الجمعة، يناير 30، 2009

العبر والدروس في أصول البحث عن العريس والعروس


بعد النصر في غزة .... وبرغم كل المرارات والأحزان على ماتم تخريبة من أرض ومن قتل من الشهداء الذين نحتسبهم عند الله أحياء يرزقون .... وبينما أنا غارق في أفكاري عن غزة ... قفز الى ساحتي شاب أعرفه معرفة بسيطه ولكنها طويلة وطلب مني أن أساعده في البحث عن عروس وبينما نحن نتكلم دار بيننا الحوار التالي ...الذي أعدت صياغته بطريقتي ولكن المحتوى متقارب الى حد كبير.... وقد أخرجني هذا الشاب من الحالة المزاجية السيئة لبعض الوقت . واليكم ما كان بيننا
(1)
كنت قد أوقفت النشاط الإنساني الاجتماعي منذ أن (منّ) الله على بنعمة الزواج لأتفرغ لحالة الانبساط المزاجي الذي أعيشه ..... ثم جاءني أحد الأصدقاء يطلب مني أن أساعده في البحث عن عروس مناسبة لأنه قد قرر الزواج وأعد له العدة.... فقلت له:
" أنه قد فات الأوان وأنني قد أغلقت الدكان.... فألح في الطلب واسترسل في الكلام حتى أصابني الصداع والزكام .... فقلت له خلاص سأفتح لك الدكان على أن تكون هذه هي المرة الأخيرة ولا تكلمني في هذا الموضوع بعدها فقال ...(تمام)..
قلت له قل لي مواصفات العروس التي تريدها أيها الغندور.... فأشاح بوجهه في الآفاق وتنهد وسرح ثم استفاق .... وقال بصوت خفيض... ظننت معه أن روحه سوف تفيض.....
-أريدها بيضاء ..... شقراء.... هيفاء....شديدة الحياء.... متقدة الفطنة وشديدة الذكاء.... يداها ملساء... عيناها حوراء ... شفتاها حمراء ... تعشق الطبخ وتجيد القلي الشواء
ترضي بالقليل.... ولديها الكثير ..... وشعرها غزير... وأنفها صغير ... .... وقلبها كبير ... وعلمها وفير .... ووالدها (سفير)
إن (فسّحتها) شكرت .... وإن حبستها صبرت ... وإن حلفت عليها (بالطلاق) برّت ...إن سألتها عن شيء (قرّت)... وإن دغدغت مشاعرها بدبوس (خرّت) ....
تفهمني بلا كلام .... تعيش في سلام ... كالبط والحمام.... وتعطيني الزمام ... وتسمع الكلام... وتصيبها (ذبحة) إن أصابني الزكام.
لذيذة الطبيخ ... لا تمل منّي الصريخ ... كلامها بطعم البطيخ....
(لهلوبة) في شغل البيت .... ولا تستهلك الكثير من الزيت ... وتحبني ولو ملّيت
من عائلة عريقة ..... في مشيها رشيقة .... خفيفة عفيفة.... لا تكلفني (تعريفة)
صوّامة قوّامة كالمؤمنات .... طروب لعوب كالراقصات ... وليس في قاموسها كلمة (هات)
- تركته (يهذي) وسرحت بخيالي .... لقد ذكرني هذا (المعتوه) بمقولة طريفة تقول:
(قال رجل من الحمقى لنخاس: اطلب لي حماراً ليس بالكبير المشتَهَر ولا القصير المُحتَقَر.. لا يُقدِم تَقَحُّماً ولا يُحجِمُ تبلُّدا..ً يتجنّبُ بي الزحام والرجام والآكام.. خفيف اللجام ..إذا ركبته هام وإذا ركبه غيري قام.. إن علفته شكر وإن أجعته صبر.. قال النخاس اصبر حتى إذا مَسخ الله القاضي حماراً رجوت أن أُصيب لك حاجتك إن شاء الله )
أفقت من غفوتي على يده (تنغزني) في كتفي وهو يقول في حدة ..
أنا أكلمك في أدق وأخطر قراراتي وأنت سرحان ؟
قلت له لم أسرح ولكن كنت أفكر في العروس المناسبة ... ولكن ما هي مواصفاتك أنت حتى نعرضها على العروس المرتقبة .... طبعاً دعك من الشكل (خلقة ربنا شريفة طبعاً ) والراجل مايعيبوش غير جيب التمام .... بس المواصفات برضه علشان البنت تفرح .
قال وقد نفخ صدره .... وغلق عينيه ليعلي قدره ....
قل لهم أنني حاصل على الدبلوم الصناعي ... ولدي شقة 50 متراً على الطريق الزراعي... كما أنني من عائلة (مبسوطة).... ولدينا فدان مزروع (بالقوطة) .... ويكفي أنهم يشترون راجل يربي عيالها ..... فإن قدر لها الزواج بي فأمها (داعيالها).... حيث أنني ظريف لطيف .... ويقول أصدقائي بأن دمي (خفيف)
قلت ولم أعد أطيق صبراً على هذا (الحلوف) .... أسمع أيها الشبيه بالخروف .... أن رضيت بك خادمة أو ابنة البواب .... فلتتقدم وتقبل عتبة الأبواب ... فعلام تطلب كل هذه الصفات ... وأنت تبدو وكأنك نوع من الحيوانات .... فاخرج فقد نفذ عليك صبري ... وإن رضيت بك (كلبة ) ابقى (___) على قبري .
- قال وقد هاله الجواب ... (ليه كده بس) يا خير الأصحاب .... افعل ما تراه الحق والصواب .... ولا ترميني رمية (الكلاب) .
- قلت له ... دع الأمر لي .... وما امليه عليك فلا تناقشني (فيه) .... وانطلق وهو لايلوي على شيء على وعد بالإتصال إن وجدت له (شيء)..... تنهدت ووقفت أمام الدكان .... وقلت والله زمان .... لايزال هناك حمقى في هذا الزمان .
ثم بدأت رحلة البحث عن العروس ..... والتي تبعها حرب (ضروس) .....

هناك 38 تعليقًا:

سمكه واحده يقول...

هههههههههه
تحفه
المشكله ان العريس او العروسه ليهم موصفات عجيبه وغريبه او واحده تطلب موصفات عجيبه ومش بتبص لنفسها وهي يارتري فيها ايه
وبردو العريس يطلب موصفهات عجيبه ومبصش لنفسه هو في ايه يتوافق عليه
القصد بلا هم قطيع تقطع الجواز وسنينه
عندكش عريس يكون قلبه قلب خسايه
تحياتي

تامر علي يقول...

فعلاً .... كل واحد بيفكر هياخد مين وايه ومحدش بيفكر فيما سيحصل عليه الطرف الآخر في النهايه.
الخس خلص في كرنب ممكن لو ماتاكلش يتحشي :)

شكراً لمرورك الجميل

أميرة الجنة يقول...

السلام عليكم
بوست روعة
بس دور للراجل على عروسة يمكن تلاقى بعد عمرطويل ان شاء الله
بس انت قولى على مكان الدكان علشان اجيلك اقولك على مواصفاتى اللى عايزاها فى العريس
تقبل تحياتى

حاسوباتيه يقول...

هههههههههه كويس قولت كل الي في نفسي ممكن اقوله لشخص زي ده بوست جميل تحياتي ليك

تامر علي يقول...

أ/أميرة الجنة

طبعاً أنا بادورله ولو لقيتلة (حاجه) شبهه كده يبقى كويس :)
الدكان ميتوهش خالص تاني شارع يمين جنب الحلاق :)

شكراً لك

تامر علي يقول...

أ/حاسوباتيه

اللي انا كاتبه شويه جنب اللي قولتهوله فعلاً :)

تقبلي شكري وتحياتي

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

خادم الدعوة يقول...

ياااااااااااااااااااااااااه ايه ده كله ياحبيبى أنصحك وانت بتدور دور على واحدة فيها صفة واحدة من الصفات دى واذا لقيت واحدة فيها صفتين مع بعض تبقى بصراحة سوبر مان وعالعموم فكر صاحبك الغريب ده بسنة النبى صلى الله عليه وسلم ( فاظفر بذات الدين تربت يداك ) وإلا فإنه إما أن يكمل باقى عمره أعزبا أو يدعو الله أن يرزقه من الحور العين

الازهرى يقول...

تصدق بالله
انا اول ما بدأت قرااءة افتكرت المثال المذكور تمام
من احد مشاكلنا التى نواجهها ان الكل يبحث عن المثالية فيما يطلب حتى وان كان هو لا يحوى من تلك المثالية شىء
رحم الله بشار حين قال
ثم انك ان طلبت مكملا رمت الشطط

تحياتى دوما

تامر علي يقول...

أ/ خادم الدعوة
طبعاً هو منشن على الحور العين برضه زي كل الرجاله ... بس عاوز حاجه كده تصبيره لحد ما السر الالهي يطلع .... وبعدين هو برضه طلب من ضمن الصفات أن تكون صوامة قوامة كمان .
تحياتي لك :)

تامر علي يقول...

أ/ الازهري
(على فكرة أنا كمان أزهري :)

أعتقد إن دي صورة من صور الطمع الإنساني المركب في كل منا ... فكل منا يريد الكمال فيما سيحصل عليه ... بغض النظر عما سيعطيه أو المجهود الذي سيبذله.
شكراً للمشاركة :)

ahmed saker يقول...

السلام عليكم.....
الموضوع ده بصراحة جامد جدا جدا جدا

بص بصراحة انا ما اعتقدش ان فيه واحد بالغباء اللي يخليه يطلب واحدة بالمواصفات دي كلها ، حتى ان بعض هذه الصفات متناقض مع البعض الاخر

عموما لو وجدت عروسة لهذا الرجل بهذه المواصفات فرجاء اخطبلي اختها

دمت بخير

تامر علي يقول...

والله يا بوحميد في ناس كتير بالغباء ده وأكتر كتير (لما تيجي تتجوز هاتشوف :) )

وعلى العموم عروستك عندي بس ناتقولش أي.

mahasen saber يقول...

هو يتجوز سوبروومن وهيا تتجوز سوبر مان

ويخلفوا خوارق

انا حرة يقول...

استمتعت جدا بالموضوع بجد مبتكر اوى :)
انا لو منك كنت قلتله انه يستاهل احسن من كده و ان ربنا اكيد شايله البنت اللى بمواصفات تتناسب مع امكانياته المادية و المعنوية الرهيييبة دى و اقنعه انه يستناها و ما يرضاش باقل منها..و يدينا و يديه طولة العمر :D

تامر علي يقول...

أ/محاسن

والله بالطريقة دي مش هايخلفوا خالص

تامر علي يقول...

انا حره

على فكرة الفكرة دي موجوده عند كتير .. يعني بيفكر ان اكيد ربنا شايله حاجه جامدة جداً ويفضل يدور لحد ما يلبس في الحيط
شكراً على مرورك

ستيته حسب الله الحمش يقول...

أول مرة ازور مدونتك
انت كنت فين
جبت النثر التحفه ده منين؟ انت اتحطيت في البنر عندي
وياريت اعرف نهاية قصة المتعوس اتجوز ايه؟

بس والله ده تجميع لجميع طلبات الرجالة المشكلة ان ده ياباني اصلي ومفيش دلوقتي غير صيني وتايواني .. اللي مش عاجبه يستورد

أحــوال الهـوي يقول...

طبعا كلام جميل و حدوته علي طريقة الف ليله و ليله من ظريف القريحه و خفيف الدم و صاحب دكان الريشه و القلم

انا لقيت له عروسه فيها كل المواصفات

تمثال .... جميل يتوسم فيه كل اللي يبغيه

تحياتي

زوجه يقول...

السلام عليكم
بصراحه والصراحه راحه
حضرتك قولت كل اللي في نفسي
لاني كنت لسه هنزل بوست بخصوص الموضوع ده
اصل انا متغااااااااااااظه جدا
كل واحد شايف نفسه شويه يقولك عايز واحده حلوووووووووووه وبيضضضضضضه ورفيعه
هو ده مقياس الزواج
حلوه وبيضه ورفيعه
طب رفيعه وماشي نقدر نعملها
طيب بيضه وجميله ديه البنت تعمل فيها ايه بقي
لاحول ولا قوة إلا بالله
وسبحان الله تلقي اللي طالب كده ده معقد من شكله وعايز يعوض مركبات النقص اللي عنده
يارب طلعنا من الدنيا ديه علي خير

Tamer Diab يقول...

كنت هموت من الضحك
وبوست رائع يا باشا
وتقبلي زيارتي الأولي

تامر علي يقول...

أ/ ستيته حسب الله الحمش

والله ده لاياباني ولا حاجه ده خرافي وحتى لو استورد لايمكن يجيب المواصفات دي... دي كده فول اوبشن .... أهم ما في الموضوع انه شايف إنه يستاهل أكتر من كده شويتين :)

شكراً لتشريفك بالزيارة

تامر علي يقول...

أ/ أحــوال الهـوي

شكراً على ذوقك الراقي في اختيار الكلمات .... لكن هو لو اختار التمثال سيتحول تمثاله إلى صنم لأنه سيكون من صنع أفكاره ولا وجود له على أرض الواقع
تحياتي

تامر علي يقول...

زوجه

هو مش مركب نقص أكتر منه طمع ورغبة في الحصول على كل شيء ... حتى لو لم يكن لديه المقابل المناسب .... بس ولا يهمك أنا هالبسه في الحيط :)

تامر علي يقول...

أ/ Tamer Diab

شكراً لمرورك الكريم ونتعشم ألا نكون أصبناك بالملل :)

لك كل الاحترام والتقدير (علشان اسمك تامر):)

فتافيت يقول...

الله ينور عليك بجد .. انت جبت له الخلاصة فعلا
ده راجل غريب بجد.. قال دبلوم صنايع وعايز علمها وافير.. فدنين قوطاة وعايزها عندها كتير

بس انت كتبتك اسلوبها روعة وحلوة اوي
وامنه لو قابلت الراجل ده تانية .. اضربه باي حاجة في وشه وقوله مبعوثة لك من فتافيت

سلام عليكم

أحــوال الهـوي يقول...

هذا بالضبط ما قصدته

فمواصفته لن يجدها الا في صنم

تحياتي

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

تامر علي يقول...

فتافيت

انا بصراحه بقابله كتير بس مش هاقدر اضربه علشان مااترفدش من الشغل :)
بس ممكن نحاول نعقله ... وبعدين هو هيلاقي حتفه ... قصدي نصيبه لما يتجوز وهايعرف أد ايه كان غلطان:)

صبرني يارب يقول...

ههههههههههههههههههههههههههههههههههههههه

على فكره موتني من الضحك عشان بجد بجد انا بقى ياعم لسه الدكان عندي مفتوح

شوف بقى كل ما حد يشوف خلقتي الكريمه على النت
لا لا مش خلقتي يعنى اسمي الكريم

الا ويقولي شوفيلى عروسه مش عارفه ليه تقريبا عندي مقومات الخاطبه

ولا سيما لو قلت انى من ا لمنصوره يلبدوا فى قفايا اكتر واكتر

وبجد بجد بيعملوا زي الاخ ده تماااااااااما

تلاقينى حابسه الكلام فى زوري بالعافيه قبل ما انفجر واقوله زي الى انت قلته ده بالظببببببببببط

حاجه تعلللللللللللللللل

تحياتي لك

وبعدين مش تقول انك مش غريب على الاسره التدوينه ده موني حبييييبتى وزميلة كفاح المطابخ

تحياتي لك على البوست الرائع فعلاااااااا

والى مش بس يضحك لا وبيعبر فعلا عن مشكله انا نفسي اتكلم فيها

غير معرف يقول...

طمورة باشا بجد انا مش عارف ابدأ منين ولا منين بس بجد جميلة وتحفة و...و...و...و...و....... واحب اقوللك ان الراجل بيحب يكثر من هذه المواصفات عل وعسى يلاقيها وتحصل المعجزة واما لو لقى واحدة فيها صفتين من دول بجد تبقى امه دعياله واكيد هيكونوا (لعوب وتجيد الرقص) نشكرك على المدونة وتقبل تحياتى

تامر علي يقول...

صبرني يارب

المدهش في الموضوع إن أنا مش عارف الأزمة في العرايس ولا في العرسان .بس في أزمة بجد ...
يعني احنا بلديات من المنصورة كويس هانحتل المدونات ونمنصرها قريب ...
شكراً لمرورك الكريم

تامر علي يقول...

عم الغير معروف

........اللكنة دي مش غريبة عليا ... هاجيبك واعرفك :)
عموماً أي خدعة :)

د/عرفه يقول...

السلام عليكم
دى اول زياره ليا هنا
ويارب تاخد بالك من تعليقى على الموضوع القديم ده
انا شوفت مدونتك من زمان تامر بس بصراحه اول ما دخلت المدونه الخلفيه اللى انت حاططها زغللت عينى شويه ومكنتش عارف اقرا براحتى شويه
وبعدين لما لقيت فتافيت رشحت موضوعك انه يكون احسن موضوع
قولت لازم اتعب عينى شويه واقرا الموضوع وبصراحه موضوع جميل جدا جدا
وربنا يسهل ونقدر نتابع مواضيعك كلها تحياتى

عمك ياض يقول...

هههههههههههههههههههههههههههههههه
ظريفه اوي التدوينه ماشاء الله

وهو عامل ايه دلوقتي ؟ :D

تامر علي يقول...

د/عرفه

شكراً لك وسيراعى ذلك مستقبلاً

:)

تامر علي يقول...

عمك ياض

والله هو لسه معنس طبعاً :)

تحياتي :)