قبل ما اكتب هذا البوست مباشرة قابلت أحد جيراننا الاعزاء
(عم عز مش عارفينه ولا ايه؟؟)
وكنا خارجين من صلاة العشاء مباشرة
عم عز جاوز السبعين (بكثير) و لكنه مفعم بالحيوية (و الكلام)...علشان كده بخرج من الجامع أقول(سلام عليكم يا عم عز) و انا بجري كأني رايح اجيب حاجة و انا مستعجل
المهم علشان مطولش
(قول طول ولا يهمك)
عم عز و انا خارج فقعني كلمتين في غاية البساطة و كان ممكن يعدوا علي أي حد بس مش انا هذا الرجل
قاللي عم عز
(رب مبلغ اوعي من سامع)
كنا في الصلاة و كان في راجل لسة جاي من السفر ... بيوزع سبح خشب و طواقي و مصليات
(تخينة زي البطانية)
كان بيوزع علي معارفه البطانيات
(قصدي المصليات)
و اللي عارفه نص نص يديله طاقية...و اللي مايعرفهوش يديله سبحة خشب
انا عيني طلعت علي البطانية
(اللي هي المصلية التخينة يعني)
و قربت منه و ابتسمت في تودد مصطنع و بصيت علي البطانية
(اللي هي المصلية التخينة يعني)
راح دس في ايدي سبحة خشب و بص الناحية التانية
:(
قمت قعدت أأنب نفسي وأقولها مش لو كنت وطدت علاقتك من زمان بالراجل ده كنت كنت أخذت بطانية
(المصلية التخينة يعني)
و بينما انا غارق في بحر الندم و الاسف و الآمال في البطانية
(المصلية التخينة يعني)
إذ قفزت الي ذهني خاطرة عجيبة
لما انا ندمان علي عدم توطيد علاقتي بالراجل اللي معرفهوش علشان حتة بطانية
امال مش ندمان علي عدم توطيد علاقتي بربنا ليه؟؟؟
و لو وطدت علاقتي بيه ممكن يديني ايه؟؟؟
و لو خليتها زي ما هي علاقة سطحية هندم علي ايه ولا ايه من اللي هايفوتني؟؟؟
عم عز صدمني صدمتين
صدمة البطانية
(المتخفية في صورة مصلية تخينة يعني)
و صدمة الرسالة اللي وصلتني من حيث لا ادري ولا احتسب
قلت اوصلهالكم انتم كمان يمكن يكون فينا
( مبلغ اوعي من سامع)
بالنسبة للتاج بتاع اخويا أحمد ابو العلا
(رفع الله شأنه بين البشمهندسين يا رب)
متجاوب بما يلي :
اسمك؟
تامر علي
(هنقرالكم كمان اللي مكتوب)
المشهور بيه وسط صحابك؟
تامر
(بس من غير علي)
سنك؟
في ربيع عام 1972 حدث حدث جلل اهتزلت له الفلنكات و اشرئبت له الأعناق
(احسب انت بأه علشان انا بطلت احسب و الله جالي اكتئاب)
مجال دراستك؟
الاقتصاد و ادارة الاعمال
(تجارة يعني خلاص؟)
اسم مدونتك؟
انظر اعلاه هتلاقيه يخرم العين
(هي غتاته و خلاص)
صورتك الرمزية في المدونة بتعبر عن ايه؟
منظر السماء الصافية المليئة بالنجوم مبهر و لكنه متكرر لذا لا يجذب الكثير
هل فكرت في اغلاق المدونة؟؟و السبب؟
اييييه دااا؟؟هو انا لسة فتحتها علشان اقفلها؟؟؟
ايه رد فعلك لو حد قل أدبه عليك في تعليق ؟
علي حسب الموقف...انا متعود اعالج المواقف ديه (كل علي قدره) و هو و ظروفه معايا
أسوء مدونة؟
قول اسوء مدونات
مدونات مهاجمة الدين و رموزه و شعائره
ثم مدونات الالحاد
ثم مدونات الاباحية
ثم مدونات قلة الادب في الكلام
علي الترتيب...مع العلم اني ممكن ادخل اعلق عند حد منهم لغرض يطول شرحه
هيحصل ايه للإيميل بعد ما تموت؟
و انا مالي ..و انا هكون في ايه ولا في ايه..مش لما اموت كويس و استقر ابقي اشوف
أديت الباسورد لحد قبل كده؟
ليه ان شاء الله؟؟اكتع مابعرفش اكتبه انا يعني؟؟لأ طبعا
السفر بالنسبة لك؟؟
و الله كان نفسي اروح بور سعيد و اشوف المنطقة الحرة و اجيب
(كوتش)
بس يالا النصيب
(كوتش)
بس يالا النصيب
السفر يجمع بين العذاب و التشوييق و الفائدة العظيمة
الامام الشافعي شبه كثرة الاسفار و الضرب في الارض في مكان واحد
بالماء الجاري العذب الذلال..و الماء الضحل كريه الرائحة
اتحرك يا أخي :)
المود بتاعك ايه؟
هادئ جدا ظاهرياً...عصبي جدا داخلياً..ممطر شتاءً.. بارد صيفاً
بتعمل ايه في وقت فراغك؟؟
اموت في الانتخة جدا..و أحسن حاجة بحبها اني اظفر بلحظة مايكونش ورايا فيها أي حاجة علشان ماعملش فيها اي حاجة
الاكلة المفضلة؟
انا من آكلي اللحوم...مفترس لجميع انواع اللحوم
لكن الايام علمتني ان احلي اكلة هي اكلة
(معمولة بنفس و مزاج مش أي عك و خلاص)
ممكن تكون اكلتي المفضلة هي جبنة قريش بزيت و خيار و قوطة
افتري بأه خيار و قوطة مع بعض
(بس معمولين بمزاج)
الصفات التي اخذتها من والدك؟
تكبير الدماغ...الأيد الخرومة...الطناش...النسيان
الصفات التي أخذتها من والدتك؟
والدتي مدرسة لغة عربية..أخذت عنها حب الادب
و الحساسية المفرطة
(بدون ازعاج الاخرين)
و بلاااش نكمل
اكتر ست حاجات بتكرهها؟؟
الضغينة
الحسد
الكبر
التلوث بكل انواعه
الظلم و السكوت عنه
وجع الدماغ:)
اكتر ست حاجات بتحبهم؟
ان اكون في حالة (وصل) مع الله
(هو ده النعيم الحقيقي)
الاطفال
(و اطفالي الاتنين علي رأسهم طبعا)
الطبيعة
(القعدة في الشمس في يوم ربيعي في مكان اخضر)
و ياسلام لو كباية شاي بلبن
قراءة عمل جيد
ادخال السرور علي مسلم
النوم:)
(الانتخة):)
شخصيتك نوعها ايه؟؟
ايه اللي نوعها ايه
بصراحة مش هعرف اجاوب و مش انا اللي احكم كمان
لماذا دخلت عالم التدوين من الاساس؟
و الله انا متابعه من سنتين بس مادخلتش الا اول السنة ديه بس و مافيش سبب مباشر
(قررت ادخل دخلت علي طول)
احلي جملة قيلت في وصف مدونتك؟
أي جملة تقال من شخص (بيفهم) اعتز بها جدا و لو كنت نقد
اهمية التعليقات بالنسبة لك؟؟
مؤشر هام للتفاعل و تبادل وجهات النظر
احلي بوست كتبته؟ و ضع لينك ثم اذكر السبب؟؟
بصراحة انا من النوع اللي ما بغصبش علي نفسي في الكتابة و مش بحاول اكتب الا لما يكون في حاجة عاوز اقولها علشان كده كل بوستاتي عندي واحد
افضل مدونة قرأتها؟
المدونات اللي متابعها كلها..يعني بص علي قائمة المدونات تلاقي الي متابعهم كلهم
(انا ما بجاملش ولا بغصب علي نفسي في القرأة كمان)
هتلاقي كل شخص عنده حاجة مميزة
د/ستيتة ...التلقائية و الكاريزما المتدفقة كما يجب ان تكون
م/أحمد ابو العلا ...حضور الكلمات و الافكار
ايمان... نضج الافكار و ما وراء الاحداث
فتافيت...رشاقة الاسلوب و حدة الفهم
رحيل...اشبه بأديبة من زمن اخر ذات لغة عالية الوميض
آبي...صدق و بساطة الكلمات
أ/محاسن... تنقلك للأحساس بمعاناة الاخرين دون ان تشعر بأي عبء بل بالعكس
روز...ابداع و أدبيات جاهزة للعرض
تامر دياب... احساس صادق بدون رتوش
الازهري...مقل لكن له حضور
أ/بيرم...غني عن أي كلام
أ/فشكول... متعة المعلومة و الفشكلة :)
عادل...ادهم صبري بتاع زمان بخفة دم:)
د/توكل...مناضل اللهم فك اسره
و غيرهم لكن المقام لن يحتمل
افضل بوست قرأته؟
نفس الاجابة السابقة
الشغل بالنسبه لك؟
هم كبير
الانترنت بالنسبة لك؟
زي الفول بالنسبة للطعمية
تمرر التاج ده لمين؟
لكل اللي يحب
انا استمتع بالسير الذاتية
(فضولي)
آسف علي الاطالة
هناك 70 تعليقًا:
أجمل شيء في التاج انه بيعرفنا اكتر على ناس نحب نعرفهم
ربنا يبارك فيك على الجزء الأول من البوست
وتعيها أذن واعية
والجزء التاني دمه خفيف واجمل شيء فيه الأنتخه ثم الأنتخه ثم الأنتخه
ربنا يعينك ياللي في بالي
عارفها انت طبعا الدعوة دي لمين؟
اللي بتعمل الجبنة بالخيار والطماطم
ياسلاااااااااااااااام؟
اجمل شئ فى الدنيا الانتخه
اللهم اجعلنا اناتيخ
وابعد عنا سكان الارض واجعلنا من سكان المريخ
ومتعنا باكل الرنجه والفسيخ
جزاك الله خيرا الجزء الاول جميل اوى وفكرته بسيطة ووصلت على طول ربنا يكرمك يارب
ااما بئا بخصوص التاج اجمل حاجة فى التيجان بتعرف المدونين بشخصيات بعضهم
وان شاء الله تسافر بورسعيد وتشترى الكوتشى :)
شارك في الحملة من أجل إطلاق سراح
المدون دكتور / توكل مسعود
ربنا يسعدك كمان وكمان
ويأنتخك كمان وكمان
وتحياتي لزوجتك الكريمه
وربنا يجعلكم ونعم الزوجه الصالحه للزوجه الصالح ويرزقكم بالذريه الصالحه
أقول امين
حلوه اوي رب مبلغ أوعي من سامع
انا اول مرة ادخل هنا
ويصراحه دعوتك للانتخه مغريه جدا جدا :P
فـ عشان كده قررت اكون زائره دايمه اوكي
:D
خد بالك انا مش بستأذن :p
وبعدين انتوا ليه كلكوا بتحبوا الجبنه كده :s:s
ربنا يكرمك يااارب
اجاباتك علي التاج لطيفه وفيها تلقائيه
اما الجزء الاول من البوست فعلا كل كلمه كتبتها صح بس صدقني ربنا بيعطينا مش عشان بنعمل لا عشان هو كريم واحنا بنعمل عشان انفسنا
أسلوب أكتر من رائع
ربنا يباركلك فى الأولاد
ومالها السبحه الخشب يأخى هو عاد حد لاقى
ربنا يبعد عنك الهم كمان وكمان ويزيدك أنتخه آآآآآآآآآآآآآآمين
يارب نكون من اللي بيسمع ويفهم ويبلغ
يارب بجد نكون كدا
اجاباتك جميله وأتمنى أني مكنش ضايقتك بجد بكترة الأسئله
بس مدونتك من المدونات اللي بحبها وكان لازمن تكون من أول الناس اللي همررلهم التاج
اكتر حاجة عجبتنى الدعوة للأنتخة
آل يعنى هو انا ناقصة أنتخة
هههههههههههه
انا مأنتخة على الاخر والحمد لله
وبعدين عندى بطانية
(اللى هى المصلية التخينة يعنى)
(وش بيطلع لسانة)
ربنا يوفقك يا استاذ تامر ويباركلك فى أطفالك ويجعلهم أبناء صالحين
د/ستيته حسب الله الحمش
يا فندم انت دايماً رافعة روحنا المعدنية ... ربنا يجزيك عنا خير .. وهانعزمك على سندوتش جبنة بالخيار (والقوطة كمان ان شاالله محد حوش :)
عاشقه الرومانسيه
الفسيخ ماشي الرنجه (مملحة أوي :)
وفعلاً الدنيا ايه غير انتخه :)
ايوشة
بس لسه محوشتش تمن الكوتشي :)
وده شرف لينا أن نتعرف على شخصيات كريمة احنا كمان :)
م/ الحسيني لزومي
إحنا مشاركين ان شاء الله ولو في جديد نرجو ابلاغنا
حواء
جزاك الله خيراً على الدعاء الجميل .. ولك مثله ... ربنا ينفعنا بما نسمع
تحياتي :)
MǿиY El-Shreef
يا فندم ده شرف كبير أن تشرفينا بالدخول للمدونة المتواضعة ومرحباً بك بلا استئذان :)
أما عن الجبنه ..علشان متبقاش غصب نقول بنحبها وخلاص :)
شمس النهار
فعلاً ربنا أكرم الأكرمين يعطينا بلا سؤال ...لكن احنا اللي بخلاء وبنحسبها حساب التجار
تحياتي
wesoooooooooo
كان نفسي اخد السبحة أو أي حاجه وخلاص حد لاقي صحيح :)
كفانا الله واياكم شر الهم والحزن
تحياتي وتقديري :)
عمنا الباشمهندس الكبييير أحمـــــــــــــد أبو العلا
تضايقني إيه يا اخي بس ده كلام ؟؟؟:)
انت اسعدتني والله وربنا يجعلنا دائماً متحابين فيه دائماً
خالص شكري وتقديري :)
MaNoOoSh
مش كده صح الأنتخه برضه ليها ناسها :)
ربنا ينفعنا بما نسمع (بجد عندك بطانية على شكل مصليه تخينة ؟؟؟ يا محاسن الصدف :)
تحياتي وتقديري :)
حكايه فعلا حلوه ياريت كلنا فعلا نخلي علاقتنا بربنا اكتر من كده وانا كمان يارب بالنسبه للتاج تاج جميل وردودك حلوه
حاسوباتيه
ربنا يجعلنا من الذين يسمعون ... فعلاً محتاجين لتحسين العلاقة مع ربنا بصورة مستمرة
شكراً لك دائماً
تحياتي وتقديري :)
أنا طبعا قرأت البوست ده من أول يوم
لكن ملحتش أعلق عليه
الجزء الأول أثر فيه جدا وحرك مشاعر بحاول أنيمها( ننه هو) ربنا يجازيك خير ..رغم انك قلبت المواجع
اما بالنسبه من للتاج بجد انت فنان وتملك روح فنان متواضع ومجروح فى نفس الوقت .. سعيده ان التاج قربنا لشخصيتك اكتر
انا على فكره مأخدتش بالى خالص انك بتحب الجبنه بالخيار والطماطم ...هههه
غريبه الصدفه دى ...هههههههههههه
لتفتكر انى غشاشه ولا حاجه
يعنى ليه رجاء عند حضرتك ممكن إسم المجموعه القصصيه بتاعتك
مش معقول كده
إيمان
الظاهر إن الجبنة والخيار والقوطة هي الأكلة الشعبية الأولى في مصر .. لقيت كتير جداً مشتركين فيها :)
المجموعة إسمها "بلاد ما وراء الحزن"
تحياتي
فعلا الواحد لازم يقدم السبت علشان يلاقي الحد ,
و ربنا يرزقنا حسن العمل ,
و بالنسبة للتاج , أنا بحب برضه اقرأها علشان أعرف أكثر عن اللي بقرأ له ,
و عموما مش هطول عليك ,
و مبروك السبحة الخشب , بس نصيحة ما تستخدمهاش و اعقد التسبيح بالأنامل فإنهن مسؤولات و مستنطقات , كما قال رسول الله صلى الله عليه و سلم
السلام عليكم
ده تانى تعليق ليا
طبعا هتقول هو فين الاولانى يا عم انا اول مره اشوف تعليقك
ياريت يا تامر تشوف تعليقى على موضوعك اللى فتافيت اتكلمت عليه
وده الموضوع اللى خلانى اتابع مدونتك واهتم اكتر بالمواضيع
طبعا مدونة جميلة
تحياتى ليك تامر
السلام عليكم أيها المؤنتخ
,, ممكن أسألك سؤال ,,هو حضرتك أخ ؟؟
TIMMY !!
شكراً لك ومرحباً بك دائماً .. بالنسبة للتسبيح فأحياناً استخدام السبحة بيكون له فوائد في العد وعدم التركيز في الحساب عن الذكر وكمان بتيسر الموضوع للكسلية اللي زيي ... لكن طبعاً الأصل للأصابع زي ما قلت :)
تحياتي
د/عرفه
أنا رديت على تعليقك وطبعاً مرحباً بك في أي وقت وبأي كيفية :)
تحياتي :)
المتبهـدلـون فـي الأرض
وعليك السلام أيها المتبهدل :)
* أي حد عنده اخوات يبقى أخ :)
أنا تنظيمياً لست بأخ ... لكن فكرياً ليا اتفاقات كثيرة واختلافات قليلة ... لكن أي أنتيخ لايمكن يبقى أخ:)
يااااااااااه
ياااااااااااااااااااااااااااه
يااااااااااااااااااااااااااااااه
على الأنتخة
بعشقها .. وبموت فيها
وياسلام كمان على النوم الكثير وبعدين تقوم تأنتخ وبعدين تنام تانى وبعدين تقوم تأنتخ
متعة ما بعدها متعة
رفيقى فى الأنتخة
دمت طيباً .. وكما تتمنى مأنتخاً
د. ياسر عمر عبد الفتاح
فعلاً محدش يحس بالأنتيخ إلا أنتيخ زيه :)
أحاسيس جميلة ومليئة بالفرفشة والنعنشة والأنتخة فعلاً كما يقول الشاعر ... رب أنتيخ لك لم تلده أمك :)
تحياتي واحتراماتي :)
طب اولا ده انا وحشه قوى قوى قوى
ايه اليى انا بهببه ده انا غايبه مده طويله قوى عن الريشه والقلم
بعتذر جدا جدا جدا
وشاكره قوى الكلمه الطيبه اليى اتقالت فى حقى دى ربنا يصلح حالك دايما يا رب ويباركلك فى ولادك القمرات
اما التاج فعارف يا تامر اكتر شئ مش هعرف اجاوبه لو اتبعتلى هو صورة المدونه بترمز لايه
بس الصفات اليى اخدتها من والدك ووالدتك تعمل شخصيه ناجحه بجد مش مجامله
وبعدين متزعلش لو رحت احج ان شاء الله هجيبلك بطانيه من اليى بيصلوا عليها وده وعد ولو رحت والدنيا اخدتتنى ونسيت ابقى سامحنى بئه وربنا يكتبهالك فى الجنه
اسفه كمان مره على الغيبه
mahasen saber
والله يا فندم أنا مقدر تماماً ومتأكد إن غيابك أكيد له مبررات .. كفاية الكتكوت الصغنون ده ..أنا مجرب :)
وطبعاً أي كلام هيكون قليل في حق حضرتك:)
وبعدين ربنا بس يكتبهالنا جميعاً واحنا نغرق الدنيا بطاطين (مش عارف ليه كل اللي بيسافروا بيجيبوا معاهم بطاطين ؟؟:)
تحياتي وتقديري:)
السلام عليكم ورحمة الله وبركاتة
ههههههههه
معلش اصل اجاباتك بعضها مضحك للغاية زى الباس ورد
واميل بعد ما تموت
بعد عمر فية البركة ان شاء الله
وبالنسبة للموضوع نفسة
فهوا فعلا جميل ربنا ينعم علينا بنعمة محبتة ومراعيتة فى السر و العلن
دمت بالف خير
وتقبل مرورى
أحاسيس جميلة ومليئة بالفرفشة والنعنشة والأنتخة فعلاً كما يقول الشاعر ... رب أنتيخ لك لم تلده أمك :)
---------
والله أنا سعيد جداً بمعرفة شخص أنتيخ مناضل زيك ...
إحنا عاوزين ننشر الفكر ده
ثقافة الأنتخة والترييح
وعاوزين نجمع كل الرفقاء المؤنتخين ففى كل بقاع العالم فى مؤتمر الأنتخة تحديات وشقلبيات .
وأنا من على كنبتى حيث أأنتخ دائماً أنادى بعمل جبهة الأناتيخ المصريين.
ما شاء الله :)
والله جزاه الله خيرا الباشمهندز أحمد على التاج الحلو ده عشان عرفنا بالشخصيات الجميلة اللي بنحب نقرأ لها :)
مش عارف ليه عملني غير معرف !!
اكيد أنا عملت حاجة غلط ما علينا :)
حتى تشرق الشمس
مرحباً بسيادتك ... ونرجو أن نكون عند حسن ظنكم ...نفعنا الله بما نسمع :)
تحياتي
خلاص متفقين ... من هنا ورايح هانرفع شعار "مأنتخون للنهاية" وأول شرط للانضمام هو النجاح في اختبار الأنتخة للانضمام للقافلة :)
تحياتي
محمود عبدالله
أين أنت يا رجٌل ؟:) بقالك كتير مكتبتش حاجه جديدة ..لعل المانع خير ؟:)
تحياتي دائماً
هدية التاج مقبوله مع انى كنت عايزه انسحب من هذه التيجان فى صمت
بس مقدرش ااقول لاخويا لا
هجاوب عليه فى ااقرب وقت ان شاء الله
الاخ العزيز . تامر علي
السلام عليكم ورحمة الله وبركاته
والله لازم تحاول تنشر أعمالك
والله يا استاذ تامر انا اتمنى وبصراحة انا لا اعرف الطريقة وان كنت تعرف فلا تبخل بالنصح على اخوك المسلم
فى مدونتك سعدت بطريقة الرواية وتمنيت ان ارى البطانية السجادة الى ان راايت التاج فاصبت بالفزع وهربت بجلدى
لك تحياتى ، ولا سلام مع اليهود
اول جزئية
عايزاك تشكرلنا عمو اللى لسة جاى من السفر جدا لان الجمله اللى قالهالك الهمتنى ب100 حاجة
وكمان يكفى انه خلانا نسأل نفسنا عن ليه مابنوطدش علاقتنا بربنا .. رغم ان حتة فكرة توطيد علاقتنا بربنا فيها مصلحة وهى اننا طمعاننين يستجيب دعوة حلوة لينا - طمعانين انه يغفر شىء عملناه وندمانين - طمعانين مايسدش فى وشنا باب نفسنا ندخله .. يعنى حتى العبادة منطوية على ان فيه جزاء
الجزء التانى
===========
بالنسبة للتاج بئى
كان من احلى التيجان اللى قريتها وعرفنا بيك بدف خفيف
تقبل مرورى ياتامر
إن شاء الله تيجيب أحلي من البطانية دي قصدي المصلية دي لما تروح عمرة أو حج
ربنا يرزقك بيها ياااااااااااااا رب
التاج عجبني جدا و عن طريقه عرفتك أكتر
السلام عليكم ورحمة الله .. وبعد
تاج... على الرؤوس ....
وعموما ربنا عنده بطاطين
"قصدى سجاجيد" كتييييييير
دمتم بخير وعافية
Beram ElMasry
ازيك يا عمنا :) انا علقت عندك بالنسبة للموضوع ده
تحياتي
ملكة بحجابى
بالنسبة للعلاقة مع ربنا فمن الطبيعي أن تمر بمراحل كثيرة حتى تصل للمرحلة المرجوة ... لكن المهم جداً اننا نوجد العلاقة بأي شكل وبأي كيفية لأن قطعها مصيبة لايدركها الكثيرين .
يسعدنا مرورك دائماً
تحياتي وتقديري :)
مش عارفة الدنيا وخداني علي فين
ربنا يسهل لنا واياكم زيارة بيته مرات ومرات ... ونجيب بطاطين ولحفه كمان :)
شكراً وتحياتي لك دائماً:)
د.توكل مسعود
والله لا تعلم كم اسعدنا نبأ خروجكم بفضل الله ... ربنا يجعله في ميزان حسناتكم ومن المكفرات .
أكرمنا الله واياكم بزيارة بيته الحرام
أسعدنا مرورك الكريم :)
السلام عليكم
اخى تامر
طبعا يمكن تكون الزياره الأولى لمدونتك الكريمه ولى عظيم الشرف انى ادخلها
ومن حظى انى ادخلها وانت معاك تاج جيل زى ده بيظهرك على حقيقتك اللى انت مش رضيت ترد على السؤال فيها اللى بيقول شخصيتك نوعها ايه؟؟
نوعها حد محترم اوى صريح اوى مش بتفرق معاه المجامله على حساب انها تعجب ربنا ولا لأ
حاطت ربنا فى كل كبيره وصغيره فى حياتك
تمنياتى لك بالتوفيق الدائم والقرب من الله اكثر وأكثر وان يكون هو راضى عنك
تحياتى اخى تامر واسمحلى بزيارات عديده ان شاء الله :)
ناجح
جزاك الله خيرا
والله أنا بردو زي ما معاليك قلت مش بكتب الا لما يبقى نفسي أكتب بالإضافة إلى اني بكتب لك الردود دي أصلا من المحمول شفت التكنولوجيا ؛) عشان الحاسوب مش متوفر لي مع الأسى
بس حاليا بلف على المدونات وبحاول اقرأها كل اللي في المدونات المتميزة بقدر الامكان زي مدونة بشمهندس أحمد ودكتورة ستيتة والقدر وأنا وغيرها من المدونات الجميلة :)
ويا رب تكون أنت والعائلة بخير
إبن مصر
حمدالله على السلامة برجوعك للتدوين :)
الكلام ده كبير قوي أنا ماستاهلش نصه ...ربنا يجعلنا كما يحب جميعاً
شرفت المدونة المتواضعة ونتمنى تكرار الزيارات فهو شرف لنا
تحياتي
محمود عبدالله
ربنا يرجعلك الحاسوب اللهلوب بالسلامة ... بس حلوه حتة التكنولوجيا بتاعة الموبايل دي :)
العلم تقدم برضه يا جدعان :)
في انتظار تفاعلاتك الجميلة قريباً
تحياتي
السلام عليكم
أخي تامر
ما شاء الله اجابات رائعة
بارك الله فيك ورزقك صحبة النبي وصحابته
دمت بخير
لا تنسوا اخوانكم في غـزة من دعائكم
||..بحــر الدموع..||
ايه ده!؟
انت انتوخ زيي :))
هييييييييييه
مش لوحدي يا جدعان بحب الانتخة زي عنيا بس مش بلاقي فرص كتير ليها.
يا عم الحاجة تامر دياب احساس صادق بدون رتوش
ممكن تقول رتوش صادقة بدون احساس ههههههههههههههه
ربنا يكرمك يا باشا يا رافع من روحي المعدنية دايما.
ومش قابل اعتزارك علي الاطالة لأنك مطولتش اصلاً ( وش مطلع لسانه )
هذا التاج مكنني من التعرف عليك أكثر
و اكتشفت أنك تتمتع بروح دعابة
متميزة :)
03 الاخ العزيز . تامر علي
السلام عليكم ورحمة الله وبركاته
شكرا جزيلا على عنايتك بموضوع النشر والفت النظر الى ان الدولة لا تنشر شعر سياسى
التاج فى نظرى وسيلة للتحسس وقد جعلت Soul.o0o.Whisper منه موضوع وراى هناك وضعف بصرى يمنعنى من الكتابة
لك تحياتى ، ولا سلام مع اليهود
السلام عليكم أخى الكريم
الجزء الاول من البوست رائع جدا
احنا فعلا اهدافنا فى الحياة متدنية جدا .. وممكن نحارب عشان شئ قيمته زائلة وناسيين الهدف الاسمى والاعظم
وهو طاعة الله ومحاولة ارضاؤه بكل الطرق للحصول على مالا عين رأت ولا أذن سمعت ولا خطر على قلب بشر
أو لمجرد النجاة من النار حتى
ربنا يرزقنا الرشاد وصلاح أمرنا
أما التاج
فمرحبا بالانتخة الذكورية
كان نفسى نفسى نفسى اتأنتخ بس مش فاضية الحقيقة ههههههههههه
دورت عالحقد بين الحاجات اللى بتكرههم ملقتوش
قلت خلاص براءة
وجيت أعبر عن حقدى الانثوى الدفييييييييييييين
هههههههههههههههههههههههه
خالص تحيتى
سالى
بحـــر الدموع
جزاك الله خيراً دائماً و نورتنا بزيارتك وفي انتظارك دائماً :)
تحياتي وتقديري
Tamer Diab
حبيب هارتي :)
يا باشا ده مش رفع من روحك المعدنية (شايفني ماسك كوريك في ايدي ؟) الكلمات دي انت تستحقها فعلاً وأكثر
زملاء في الأنتخة دائماً
تحياتي
Rose
نتشرف دائماً بمرورك الجميل على صفحاتنا وشكراً على المجاملة التي لا استحقها :)
تحياتي وتقديري
Beram ElMasry
لا شكر على واجب , واحترامي لوجهة نظر حضرتك وسلامي لك ولكل المسالمين ولا سلام مع اليهود الوحشين :)
حاجات جوايا
شكراً لسيادتك على المجاملة الرقيقة
أما عن الأنتخة فهي محببة إلى النفس لأننا قلما ننعم بها فهي كالحبيب المفقود أما عن الحقد فمتوافر بكميات لا بأس بها على كل من يأنتخ وأنا لاء
أسعدني مرورك وأتمنى أن لا ينقطع :)
تحياتي دائماً
حلوة قوي الحكايه بتاعة السبحه والبطانيه .. قصدي السجاده
ربنا يباركلك ياشيخ
ملحوظه
لو فعلا بتحب بورسعيد وبتحب الاطفال .. في بعض المدونين عاملين تجمع وهيطلعو على هناك عشان يقضو يوم مع بعض الاطفال الايتام
هتلاقي التفاصيل في مدونة بيكيا ومدونة قوس قزح
وربنا يوفق الكل
سلامووووووووووووز
Soooo
روح يا شيخ ... ربنا يوعدك بسبحة وبطانية أتخن من كل البطانياط :)
ربنا يجازيك خير على بورسعيد ... مع اني عارف انك أول واحد هاتخلع :)
سلامات
انا موت من الضحك والله العظيم .. وبعدين 72 ده انت من دور اولادي عااااااااااا
وجميلة اوي اكلتك المفضلة
ولا ايميلك انا موت من الضحك والله.. بجد تحفة استقر الاول وبعدين ابعت خده
وطبعا مبسووووووووووطة جدا انى وسط القايمة عندك
وحلوين اوي الكلمتين اللي جنبي دول
مع ان احدهم وصفني في الف6هم براس الكرنبة.. عاااااااااااااااا
ده انا ضحتك ضووووووحك
بس على فكرة حبنة وقوطة وخيار والكلام ده مش هاكل منه
انا معزومة على حماااااااام
ماشي .. افتكر بقى
حمااااااام
فتافيت
يافندم سيادتك دائماً في المقدمة ... وطبعاً أنا ماليش دعوة بالعزومة دي أنا اللي أقدر التزم بيه الجبنة القريش ... واللي وعدك بالحمام يبقى يصطادلك جوزين ..انا هجيب جبنة وخيار وطماطم .. ممكن تجيبى الحمام والممبار وانت جايه :)
تحياتي :)
ازيك يا تامر
نصيحه غاليه يا تامر ان نوطد علاقتنا بالله سبحانه وتعالى
والتاج بتاعك دمه خفيف قوى وخصوصا اللى بيسألك عن الباسوورد وقلت فى الرد وانا مالى مش اما اموت واستقر هو انا فاضى لايه ولا ايه
الله يحظك يا تامر
تحياتى
fashkool
عمنا فشكول ... فين الجميري الجامبو ...أي حد بيروح اسكندرية لازم يجيب معاه قفة جمبري علشان الناس المحرومة من الفسفور ...الغلابه :)
تحياتي دائماً:)
إرسال تعليق