الجمعة، مارس 13، 2009

حبيب هارتي


كنت أقلب في المدونات والمنتديات فوجدت أن أكثر ما يشغل بال (الجميع ) هو الحب والعواطف وما إلى ذلك من (تبعات) فقلت (في عقل بالي ) لماذا لا ادلي بدلوي (أنا كمان .. هي جت عليا أنا يعني ) ... ومن ثم أخذت الدلو وأدليته وهذا ما خرج من الدلو

هذا (البوست) عبارة عن نصفين .... النصف الأول مكتوب باللغة (شبه) العربية ..... والنصف الثاني مكتوب باللغة (المسخره) أو اللغة العامية لأني أعرف أن هناك الكثير لن يتذوق النصف الأول فقمت (بالترجمة) في الشق الآخر فعلى السادة حزب معاداة اللغة العربية الإنتقال مباشرة للقسم الذي يخصهم .

ـــــــــــــــــــــــــــــــــــــــــــ ـــــــــــــــــــــــــــــــــــــــــــــــــــــ

"قال الإمام بن حزم – رحمه الله - الحب أوله هزل , وأخره جِد . دقت معانيه ( لجلالتها) عن أن توصف فلا تدرك حقيقتها إلا بالمعاناة , وليس بمنكر في الديانة , ولا بمحظور في الشريعة , إذا القلوب بيد الله عز وجل ".

لما كان الحب من أقوى المشاعر الإنسانية ومن أغرز الأحاسيس تدفقاً وأعمقها أثراً ولما كان مرتفعاً شأنه لدى الناس فقد كثرت أسمائه وتنوعت أحواله فمن أحواله الـمـحـبـة و الـهـوى و الـصـبـابـة و الـشـغـف و الـوجـد والـعـشـق و الـتـتـيـم و الـجـوى و الـتـبـاريـح و الـشـوق و الـشـجـو و الـسـهـد و الـحـنـيـن . و الـود و الـولـه و الـهـيـام و الـغـرام و الـخـلـة

وكل حالة مما سبق لها أحوال ومعان مختلفة عن الأخرى ولكل درجة أحكام وآثار , ولكل درجة قوة وطغيان يظهر على الإنسان بحسب قوة عقله وبحسب رسوخ عقيدته وبحسب جبلته التي فطره الله عليها . فقد يطغى حب النفس على كل ما سواه ... وتارة نجد من يضحي بنفسه في سبيل من يحب وتارة نجد من يضحي بحبه وهواه في سبيل حب من نوع آخر كحب الولد أو الوالد وهكذا قد يطغى الحب على إنسان فيصير وبالاً يفقد الإنسان عقله ولو بإرادته .


-ومنه ما يجعل الإنسان يقع في حب كل ما يتعلق بحبيبه ومنه قول "قيس "

أمر على الديار ديار ليلى أقبل ذا الجدار وذا الجدارا
وما حب الديار شغفن قلبي ولكن حب من سكن الديارا


فطاف هذا العاشق يقبل جدران بيت محبوبه لأنها احتوت من يحب

-ومنه ما يخفى عن الناس فلا يشعر بقوته ويحترق بلهيبه إلا من ذاق لوعته



لايعرف الشوق إلا من يكابده

ولا الصبابة إلا من يعانيها


-ومنه ما يستره المحب عن الناس غيرةً على من يحب حتى ولو أوهمهم أنه يحب شخص آخر كقول بن المعتز.


لما رأيتُ الحب يفضحني

ونَمَت على شواهد الصب ّ

ألقيت ُغيرك في ظنونهمُ

وسترتُ وجه الحب بالحب


فستر محبوبه عن الناس بأن ألقى بغير محبوبه في ظنهم حتى يظل حبه منفرداً بقلبه ولسانه دون غيره.

-ومن أحواله إخفاءه حتى عن الحبيب نفسه مخافة الصد والهجر... فيظل على حال حبه لا يظهره للحبيب ولو ظفر به رغبة منه في الحفاظ عليه من تمنع أو زهد محبوبه فيه لو علم به ومنه قول الشاعر.

لا تظهرن مـودة لحبـيـــــب
فترى بعينك منه كل عجيب
أظهرتُ يوماً للحبيب مودتي

فأخذت من هجرانه بنصيبي


ومن آفاته النظر ... فالنظرة قد تنبعث إلى القلب فيشقى بها صاحبها ويفسد حاله وهو ما نهى عنه الشرع حفظاً لمجامع القلوب فبعض القلوب تأسره النظرة ولو من نظرة واحدة ... ولما كان تعمد إعمال النظر من المحظورات فعوقب الناظر (بحبس ) قلبه ولوعته على ما لا يطيق .ومنه قول قائلهم

والمرء ما دام ذا أعين يقلبها
في أعين الحور موقوف على الخطر
يسر مقلته ما ضـر مهجـته
لا مرحـباً بسـرور عـاد بالضرر


-ومنه ما قد يخرج الإنسان للكفر بالإعتراض على الخالق عز وجل من فرط سوء حاله ومنازعته أحزان الفراق أو حيرته في رغبة لم تكتمل كقول هذا الشقي


أيا رب تخلق أقمار ليـــل وأغصان بان وكثبان رمل
وتنهى عبادك أن يعشقوا أيا حاكم العدل ذا حكم عدل ؟


-ومنه ما يورث الحسرة والنكد وطول الألم وهو أن يحب المرء من هو متعلق بسواه وهو في ذلك قد انقطع أمله فيمن يحب واتصلت أحزانه لعلمه باستحالة الوصل به ومنه قول القائل

أفق يا فؤادي من غرامك واستمع
مقالة محزون عليـك شفيق
عــلقـتَ فتـاة قــلبـها متعلـق

بغيرك فاستوثقت غير وثيق
وأصبحت موثوقاً وراحت طلـيقة

فكم بين موثوق وبين طليق

-ومنه ما هو همّ كله فيتعذب به المحب في كل حين .... وذلك لايكون إلا لمن كانت له نفس عليلة مريضة بداء العشق فتراه معذباً حين لقاء المحبوب خوفاً من ساعة الفراق وتراه معذباً في ساعة الفراق شوقاً لساعة اللقاء . ومنه قول الشاعر
ومافي الأرض أشقى من محب
وإن وجد الهوى عذب المذاق
تراه بـاكياً فــي كـــــــــــل وقت
مخــافة فرقــة أو لاشتيــــاق
فيبكي إن نــأوا شوقـاً إليـــــــهم
ويبكي إن دنـوا خـوف الفراق
فتسخـن عيـنه عند التـدانــــــي
وتســخن عيـنه عـــند الــفراق


-ومن أنكده وأعمقه غيظاً للنفس أن يظل الإنسان يحترق برغبته فيه في فورة الشباب وثورة العنفوان حتى إذا انطفأت الفورة وهدأت الثورة وصار الإنسان لامطمع له ولا إرب في حبيب أو محب .... جاءه ما كان يرجوه في شبابه على غير رغبة منه ولا طلب . ومنه قول هذا الشيخ .


ما كنت أرجوه إذ كنت ابن عشرينا
ملكته بعد أن جاوزت سبعينا
تطـوف بي مـن الأتـراك أغزلة

مثل الغصون على كثبان يبرينا
وخــرد من بنــات الروم رائعة
يحكين بالحسن حور الجنة العينا
يغــمزنني بأســاريع منــعمة
تكاد تعــقد من أطــرافها لينا
يٌردن إحــياء ميت لا حــراك به
وكيف يحيـين ميـتاً صار مدفونا
قالوا أنيــنك طول اللـيل يسـهرنا
فما الذي تشتكي؟ قلت الثمانينا


متعنا الله وإياكم بمحبته في الدنيا والآخرة وجنبنا أمراض الهوى وأدكار الجوى ومعالجة العشق .
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

نيجي بقه للنص التاني ونقول

زمان قالوا "الحب زي عضة الكلب " وانا دورت في كل المعاجم والمباحث عن معنى لهذه الجملة فملقتش .... فقلت أجتهد أنا وافسرها ... ممكن يكون الحب زي عضة الكلب يعني بيخلي المحب زي المسعور مثلاً فيفضل (يهبهب) محدش يسألل فيه علشان محبوبه بيكون حاسس إنه مقامه زي الكلب وكبيره يرمي له عضمه .... وكمان ممكن يكون علشان أثره ممتد زي عضة الكلب ولو الإنسان مخدش 21 (حقنه) يتسعر ويعضعض في كل الأحباب اللي هم أقرب الناس إليه .... ممكن يعني .... ومن ذلك قول الشاعر

قطعني حته حته ..... وارميني لأي قطه
أنا كنت بحب واحد .... دلوقتي بحب سته
فنرى هنا أن الحبيب قد ازداد (طفاصة ) وبيحب نص دسته .... وكلمة (قطه) في هذا النص تتقابل مع كلمة (الكلب ) في النص الذي يسبقه فيصير المحب والمحبوب مثل (القطة والكلب ) في صراعهم الدائم على بقايا الطعام وصفائح الزبالة مثل كر وفر الحبايب والهجر والصد .
نيجي بقه لنص فريد من نوعه يتناول الحب من منظور عميق حيث يقول الشاعر

حبيني واختفي .... وفقلبي نتفي
دانا قلبي مركبه ... ياحبيبتي قدّفي

حيث بأمر المحب حبيبته أن تحبه في صورة غرامية عنيفة بل الأدهي من ذلك والامر أنه يأمرها بأن (تنتف) في قلبه كما تنتف (الست) ريش الفراخ وهي بتنضفها بالميه السخنه ... وده إن دل فإنما يدل على أن قلب هذا الحبيب وكبدته قد اتسلقت من فرط الحب كقلب الفراخ وكبدتها وأوانصها .... ولم يكتفي هذا الشاعر الفحل بهذا بل شبه قلبه بالمركبة وطلب من حبيبته أن تقدف فيها حيثما شاءت وتتوجه بهذا القلب الكبير إلى حيث تشاء إو لا تشاء هي حره بقى .

وهذا النص يتعارض مع نص آخر لشاعر الحب الضائع حيث يقول

ياللي خدوك منّي ....بعدك مجنني

وهنا يصل الشاعر في حبه لذروة الجنون حيث أخذوا حبيبه منه وأخروه عليه لحد دلوقتي .... فاضطر إنه يأجر واحد تاني بالساعة وتحمل في سبيل ذلك ما لايطيقه بشر من ويلات وتكاليف البعد والهجر وفرقعة المواعيد .

وكذلك قول القائل

يا حبيبي المحشي استوى
ارميلي صباع في الهوا

حيث وصل الجوع واللهفة بهذا الحبيب لحد إنه يطلب (ببقه) من حبيه صباع محشي ... مع إنها عيبه فحقه برضو ... بس مش مهم العيب لما يطلع من أهل الحب يدخلوه جوه تاني ويقفلوا عليه كويس علشان مايتوهش . وشبه الحبيب هنا المحشي اللي استوى بقلبه اللي استوى من الحب وطلب من حبيه أن يرميله هذا (القلب ) الذي استوى من الحب في هوا الحبيب ... وفي ذلك استشارة مكنية ومغاز مرسل بالبريد المستعجل لايخفى على أحد .
وأخيراً نختم بقول الشاعر صاحب "المقلة"

"ضرب الحبيب زي أكل الزبيب "

حيث شبة الحبيب بالزبيب وكان ذلك في رمضان والدنيا صيام والناس نازله تشتري الياميش وبعدين لقوا الزبيب غالي جداً فمشتروش السنه دي زبيب فشبة الحبيب حبيبه بالزبيب من شدة غلاوته وندرته ... وكده يعني ... لكن من عيوب النص كما قال النقاد إنه ماقالش نوع الزبيب بالظبط .... سوري ولا ايراني ولا تركي .... لإنه كده ساب العملية سايبه خالص ... ولو إن أنا بفضل (السوري) يالا مش مهم :)
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أعتذر للسادة المساكين المدونين عن الإطالة .. وأنصحهم بعدم قراءة النصفين على بعض إختصاراً للوقت

هناك 48 تعليقًا:

Ahmed يقول...

ههههههههه

من ابن حزم لعضة الكلب؟
هههههههه

جامد أوي

وحلو شغل الجرادل ده


بس نقله جامده جدا

انا قرات اللأتنين, والنتيجه "انا حاسس إن جالي انفصام في الشخصيه"

Lady E يقول...

النصين اجمل من بعض
بالنوسبة للنص الأول فأنا كنت عاملة بحث فيه نفس ذات الكلام عن الحب العذري
وبالنوسبة للنص التاني ايه التشبيهات الفزيعة دي :)
واخيرا بالنوسبة للدلو رجع الدلو لأصحابه علشان بيسألو عليه

حواء يقول...

ههههههههههه
أنا عن نفسي قريت الجزئين
بس اول مره اسمع عن المثل بتاع الكلب ده
تحياتي

إيمان يقول...

ههههههه
هههههههههمن ابن حزم لصباع محشى فى الهوا
بجد بوست جامد جدا
عجبنى جدا جدا النص الأول
فى تحليله للحب وطرق الوقوع فيه
وإزاى نتجنب ده
بيتكلم من وجهة نظر شرعيه بحته ومع ذلك بيتكلم عن مشاعر الحب بمنتهى الوضوح والصراحه
بجد بشكرك على هذا الدلو
بستأذنك هنقل البوست ده على جهازى علشان لما أجى أنصح البنات ألاقى حاجه أقولها
أما النص التانى فمقدرش أقول عليه
غير أنه مسخره جدا

غير معرف يقول...

صدق الإمام "بن حزم":)

overdose يقول...

معلش زي ما هيكل قال الكلام عن حصار مصر غزة جرحني,البوست برده جرحني,يعني ايه اوله هزل واخره جد تبقي فادحة لو كان قصده الجد هو الزواج,,كون انه يقول ليس بمنكر في الديانة فده المنكر بعينه,,بديهي ان الحب ليس بمنكر لا في دين ولا في شريعة,,وبعدين معلش ايه علاقة الحب بالنظرات
مش فاهمة,,

,وبالنسبة لللعذاب اللي ذكرته دا قرين مش عرض جانبي كما قال امام العاشقين كامل الشناوي عليه السلام
""لست قلبي وانما خنجر انت في الضلوع"

peace

تامر علي يقول...

أحمـــــــــــــد أبو العلا

سلامتك من الفصام يا باشا .... مش مهم أي حاجه أهم حاجه أن الكلام عجبك :)

وبعدين أنا ما ملتش الجردل على آخره :)

تحياتي :)

تامر علي يقول...

Lady E

الدلو رجع لأصحابه يافندم خلاص إحنا كنا مأجرينه بس :)

شكراً لمرورك الجميل :)

تامر علي يقول...

حواء

كويس أديك عرفتي مثل شعبي جديد :)
بس أوعي تقولي كده قدام حد :)

تحياتي

تامر علي يقول...

إيمان

يا فندم النصين تحت أمرك ولو عاوزه تالت كمان موجود :)

بس إوعي تقولي حاجه من النص التاني للبنات :)

شكراً للمرور الكريم

تامر علي يقول...

Rose
الجزء الثاني غير مفهموم بالمرة صحيح :)

طبعاً الإمام بن حزم إمام رائع في كل المجالات :)

دمت بخير

تامر علي يقول...

المينيماليزم

يعني كلام كامل الشناوي أحسن من كلام بن حزم !!!؟؟:) على العموم حضرتك فاهمه غلط ... أوله هزل يعني ابتسامات وضحكات وسمر وآخره جد يعني وجد وعشق ومعاناة .. لايعني الزواج من أي جهة .
وكونه يذكر إنه ليس بمنكر في الديانه فده معروف للجميع إن دي صيغة تقرير بالضبط كقولك السراج منير .. مغلطش الراجل في حاجه يعني :)
وطبعاً العذاب مش دائماُ قرين للحب ... ده عرض طبعاً وإن كان كثير. فهناك الآف الحالات التي تكلل بالنجاح ولا تتعرض للعذابات المصاحبه .
على العموم الإختلاف في الرأي لا يفسد للود قضية ودي وجهات نظر ... بس مش عاوزين حاجه (تجرحك)
دمت بخير

overdose يقول...

معلش برده مفيش حب من غير عذاب دي حاجة مفروغ منها,,,

وبعدين مفيش حاجة اسمها نجاح الحب,,,زي ما بتقول الام تريزا نجاح الحب في ان تحب

ستيتة يقول...

فكرتني بقول الشاعر
يَا دَارَ عَبْلـةَ بِالجَواءِ تَكَلَّمِـي

وَعِمِّي صَبَاحاً دَارَ عبْلةَ واسلَمِي

فَوَقَّفْـتُ فيها نَاقَتي وكَأنَّهَـا

فَـدَنٌ لأَقْضي حَاجَةَ المُتَلَـوِّمِ

وتَحُـلُّ عَبلَةُ بِالجَوَاءِ وأَهْلُنَـا

بالحَـزنِ فَالصَّمَـانِ فَالمُتَثَلَّـمِ


وطبعا كلام عنترة سهل جدا وانت مش محتاج اطلع ليك الكنايات والأستعارات المكتبية


وفكرتني بقول الشاعر برضه

ياحبيبي بانت لبتك اول ما دابت قشرتك
تحرم عليا محبتك وراح اتوب عن سكتك
يا قفا

وده طبعا شعر صعب وجب علينا شرحه
وهنا شبه الحبيب بمقلة لب واللب غالي ولما هو أزأز حبيبه طلع خسران
ثم شبهه بالقفا لأنه بيستحمل كتير برضك
ههههههههههههههههههههههههههه

والله ربنا يحظك

تامر علي يقول...

المينيماليزم

ماشي مش هانختلف كتير ... أهم حاجة مفيش حاجه تتفهم غلط :)

دمت بخير

تامر علي يقول...

د/ ستيته حسب الله الحمش
أنا مرضتش أجيب سيرة قصيدة عنتر بن شداد علشان فيها جملة "لأَقْضي حَاجَةَ المُتَلَـوِّمِ" بدل الراجل (بيقضي حاجه) فلازم نسيبه في حاله بأه ومنعكرش عليه :)

وواضح من شرحك للبيت التاني إنك دارسه شعر جاهلي كويس قوي أو بتفكري في مشروع "المقلة" زيي :)

أضحك الله سنك ومتعك بالعافية :)

صبرني يارب يقول...

يعنى انا قاعده اقرا ومستمخخه من الكلام اصل انا اعز الكلام الجامد موت يعنى

وبعدين ما كنتش هاقرا النص الى تحت باحسبك شارح الى فوق وربنا هههههههههههههههههههههههه
بعدين لمحت عضة كلب ده ورجعتلها ههههههههههههههههههههههههه


البوست حلو بجد وفيه شغل جامد فعلا


تحياتي لك











وفين البنيه ؟؟؟؟؟ (وش مكفهر رافع حاجب ومنزل التاني)

غير معرف يقول...

ظننتك ستتكلم عن حب الله لتبين خطأمارأيت فنتقلت من ابن حزم لعضة الكلب ولم تشر الي محبة الله
فوجب ان نعلق فنقول*
*أحب امرؤالقيس فتاه
واحب ابو جهل العزي ومناه
واحب قارون الذهب
واحب الرئاسة ابو لهب
فأفلسو جميعا لانهم اخطؤوا خطأشنيعا
اماحب بلال ابن رباح
فهو البر والصلاح
سحب علي الرمضاء
فنادي رب الارض والسماء
وانبعث من قلبه( احداحد)
لان في القلب ايمان كجبل احد
اذاكان حب الهائمين من الوري
بليلي وسلمي يسلب اللب والعقلا
فماذا يصنع الهائم الذي
سري قلبه شوقا الي العالم الاعلي

دع حب هؤلاء فانهم مرضي
وتعالي الي الواحد وناد
(وعجلت اليك ربي لترضي)
(فاما الذين آمنوا فيعلمون انه الحق من ربهم واما الذين كفروا فيقولون ماذا اراد الله بهذا مثلا)

بيت لا يقوم علي الحب مهدوم
جيش لا يحمل الحب مهزوم
لكن اعظم الحب واجله
قول الله جل جلاله
(يحبهم ويحبونه)
فلا تطلب حبا دونه
سبحان من لو سجدنا بالجباه علي
حرارة الجمر والمحمي من الابر
لم نبلغ العشر من مقدار نعمته
ولا العشير ولا عشرا من العشر

(منقول)من كتاب ضحايا الحب للدكتور عائض القرني
فهل يستحق الحب سواه
كل حب دونه يذل صاحبه وحبه يعز
فهل نرتضي الذل بدلا عن العز؟؟؟؟؟؟؟؟؟

تامر علي يقول...

صبرني يارب

نشكر عضة الكلب انها لفتت انتباهك :)

وبلاش الوش المكفهر ...الهدنة لسه ما خلصتش :)

تحياتي

تامر علي يقول...

غير معرف

لكل مقام مقال ... وهذا النوع من الحب يستوجب إفراد المقام بالكامل له وعدم الحديث عنه في معرض أنواع أخرى من الحب بها من الهزل والخبال وما سواها ما به

وسنفرد لها مقام البسط ان شاء الله لاحقاً

غير معرف يقول...

تامر:

الجزء الثاني مفهوم
اللهجة واضحة و جميلة :)

مجرد مدونة يقول...

:)

حاسوباتيه يقول...

هههههههههههههههههه لا مش ممكن حضرتك جبت الكلام ده من فين انا طبعا قولت رحم الله امرئ عرف قدر نفسه ونزلت للنص التاني فورا بصراحه بجد فظيع هههههههه فعلا ده الحب ولا بلاش بالزات المحشي

تامر علي يقول...

محمود عبدالله

أسعدنا مرورك الكريم
ودمت بخير

تامر علي يقول...

حاسوباتيه

فعلاً في علاقه قويه بين الحب والمحشي :)

شكراً لمروك الكريم

تمنياتي بدوام العافية

MaNoOoSh يقول...

الاحلى من النص الاول والنص التانى العنوان التحفة "حبيب هارتى"
بس بجد عجبنى الجزء الاول وكمان شرحك لجملة أوله هزل وأخره جد فى التعليقات
لكن دة ميمنعش انى لسة مكلتش شنجوتش الشاورمة
ولو مفيش شاورمة ممكن ناكل سدء عادى مش هنختلف يعنى
واذا كان على الحاجة الساقعة بلاها أزوزة هات عصير احسن

تامر علي يقول...

العنوان ده أنا مقتبسه من واحد صاحبي حبوب جداً كل ما يشوفني يزعق ويقول "حبيب هارتي" فأنا اقتبست العنوان منه :)

أما عن السنجوشتات فالحمدلله الشاورما وصلت وكمان في شارومة فراخ لو عايزين

semsem يقول...

حرامممممممممم
بجد طويل جدا بس ممتع

دمت بكل خير

تامر علي يقول...

أنا عارف انه طويل علشان كده قسمته نصين :)

على العموم سيراعى ذلك مستقبلاً ان شاءالله

فتــافيت (رحاب الخضري) يقول...

هع هع هووووووووووع

ايه بس ده.. ابتديت درس لغة عربية فصحى وابن حزم
علشان في الاخر الاقي صابعين محشي

بوست يجنن والله بجد حلو اوووووووووووووووووي

تسلم ايديك .. ويسلم الكلب والقطة والمحشي كمان

جامد اخر حاجة

فتــافيت (رحاب الخضري) يقول...

بس انت جيت تدلو بدلوك.. فلاقيت بدل الدلو .. بااااااانيو كبير روكنه وجاكوزي.. عاااااااا

تامر علي يقول...

فتافيت

طبعاً لازم نعمل صدمة حضارية للقارىء علشان يتفاعل مع الأحماض المركبة :)

وبعدين فين الرواية علشان نشركها "قصدي ننقدها"

Beram ElMasry يقول...

الاخ العزيز . تامر علي
السلام عليكم ورحمة الله وبركاته
لكن السكوت مش حل للأسف
صدقت عزيزى الغالى ، انما يشق على النفس ان لا تجد حياة لمن تنادى
لك تحياتى والسلام عليكم ، ولا سلام مع اليهود

رحلتنا في الحياة يقول...

ههههههه والله امتعتنا بالجزء الاول وفكرتنى بايام الجامعة ومحاضرات الادب اللى كنت بحبها جدا

ويمكن ده التطور الطبيعى للحب فى زمن العجايب وا فى الزمن ده فى حاجة اسمها حب دى حاجة اسمها ضحك على الدقون

بـِصَمتـِـ أميرة ــــى يقول...

كدة يافندم تنقل من اللغة العربيه وكفة الميزان العاليه دى للكفة التاتنية وقعتنى من الجبل ياتامر
طب كنت مهد شوية
اعمل اى نداء عاجل فى المنتصف
ههههههههه
عمة ابن حزم هو الوصف الرومانتيكى
وعضة الكلب ..ههههه هى الوصف الرومانطيقى - انت هايل والله
سأعود بعد أن أنتهى من ابحارى فى مدونتك
تقبل مرورى
ملكة بحجابى

شمس النهار يقول...

بصراحه جهد كبير اوي في الجزء الاول مشكور عليه اجزء جميل جدا به كم من المعلومات لطيف
اما الجزء المبدع التاني انت بصراحه بدعت فيه جامد انا ضحكت جدا جدا تسلم ايدك

تامر علي يقول...

أ/ Beram ElMasry

دائماً الأمل لاينقطع طالما هناك إيمان وعلى رأي المثل
لايأس مع الحياة ولا حياة لمن تنادي :)

تامر علي يقول...

ايوشة

والله دائماً لايعدم الناس وجود أشخاص صالحين في كل شيء لكن العبرة بالأعم الأغلب وكلامك صحيح :)

تامر علي يقول...

ملكة بحجابى

لازم يكون بعد أي وجبة دسمة شوية نـأنأه:)

شكراً لمرورك العذب

تامر علي يقول...

شمس النهار

الجزءين مكملين لبعض علشان واحد بيعبر عن حال الإنسان اللي بيحب والتاني بيعبر عن الإنسان اللي بيعب :)

دمت بخير

Tamer Diab يقول...

جاااااااااامد وسمعني سلام القطة
يا مدندشة قطتك والدندشة غيه
أحب انا قصتك ياريتني شمسية

انا بصراحه بقيت اطبق حاجة واحدة بس
اغنيه عمر دياب

قالي الوداع ... قلت أشطة أوي

تامر علي يقول...

د.توكل مسعود

ليست المشكلة في الإسم!!! حتى لو كان اسمه حجاب "صهيوني " ومطابق لصفة الحجاب في شرعنا لامانع من ارتداؤه ... لكن المشكلة اننا نفقه شرعنا أصلاً :)

شكراً للمرور الكريم

تامر علي يقول...

Tamer Diab

ياأهلاً يا أهلاً ...احنا سايبينك بس علشان فرحة رجوع الدكتور انما بعد شوية هنهجم عليك :)

حلوة قوي "يا مدندشة قطتك " أول مرة اسمعها هاضيفها للقاموس المحيط :)

بنت الغربة يقول...

النص التانى احلى مييييييت مره من الاولانى....
بجد عسل قوى قوى قوى...
بس الشاعر اللى قال
باعترف انت غلطه فى حياتى ....
باعترف انت أسوأ ذكرياتى .....
ده كان لازم يدخل فى الموضوع...
تحياتى ليك

تامر علي يقول...

بنت الغربة

شكراً لحضرتك :) لكن لو قرأتي النص الأول بتمعن اكتر هتلاقيه أحسن بكتييير:)

بالنسبة لقول الشاعر اللي قلتي عليه فهو غلطان فعلاً إنه مدخلش مع إني سايب الباب مفتوح إيه اللي موقفه بره؟:)

فتــافيت (رحاب الخضري) يقول...

كده يا تامر في وشي كلامي بقى زي .. صنية جلاش؟؟!!!!
:(((((

طيب بيني وبينك مش قصاد الناس كده

ههههههههههههههههههه

يلا جلاش جلاش .. حد لاقي بس المهم يكون بالجبنة لو حادق وبالكستر لو مسكر

لن انسى لك هذا الموقف يا عز الدين

تامر علي يقول...

فتافيت

:((((

مين قال كده ؟؟؟؟ دي قصيدة رائعة أنا بس افتكرت الموقف :)

۩ Nour ۩ يقول...

تقسيم البوست يطابق تقسيم العنوان...

فى البدايه كانت اللغه العربية مصاحبه لانغام مع عزف بعضا من الموسيقه البياتى لتليق بالالفاظ..

وفجأه!!

بدون سابق انذار تم هجوم الهارتى..


ولكن فى المجمل الحب صداع كونى وكلنا يمر بالصداع..


دمت بخير..