السبت، سبتمبر 18، 2010

الإجابات الزاخرة على التاجات الفاخرة




تم تمرير تاج لشخصنا المتواضع من الاستاذة الدكتورة (ستيتة حسب الله الحمش ) أطال الله بقائها وعمّر بالأفراح دارها  , يسأل أسئلة ثقافية لكل صاحب دماغ "مهوية" وينتظر الإجابات اللدنية من طبقات الدماغ "التحتانية" وبما أنني لا أستطيع رفض طلب للدكتورة 
فسوف أشرع في الإجابات وأفرك "البنورة المسحورة "فهيا إلى التاج  متعكم الله بأكل لحم النعاج

 ما هي كتب الطفولة التي بقيت عالقة في ذاكرتك؟ -   

من الكتب المدرسية كتاب القراءة (بتاع أمل وعمر) وبخاصة موضوع طق طق صوت باب الحظيرة لاحتوائة على الساسبنس والمتعة والاثارة والأحداث التاريخية الشيقة  ومن المجلات تان تان وميكي وسمير وشهير وبهير وباتمان وسوبر مان وابراهيم سيلي  مان أما أشد ما أثر في (بجد بقه ) فهي مجلة العربي الكويتية لأن أمي (ربنا يخليها زخراً لنا في الدنيا والآخرة ) كانت من متابعيها منذ العدد الأول وكانت تشتري أكثر من نسخة وكانت هذه المجلة في عصورها الأولى غنية جداً جداً بالثقافة والعلوم والآداب من شعر وقصة واستطلاعات مصورة ومقالات ومنها تعرفت منذ المرحلة الإبتدائية على كبار الكتاب وآخر الأبحاث العلمية والفكرية ورغم الاتجاه العلماني الواضح في اتجاهات المجلة إلا أنها كانت في بدايات الاتجاهات العلمانية التي تعاملت مع الدين بدون نقد بل أحياناً بشكل علمي وسطي أدت لتوازن فكري في شخصيتي (المستنيرة جداً جداً لدرجة تفوق كل اللمض النيون والنايلون واللمض الموفرة كذلك والمتواضعة جداً كما هو واضح في آن واحد  في هذا الوقت من الزمان) مع المواد الدينية الأخرى التي كنا ندرسها بالأزهر الشريف (سابقاً ) الخفيف (حالياً ) ال .... (مستقبلاً)  بس يعني  ..  غير كده مش فاكر والله اصل انا كنت صغير ساعتها على فكرة ومش بفتكر حاجات كتير يعني 


 مَنْ أهم الكتاب الذين قرأتَ لهم ؟

أهم الكتاب في تلك الفترة العصيبة هم كتاب مجلة ميكي وسمير وباتمان وكلها طبعاً مترجمة عن النسخ الغربية لكتاب من الفرنجة (الجزم)وأنا لا أدري أيّاً من هذه الأسماء في واقع الأمر بالإضافة لكتاب مجلة العربي وكان يكتب بها في هذا الوقت جملة من (أجدع ) الكتاب مثل فهمي هويدي ود.أحمد زكي وأحمد بهاء الدين و د. أحمد كمال أبوالمجد ويوسف القعيد ويوسف ادريس في القصة ومنها تعرفت على القصة التي جعلتي أقرر أن أكتب قصص قصيرة فيما بعد وهي لمؤبف تركي اسمه عزيز نسين والقصة اسمها العقدة (جامده جدي ) لو حد فكرني ممكن ابقى انشرها بالاضافة لفتحي السعيد وفاروق شوشة في الشعر وبالاضافة لناس جامدين  تانيين من الوطن العربي مش فاكر منهم
غير قليل مش هقول اسمهم برضو غتاته

 من هم الكتاب الذين قررت ألا تقرأ لهم مجددا؟

ده وأنا صغير يعني ولا لما كبرت ؟؟ اللي انا قررت ألا أقرأ لهم مجدداً وأنا صغير هم مؤلفو كل الكتب الدراسية حيث ساهموا بنصيب الأسد في بناء كل مخزون الغباء الانساني الذي أتمتع به حتى يومنا هذا 
أما بعد المشيب وبلوغ سن (الفيل) اللي انا فيه حالياً فلايوجد كاتب قررت ألا أقرأ له تحديداً لأنني بالفعل لا أقرأ إلا بالانتخاب الجيد للكتاب فليس عندي متسع من الوقت لقراءة زبالات أفكار البشر اللهم إلا لو قرأت للنقد والإطلاع على فساد ما وهي قراءة لاتعتبر كالقراءة

في صحراء قاحلة ، أي الكتب تحمل معك؟

أكيد هبقى مفرهد ومفياش نفس اشيل أي حاجه خالص وحالتي بالبلا لكن إن كان ولابد ممكن آخد مصحف صغير من أبو سوسته على اعتبار ما خف حمله وارتفع قدره

ما هو الكاتب الذي لم تقرأ له أبدا ، وتتمنى قراءة كتبه ؟ 


والله كتير .. على المستوى القراءة الدينية لم أقرأ لبديع الزمان النورسي ولا أبو الأعلى المودودي على الرغم من تعرفي على أفكارهم من آخرين وعلى مستوى القراءة الأدبية أنا مقصّر في قرأة الأعمال النسائية اللهم إلا لأحلام مستغانمي وفرجينيا وولف مع أني قرأت نماذج من كتابات جديرة بالقراءة وعلى المستوى السياسي أريد أن أقرأ بشدة مذكرات القواد المشاهير في العالم والقواد مثل روميل ومونتجمري وكارتر ولكن حتى الآن لم أفعل

ما هي قائمة كتبك المفضلة ؟

على اي مستوى بالضبط ؟  
كتير أكيد فعلى المستوى الأدبي أحب جداً الكلاسيكيات ككليلة ودمنه وألف ليلة والامتاع والمؤانسة وغيرهم كتير وفي الشعر القديم أشعار المتنبي طبعاً وجرير والفرزدق وطرفه (وكده يعني ) والحديث أحمد مطر وفاروق جويدة وعشماوي وفاروق شوشه وقبلهم شوقي وجيل الستينات طبعاً 
وعلى المستوى الديني كتير أوي في القديم كتب أصول الفقه لايعلى عليها في الوصول لنشوة الإمتاع العقلي بالفهم الحقيقي لجوهر الأشياء ولكن لايمكن إدراكها للأسف  إلا بمشقة شديدة مثل كتاب الرسالة للشافعي وكتاب الإحكام لابن حزم والأشباه والنظائر للسيوطي والمحصول للرازي وعلى المستوى العام كتاب دع القلق وابدأ الحياة  وكيف تكسب الأصدقاء وتؤثر في الناس لكارنيجي استفدت منهم الكثير وطبعاً بعض مؤلفات شكسبير وبعض كلاسيكيات الروايات العالمية مثل دوريان جراي والعجوز والبحر واوليفر تويست لديكنز والبؤساء لهوجو وطبعاً كل مؤلفات تشيكوف وتولوستوي وأكيد نسيت كلاسيكيات كتير جداً بس السؤال واسع (طحن) جداً :)

ما هي الكتب التي تقرؤها الآن ؟

معايا كتاب أركان القصة ورواية ذات لصنع الله ابراهيم قديمة بس مكنتش قرأتها وببص في كتاب الإحكام 

اللي بعت الدعوه ؟
الاستاذة الكريمة د.ستيتة التي لايمكن ارفصلها طلب :)أبداً 

أرسل الدعوة لمدون واحد علي الأقل من أجل مشاركتنا باطلاعهم في القراءة




الحقيقة لو مكانش جايلي من د ستيتة كنت رجعتهولها تاني لكن انا هرسل الدعوة لأشخاص غالباً مش هيعرفوا بيها وبكده أكون أرحت واسترحت
مدونة خواطر شابة حيث أنها في فترة بيات تدويني
مدونة فشكول دوت كوم حيث أنه بقاله زمان مش شايفينه
مدونة ومضات حيث دكتور ياسر الغائب الغائب
مدونة طعم البيوت حيث مستر بدراوي عاوزين نسمع صوته
مدونة فتافيت ربع قرن حيث أنها غالباً مش في مود التدوين
مدونة المتبهدلون في الأرض حيث أني عاوز أبهدله كمان شويه
مدونة أستاذ فركشاوي حيث أنه مخاصمنا
مدونة بنات أفكاري حيث أنها في صومعة تدوينية متقوقعة في شكل شرنقة

وبكده يكون اللي اتعمل فينا عملناه في الناس
وإلى لقاء قريب في "خريف المدونين"حيث نناقش أسباب عزوف المدونين عن التدوين بعد فترة لأنها أصبحت ظاهرة متكررة

تشكرات
  

هناك 18 تعليقًا:

مجرد مدونة يقول...

ياااه ما شاء الله حلو اوى التاج اللى مليان كتب وكُتّاب ده :)
بجد أثرت شجونى ما شاء الله
ربنا يكرمك وتعرف تقرأ اللى كان نفسك تقرأه وتستفيد منه يا رب اللهم علمنا ما ينفعنا وانفعناا بما علمتنا
تسلم يا غالى

تامر علي يقول...

خلاص بدال عجبك ياريت تتكرم علينا مشكوراً وتجاوب عليه انت كمان :)

في انتظارك

ستيتة حسب الله الحمش يقول...

ايوه كده يا عم
وريهم الثقافة
ايه جايين لستيتة الشهيرة بتويتي وبوكيمون ويقولوا لها ثقافة؟ :)

متنساش تنزل العقدة الجامدة "جدي"
لازم نطلع عليها طالما تعرف تنزلها
ده غير انك تدينا رأيك في ذات صنع الله ابراهيم علشان انا كمان مقرتهاش رغم انهم بيقولوا جامدة "طحن" :)

مشكرين يا باشا على الإستجابة وتعبناك
ومبروك كي جي وان واللانش بوكس الباربي والمقلمة الباربي والقلم الرصاص الباربي

شمس النهار يقول...

عرفت انك بتحب القرايه ومش اي قرايه

ماشاء الله

وفعلا ياريت الناس اللي سابت التدوين واكيد عندهم اسباب
يرجعوا بعد مايحلوا الاسباب دي
ولو مش عارفين يقولوا واحنا نساعدهم

بس مش كتاب المطالعه المدرسيه كان عادل وسعاد يزرعوا الفول
لحد ماالفول كبس علي دماااغ الجيل كله

هو عادل تعب من الزراعه خلوه عمر والا ايه

:))

تحياتي

خواطر شابة يقول...

سعيدة بالتعرف على مكتبتك شاركتك بالقراءة فترة طفولتي لمجلة العربي لان والدي رحمه الله كان من قراءها وفعلا كانت منوعة وفيها من كل فن طرف
شكرا على الاهداء لكنني سبقتك للاجابة عنه منذ فترة
انا في فترة بيات تدويني فعلا لكنه بيات عن الكتابة في مدونتي لكن التواصل معكم اكيد انا موجودة ومتواجدة ويسعدني التواصل معكم
انتظر بشوق موضوع خريف المدونين عله يكون سبيلي للخروج من الحالة التي أنا فيها
دمت بكل الود

د. ياسر عمر عبد الفتاح يقول...

إيه يا عم الثئافة دي كلها
كل دي كتب قريتها

أنا قلت برضه الدماغ المتكلفة دي أكيد وراها أكوام من أروق الكتب الصفراء منها والبيضاء

برضه لبست أنا في التاج
بص أنا هقولك ,, موعدكش
يعني لو الغزالة رايقة معايا هجاوب
لو مراقتش (وده في الغالب اللي هيحصل) هنعمل عبيط ومش هجاوب

وبعدين أنا مش هبقى إضافة مؤثرة يعني بالكتابين اللي قريتهم في حياتي كلها
منهم كمان واحد بتاعك (بلاد ما وراء الحزن)

عمار مطاوع يقول...

تاج رائع

ماشاء الله

بسنت يقول...

واضح ان القراءه من الطفوله ودا شئ لاحظته اللى ماقراش من وهو صغير غالبا مش بيحب القرايه لما يكبر
ولالنسبه لمجله العربى فمازالت زاخره وجميله لاننى مازلت متابعه لها من الصغر ايضا ولكن بشكل متقطع حاليا
والى الامام فى القراءه طبعا لان دا هوايه ليس لها اخر
كل التحيه

فتافيت يقول...

ههههههههههههههه غالبا مش في مود التدوين
يا عمونا ده انا نادرا في مود التدوين
ساعات بحس اني عملة المدونة ديه لايك لايك تخليص حق :))

ايه يا عم الموسوعة ده.. ما شاء الله يعني.. لا تصحى الصبح ناسي كل اللي قريته ^_*

وربنا انا مكسوفة اجاوب بعدك على التاج هايبقى شكلي وحش اوووووي :\

بس هاجاوب وامري لله قهرا وده طمعا في عزومة حمام اتعزمت عليها من سنة ونص ^_^ .. وبما ان الحمام غلي.. فبفكرك بيها.. ويجعل بيوت المحسينين عمار ههههههههههههههههههه

انا راح اجاوب اهو
اوعى وشك بقى
فسسسسسسسسسسسسسسسسسسسسسسسسسس

يــوم جــديد يقول...

من ناحية زاخرة فهي زاخرة وفاخرة ومعبرة ورائعة
قرأت الإجابات أكتر من مرة وكل مرة يلفت انتباهي حاجة لأول مرة :)

جزاها الله خيرا ستيتة إنها أمتعتنا بأبو التجاتيج ده وعايزين من ده كتير

بالنسبة لعزيز نسين أنا قرأت له الذئب أصله خروف ، والناس يستيقظون وعندي قصة (العقدة )
هحطها عندي على المدونة وإن شاء الله تكون هي المقصودة

تامر علي يقول...

ستيتة حسب الله الحمش

ثقافة ايه يا دكتورة " خلي الطابع ملزوق" كلنا ثقافتنا بعد الجواز طبعاً بتتحول إلى توم وجيري ثم تتطور إلى سبونج بوب وأخيراً إلى الفار اللي بيطبخ :)
والعقدة الجامدة جدي هتنزلها "يوم جديد" كما وعدت والا سيتم معاقبتها بالهجوم على مدونتها :)

الله يبارك فيكي ويبارك لك في كل المراحل التعليمية اللي تبعك :) ويرحمنا جميعاً من وزير الداخلية اللي مسكوه التربية والتعليم على ما المكان يفضى

تامر علي يقول...

شمس النهار

عادل وسعاد بقوا عمر وأمل وبعدين اتحالوا كلهم على المعاش وجابوا عمرو دياب وشاكيرا في التعليم ولغوا الدين وحطوا رقص شرقي مكانه :)

ربنا يرحمنا جميعاً :)
منوره دايماً :)

تامر علي يقول...

خواطر شابة
فعلاً مجلة العربي كانت بداية جيدة جداً ومن حسن حظنا انها كانت أول قرائتنا .. معلش التمريرة طلعت اوف سايد :) المرة اللي جاية تيجي جون

ان شاء الله نسعد بوجودك معنا دائماً

تحياتي:)

تامر علي يقول...

د. ياسر عمر عبد الفتاح

والله اضحكتني يا دكتور :) كتابين برضو ؟؟ماشي هعتبرها مساحة تواضع غير مبررة وبالنسبة للتاج أنا نفسي اقراه منك الحقيقه لكن مش عاوز اضايقك طبعاً

على كل حال هغلس عليك من وقت للتاني :)

تامر علي يقول...

عمار مطاوع

انت الاروع وشرفتني بالمرور الكريم

تامر علي يقول...

بسنت

بصراحة العربي دلوقتي مستواها قل كتيير جداً عن زمان وفعلاً الاعتياد على القراءة منذ الصغر بيفرق كتير

شكراً لزيارة المدونه ونرجو دوام التواصل

تحياتي :)

تامر علي يقول...

فتافيت

انتي قلبك "اسمر" قوي :)))))))
لسه فاكره عزومة الحمام ياشيخه ده الحمام طار من ساعتها وشاف له برج على النيل :) بس هنحاول نشوفلك جوز زغاليل تربية صعيدي ولا حاجه :)

طبعاً انا قريت التاج عندك خلاص وانتي غلوشتي عليه ونزلتي بوست كمان علشان الحسد (اللهم لاحسد يعني )
ماشي هنحطها تحت بند التواضع
والى اللقاء في عزومات أخرى :)

تامر علي يقول...

يــوم جــديد

ايه ده !!!! انا كنت فاكر اني انا الوحيد اللي يعرف الراجل ده .. ما شاء الله قراءتك القصصية عالية جداً وعقبالنا زيك كده :)

ونتوجه بالشكر معك للدكتورة ستيته انها اعتبرتنا في عداد المثقفين (مجازاً )

تحياتي :)