي نقطة الحوار كله فعلاً .... اللي واخدها شغلانة للنصب والإثراء على حساب باقي الفقراء يجب أن نتحرى عندما نتعامل معه بما لايمنع الصدقة على باقي الفقراء .

أهو انت اللي جميل :)))))

والله بيتسعدني جداً يابوحميد :)
تحياتي :)

صبرني يارب يقول...

جوافه ؟؟

يا ضنايا اخويا ما بتعملكش جوافه ؟؟

لما اشوفها هاقطعها

انا رايي زيك تماااااام فى موضوع الشحاته

و 99% من الناس دول مش باعبرهم

وبقيت باقفشهم دوغري من كتر ما شوفت


فى بقى حاجه جديده خد عندك

عشان بس الواحد لازم يثري افكاركم بافكار شحاته ونصب مصريه باحته

تيجى واحده تخبط على الباب وتقولي سلام عليكم

انا فلانه جارتكم هنا
او انا فلانه من طرف فلانه الى بتجيب لكم حليب


وانا بالم فلوس عشان فى واحده غلبانه بتتجوز
او بتعمل عمليه او وات ايفر

وطبعا ست لابسه كويس وبتعدلك كام اسم كده من الشارع وتقولك فلانه قالتلى وعلان اداني

و و و واتقلب يا معلم


وطبعا لو عايز خماشر قصه من نفس النوع اقولك وردوا عليا وعلى جوزي فى المحل بينشهم زي الدبان

وبيعمل زيك كده انت عايز عمليه تعالى معايا للدكتور وانا ادفع للدكتور

الحاج فلان الى بيلم اه طيب تعالى معايا نروح للحاج فلان

وطبعا كله بيطلع فشنك

رايي من رايك تماما وباعمل كده فعلا

تامر علي يقول...

صبرني يارب

خلاص ابقي قوليلها تعمل موز باللبن كمان بالمرة :)

طبعاً أفكار المصريين لا تنتهي وقريحتهم دائماً ما تجود بأنواع وأشكال جديدة من النصب :)

والله في أبواب كتيرة للإنفاق لكن احنا اللي بنكسل .

تحياتي للجميع وللحاج رضا :)))

د/عرفه يقول...

صحيح
انت بتقول فيها
والله العظيم

سمعت قصص كتير
عن موضوع الشحاتة عبر المراسلة والله
كتير جدا كمان وبطرق مختلفة
يظهر انت بس مسمعتش

مجرد مدونة يقول...

بس بجد موضوع تحفة ما شاء الله

مجرد مدونة يقول...

بس بجد موضوع تحفة ما شاء الله