الجمعة، مايو 08، 2009

مغامرات منحوس .... في بلاد الهكسوس






* أحداث هذا البوست (غير) حقيقية والشخصيات (ليس) لها أي مدلولات أخرى :)



***************************************************



ولد منحوس كباقي المناحيس .... في بلاد .. فيها الأحلام (كوابيس) .... وترعرع كباقي الناس في( الكواليس) ... وعندما بلغ لسنة (البكالورييس) .... أخذ على عاتقه ككل المتاعيس .... هم البحث وراء المتاريس .... عن لقمة العيش وحلمه.. بأن يكون عريس .
حلم منحوس كثيراً بالعمل وبالمال .... وبأن يحصل على فتاة الأحلام ذات الأخلاق والجمال .... وبأن تتغير أوضاعه وتتبدل الأحوال ... حاملاً هموم الوطن بصبر كصبر الجمال .... ولم يفقد يوماً الأمل بأن هناك (أعمال) .... فقال لنفسه سأعمل ولو في غير المجال .... وسأصبر وأحقق حلمي وإن كان صعب المنال ..... و(سأشتغل ) ولو كانت مهنتي (زبال) ..... وبالفعل حصل منحوس على وظيفة (جرسون) .... على أحد المطاعم في شارع (شامبيليون) .... وبدء رحلة الكفاح ذات الخطى (المليون) .... وكان رافعاً لشعاره

(كله يهون)


وبعد أن مرت به الأوقات .... وفقد شيئاً من العزم والثبات .... ووجد أنه يحرث في الماء ... وأن أحلامه أقرب منها نجوم السماء ..... وعلم أن عمره يضيع من المساء إلى المساء .... وأن ما يجنيه لايساوي ثمن كلبة عرجاء .... قرر منحوس أن يثور على الأوضاع .... وأن ينقذ نفسه من الضياع ..... وقال بصوته الجهوري .... أنا منحوس ملك السباع ..... لا أرضى بالذل وأن أكون مع الصيّاع .... فبلدي تحمل من الخيرات الكثير .... وبها من الكنوز ما يعجز عن حراسته مليون غفير ..... فكيف أضيع عمري في تقديم الطلبات وتحصيل الفواتير .... أنا أولى ببلدي وبخيرها الوفير ..... فقال وبعد كثير من التفكير .... ولكن ما العمل يا أبا المناحيس يا خطير .... نعم ....سأرفع صوتي عالياً وأطلب التغيير ..... سأطلب حقي في العمل والأجر الوفير .... سأدعو الشباب أمثالي وهم مثل الهم (كتير) ..... ونتوجه سوياً إلى ميدان التحرير .... ونضرب عن الحياة في الذل الذي وصل للمناخير ..... ونطالب الحكومات بالتغيير وإلا فالشر المستطير .... وعندها سيرضخ المسؤلين .... ويخصصوا لنا الملايين .... وتبقى العيشة (مانجو وتين ) .



وشرع منحوس في تنفيذ الأفكار .... وظل يردد بين أصحابه طول النهار .... فيما جعله يفكر وهو محتار .... وما توصل إليه من قرار ... وبعد قليل من الوقت وصلت (الإشارة) ..... للقسم التابع له منحوس وأعطوا الأمارة .... وطارت الأنباء بأن هذا الشاب ذو العناد .... يريد أن يهدد أمن البلاد .... وإن هذا لشيء خطير .... ويريد احتلال ميدان التحرير ..... فطار الأمناء ومعهم البوكس .... في إثر منحوس أبو حظ (لوكس) .... وقبل أن ينطق كان أخذ بالبوكس ..... ورموه في شنطة السيارة ..... وكسروا له (شنبر) النظارة .... وأصحابه في دهشة يتفرجون .... وكأنهم في ملعب في انتظار (جون) ...... وذهب منحوس إلى المجهول ..... وهو يحدق في ذهول .



***********************




وبعد ما لاقاه منحوس في الزنزانة .... من الذل والصغار والمهانة .... بدأ التحقيق بالشتم والإهانة .... وانتهى بتوقيع أبو المناحيس القبطان ... على كل الجرائم التي حدثت في هذا الزمان ..... وبعد التأكد من توبته عن المطالبة بالحقوق .... وبعد أن صار جسده بلون البرقوق .... ضربوه على قفاه وألقوه في الطريق ..... فلم يعلم به عدو ولا صديق .... بعد أن صارت هيئته كطائر البطريق .
وبعد أن استعاد منحوس القليل من الحياة .... وبعد أن (فش) الورم الساكن في قفاه .... عاد منحوس الى بلده ومنفاه .... وقرر البحث عن عمل في خارج البلاد ..... ليهرب من قبضة الفقر وظلم العباد



ووجد عملاً حقيراً بألف ريال .... فقبله على الفور بعد قليل من الاستهبال .... وركب الطائرة وقال يا فكيك .... هناك هانفش ريشي زي الديك ..... وسأرتقي في الوظائف وسيعتدل الحال ... وسأكسب الكثير من المال .... وأتزوج وأنجب (قرطة) عيال ..... وبعد عام لمنحوس من الاغتراب .... وغدر الأصحاب وفتك الأحباب .... وتحكمات وسرقات الكفلاء وضربه بالقبقاب .... وجد منحوس أن عيشته قد ازادت هباب على هباب .... وما يشقى به الحمار المخطط .... يأكل به القرد (المنطط) .... ولا يبقى شيئاً للادخار .... ودخل في دوامة القط والفار .... فقرر منحوس السفر البعيد .... الى بلاد كل أيامها كالعيد .


وفر هارباً إلى أوروبا ..... على مركب صيد قائدها يدعى الريس (هوبا) ..... وبعد أن أن أصبحوا في عرض البحار ..... قال لهم الريس (هوبا) يالا يا شطار ..... كلها 3 أيام سباحة وتوصلوا وتبقوا أحرار ..... دي كلها شوية أمتار .... يالا (هوبا) نطوا في البحر يا شباب ...... اخدتم ايه في بلادكم غير العذاب .... بس أوعوا من شرطة المواني ..... خليكم لنص الليل أو بعده بثواني ..... وبعدها عربدوا في أوروبا .... ومتنسوش تدعوا للريس (هوبا) ..... وقام برميهم في الماء .... فلم يعلموا أرضاً من سماء ..... وانقضت عليهم أسماك بحجم الفيل ..... بس حط منحوس وقع في (دارفيل) ..... رماه على الشط في حالة مزرية.... وبينه وبين الهلاك ثانيه ..... وتسلمته شرطة البلاد ورجعته لأم الدنيا .


ورجع منحوس لباباه ومامته يصرفوا عليه ..... وتعلم قعدة القهوة ( اللي عليها بيقولوا له يا بيه) .... وصرف نظر عن أحلام الحرية والزواج والثراء ..... وقال ما أحلاها عيشة من الفناء إلى الفناء ...... وعاش منحوس باقي حياته على القهوة رافعاً شعار
فرقتنا الأيام والليالي ..... وجمعتنا قهوة (أم سالي)
وكان يتنرنم بهذا الموال بين الحين والآخر
***
أنا يا بلادي مش ابنك ؟.... طب ليه سبتيني (اتنفخت)
وليه أنا أسكن في عشة .... والكلب ساكن في يخت
وليه على الكل هاين ..... وللهم شايل وشخت
وليه يا بخت من بين البخوت ...... لبخت

هناك 78 تعليقًا:

MǿиY El-Shreef يقول...

اووووووووووول تعليييييق

ايه الجمال ده وربنا انت فنان

دي تنفع مقامه ع فكره

موتتني من الضحك احيانا

بالذات هنا

وبعد أن (فش) الورم الساكن في قفاه

ههههههههه

مع انها اصلا وراها معنى كبير اوي مش يضحك ابدا

بس هنعمل ايه بقى

بنخلق من كل الم امل ع رأي البت شوشو

يلا بقى سلام قبل ماحد يسبقني

:)

ebn roshd 777 يقول...

وليه أنا أسكن في عشة .... والكلب ساكن في يخت
بالرغم انني شخصيا بفضل من الله مش ساكن في عشه وبرضه مش ساكن في يخت
الا ان تساؤلك ده فكرت فيه كتير اوي اوي
وللان لم اصل لتفسير
انما العجيب والغريب في بلدنا ان اصحاب العلم والنابهين همه اللي عايشين في العشش
واصحاب الذمم الخربه والفاسدين همه اللي
ساكنين في اليخوت
ويا عيني عليك وانتي متوهم انك انتي بس اللي منحوس
طب خد دي
لما تفضل 25 تجد وتجتهد وتوصل الليل بالنهار وتتخرج حكيم طبيب دكتور
وفجاه تلاقي نفسك حمار صدقني حمار

صبرني يارب يقول...

حلو اوي يا تامر بجد

تسلم اديك


بس انا شايه انه اكيد عبيط من الاول والحكايه اصلها مش مجرد حظ

ياما ناس اشتغلوا كل حاجه فى الدنيا وسافروا كتير وقليل وماسابوش حقهم وبرضه الحمد لله نجحوا

احنا من حقنا اننا نعيش محترمين

بس مش من حقنا نقول يا حكومه شغلينا فى الحكومه
عشان يروح الشغل ساعتين وباقي اليوم صايع وبدل ما يبقى عاله على امه يبقى عاله الحكومه الى هى شايله ايدها من كل حاجه اصلا
بالتالي يبقى عاله على المجتمع ككل

ربنا ما بيضيعش تعب وعمل حد ابداااااا
الى ينتج لازم هايلاقي تعبه ده فى يوم بس يخلص النيه لله

واي منحوس فى مصر هو الى نحس نفسه بايده
صحيح الظروف صعبه بس ربنا موجود والشغل والله كتير وموجود
او كان كذلك قبل الازمه دلوقتي قطعت بوشهم

تحياتي لك

ستيتة يقول...

ههههههههههههههههههههههههه

ضحك كالبكاء بس عادي

فبلدي تحمل من الخيرات الكثير .... وبها من الكنوز ما يعجز عن حراسته مليون غفير
---------------------------
عجز عن حراسته 80 مليون ياسيدي

لا الحرامي بيشبع ولا الخيرات بتخلص


قم يا منحوس يابني من عند ام سالي
روح دور تاني وبطل تسالي

وشوف منحوسة هانم بتفرفر ع الجواز
يمكن عندها عشة صفيح من غير أزاز

تخلفوا لينا شوية مناحيس صغيرين
عند بنت أم سالي يقعدوا متيسين

لا الحرامية ها تخلص ولا المناحيس ها تفوق
الحالة ضلمة وكحلة ولازم مدد من فوق


يا عم تامر يا متواضع وكالعادة
مواضيعك واسلوبك حلوين بزيادة

سارة احمد يقول...

ياعيني علي منحوس صدق المثل الي بيقول المنحوس منحوس ولو علق عي راسه فانوس...منحوس دا قصة واحد من وطن المناحيس,الي للشم والمخدرات نازل تهييس ,علشان ينسي حاله ويحطم اماله ويحفظ امانه...لحسن يروح في حديدوميطلعش غير بعد بعيد...الله يكون في عونهم ...وبعيدا عن القصة ولكن فيها نفسي من فترة طويلة نعمل جمعية للشباب نزوجهم ونعمل لهم مشرايع ياكلوا منها عيش حتي لو الواحد حط كل زكاته لفرد واحد بس بعد كده الفرد حيطلع زكاة فناس كتير حتستفاد...بس للاسف الناس بتفتفت الزكاة فمحدش بيكون كامل للاشباع ...سلم ايدك ياتامر

assafo anaroze يقول...

تامر علي
رائع جدا يا تامر
تحليل للاوضاع بشكل فني راقي
سخرية بشكل ممتاز
اعجبني خطك التحريري جدا
سيدي
ليه بنعيش في فقر و اوضاع لا يحسد عليها و من هم علينا يعيشون في ابهة و قصور
لاننا تركناهم ينعمون بثرواتنا دون رقيب او حسيب لاننا جعلنا من الكلب سيدا فلصبح اسد مكشر على انيابه لا ليأكل الاقوياء بل ليستقوي على الضعفاء منا
نحن نعيش في عالم الغني يزداد غنى و الفقير يزداد فقرا
و الحل ان الشعب يستفيق من وهم ان الحكام حيمنحونا حقوقنا كاملة بس لما الحال يتصلح
اللي عاوز حقه يناضل عليه "الحقوق تنتزع و لا تعطى"
مودتي

تامر علي يقول...

MǿиY El-Shreef

ربنا يكرمك ... ولا فنان ولا حاجه ...بس ربنا يحفظ قفانا جميعاً من البهدله ويدومها علينا نعمه :)

فعلاً من كل ألم أمل ولكن ما أصعب ألم القفا:)

تحياتي و سلاماتي :)

تامر علي يقول...

ebn roshd 777

يا سيدي ولا حمار ولا حاجه ... بس لأن منظومة الفساد اللي احنا عايشينها لا تعترف غبر بالراقصات ولاعبي الكرة واللصوص كواجهة اجتماعية ولا تلتفت للعلماء والنابهين من ابناء البلد فهم الحمير بلا شك .... انظر في أكاديمية البحث العلمي كم طلب اختراع تم تعقيده وتصديره وقتله تعرف أين نحن .
ومع ذلك لا يتأس ففرج الله قريب ان شاء الله :)
تحياتي :)

تامر علي يقول...

صبرني يارب

الموضوع مش متعلق بالحكومة الموضوع متعلق بالفساد .. لأنه بيكون بيئة فاسدة طاردة لكل انسان شريف محترم ... وجاذبة لكل لص وطبال ورقاص ..... لكن أنا متفق معك في ان الله لا يضيع أجر من أحسن عملاً فعلاً

تحياتي :)

تامر علي يقول...

د/ ستيته حسب الله الحمش

خلاص هقوله كده بس انت اللي هاتدفعيله المهر والشبكة بتاعة الليدي "منحوسة" وكمان مقدم العشة عليكي :)

وبعدين مالها قهوة ام سالي .... يا ما لمت شباب وحمتهم من الانحراف أحسن ما يشموا بودره أهم بيشربوا بنجو وخلاص :)


تحياتي وتقديري دائماً :)

تامر علي يقول...

سارة احمد

والله جت لي نفس الفكرة دي .... لكن لما عرضتها على الناس قالولي الحكومة مش هاتسيبك وهاتتهم بتهمة جمع أموال وتروح في داهية .... قلت بلاش اروح في داهية دلوقتي علشان عندي ميعاد مهم :)

والله ياريت يكون في فكرة لتفعيل الكلام ده بدون الوقوع تحت طائلة قانون فتكات (الحكومة يعني )

تحياتي :)

تامر علي يقول...

assafo anaroze

كلامك ده بتفاصيلة قالتهولي واحده ست انجليزية كبيره في نقاش متعلق بالعمل تطرق لذكر أوضاع البلد فقالت لي ... لماذا تسكتون على هذه الأوضاع ..قلت ماذا نفعل ؟؟ ... قالت بالحرف الواحد "موتوا" نعم موتوا في سبيل أن ينال أبنائكم الحرية ... لن يموت الشعب كله ولا عشره ولا أي رقم كبير ...لكن المشكلة أن المستبد غير ثقافة الناس ومحى منها ثقافة المقاومة فأصبحت ليست مطروحة عندنا كخيار أصلاً.

أسعدني تفاعلك الراقي ودمت بألف خير :)

سارة احمد يقول...

بدون هزار وبكل حماس ممكن نعمل جمعية تحت راعيت فتكات...دورها انشاء مشاريع للشباب الخرجين وتزويج الغير القادرين دون فخفه بس بتوفير الضروري العصري...انا حسأل علي الاوراق بس شرطي ماكنش لوحدي ويكون في ناس جديه ولو فعلا يبقي من بكرة الي هو بكرة بعد تخليص الاوراق:)))ربنا يكرمك

د. ياسر عمر عبد الفتاح يقول...

إيه المقامة الجامدة دي
بس دي تنفع مرثية
عمال أضحك ,.. بعدين أزعل
وبعدين أزعل ... وشوية أضحك

حيرتنا معاك يا استاذنا

حضرتك مش مجرد مدون موهوب
حضرتك أديب ومفكر
حضرتك من الناس اللي بستني البوست بتاعها دايماً

Ahmed يقول...

ههههههههههه
ماهو هوا الغلطان
لو كان خدها من قصرها من الأول وعرف ديتها مكنش لف اللفه ديه كلها ووصل في الآخر لنفس النتيجه
ههه

والله ياتامر فعلا شر البليه ما يضحك
في بلدنا البني آدم هوا أرخص حاجه
وأرخص بني آدم هو الشاب (اللي المفروض يكونوا ثروة)

تامر علي يقول...

سارة احمد

يا خوفي من رعاية فتكات ... اللي بتاكل الاخضر ولا تبقي الا الفتات ... ولكن كل ما هو آت آت .... أنا موافق وربنا يستر :)
تحياتي :)

تامر علي يقول...

د. ياسر عمر عبد الفتاح

أضحك الله سنك دائماً وجنبك الالم والبكاء:)

انت اللي استاذنا يا دكتور وده بعض ما عندكم من موهبة وسعة اطلاع

تحياتي وتقديري لشخصكم الكريم :)

تامر علي يقول...

أحمـــــــــــــد باشا أبو العلا

ما هو احنا دايماً كده منتعلمش الا بعد التجربة :)

والله أرخص انسان هو اللص الذي يسرق أحلام الشباب والاطفال والشيوخ في مستقبل أفضل وحاضر كريم لأجل مصالحه الشخصية وتفكيره المنحرف ... يالا ..ربنا يخلصنا من اللصوص وقطاع الطرق قريباً :)
يسعدني مرورك دائماً أبو حميد :)

د/عرفه يقول...

ههههههههه
دايما رائع يا تامر
بس فيه
مناحيس كتير اوى
ههههههههههههههه
او يظهر ان مصر هى اللى منحوسة

mogrdraay يقول...
أزال المؤلف هذا التعليق.
ahmed saker يقول...

فكرتني بقول الشاعر :

و كم بمصر من المضحكات .........و لكنه ضحك كالبكاء

رحلتنا في الحياة يقول...

***
أنا يا بلادي مش ابنك ؟.... طب ليه سبتيني (اتنفخت)
وليه أنا أسكن في عشة .... والكلب ساكن في يخت
وليه على الكل هاين ..... وللهم شايل وشخت
وليه يا بخت من بين البخوت ...... لبخت

اااه يانى كلنا على كده مناحيس بس هو منحوس عمل كل اللى عليه وبرضو نحسه متغيرش
ههههههههه تسلم ايدك على البوست التحفة ده دايما بوستات حضرتك تحمل معانى كبيرة اوى بتقدمها بطريقة دمها خفيف اوى

حفيدة عرابى يقول...

فتش عن السياسة
كل مشاكل منحوس بسبب فساد فى ساس ---يسوس
ومالهاش علاقة المشاكل دى بحظه او بنجاح غيره
عارف حضرتك المنهج الجديد لسنة اولى اعدادى فيه كام درس كده على المواطنةوأهم مافيهم الحقوق والواجبات وانى لازم احصل على حقوقى وتقدير المجتمع ليا علشان اقدر اقوم بواجباتى
بيبقى نفسى اعيط وانا بشرح الدرس ده واقول للعيال بيضحكوا عليكم
وارجع اقول لنفسى لسه صغيرين حرام سيبيهم فى طفولتهم

اسلوب حضرتك اكتر من رائع
ربنا يوفقك

حازم النبراوي يقول...

هههههههههه
الصورة هههههههههه معبره قد اية هو منحووووووووووس هههههههههههه

انا مت من الضحك على حكاية المنحوس افندى دة
بصراحة فوق الروعة وجميلة جداااااااااا

بس كله كوم والصورة كوم ثاني هههههههههههههههههههههههههههههههه


تحياتى وتقديري واحترامي

محمد حمدي يقول...

جميل البوست ده فعلا

تحياتى لقلمك الرائع

تامر علي يقول...

د/عرفه

ربنا يفك نحس الناس وينحس فتكات (الحكومة يعني :)

تحياتي وتقديري :)

تامر علي يقول...

ahmed saker
أبو حميد ... بطل بكاء ...وذاكر كويس علشان تضحك بعد الامتحانات ماشي :)

سلام

الازهرى يقول...

وليه يا بخت من بين البخوت ...... لبخت

بسيطة لانك اعتمدت على البخت علشان يجيب لك اليخت

فعلا جميلة وجمعت رحلات متعددة ومواقف كثيرة

تحياتى دوما

تامر علي يقول...

ايوشة

يا فندم هذا بعض ما عندكم (في الصعيد) :)))
طبعاً كلنا مناحيس في ظل هذا الجو السياسي المسموم :)
منحوس قاعد على القهوة

وعدى اللليل على سهوة ..على سهوة
وانا قاعد على القهوة .. على القهوة

تحياتي :)

تامر علي يقول...

لقد خلقنا الله احرارا

ياريت تفهموا العيال كمان إن المواطنة دي ما هي إلا شعار لا أكثر زي الحرية والديمقراطية والجنيه المصري ... وكل شعار واحنا طيبين :)

تحياتي :)

تامر علي يقول...

حازم النبراوي

حازم باشا ..الصورة بتعبر عن نهاية كل المناحيس :)
اللهم لاتجعلنا مناحيس :)

تحياتي :)

تامر علي يقول...

Mohamed Hamdy

مرحباً بزيارتك التي شرفتني بها ... وشكراً لمرورك الكريم

تحياتي :)

تامر علي يقول...

الازهرى

الفنان الهمام اللي مش بيبان كتير ... كيف حالك ؟؟؟ اتجوزت ولا لسه ؟؟؟

اخلص علشان متتعبش :)

تحياتي :)

هــو..مش ..نـو يقول...

المناحيس ..
محابيس ...
في بيوت الناس .
شوفوا النحس علي حقيته
في بلاده الإحساس ...
يا ... ناس
===هوهو==

رئيس التحرير يقول...

بسم الله الرحمن الرحيم
أخي العزيز ...
السلام عليكم ورحمه الله وبركاته
هل نيأس ونسلم نفسنا للنحس ؟
هذا واقعنا المر اللذيذ...
أو هذه لذه حياتنا المره ..
فما العمل ؟
نظل في حاله الرثاء والبكاء ...
النحس نفسه صعبان عليه حالنا !!
هل من حلول ؟

سارة احمد يقول...

:)))فتكات الي بتاكل الاخضر ولاتبقي غير الفتات...ربنا يستر...بس بجد يلا نبدأ بالسؤال بس ربنا يساهل ومتحطمش الامال بتعقيد الاجراءت و كثرة اللف في الهيئات ...ويكون ماهو ات تحطيم الامنايات...يارب ننجح ونعمل حاجه ثواب في الدنيا وصدقة جارية في الممات...تنفع جيل المنحوسين وتقلل من الشحاتين...وهنيالك يافعل الخير والثواب وكاتب القصص الي ممكن من خللها تتوفر حاجة تساعد الفقراء وتفتح الف باب...تحياتي

عطش الصبار يقول...

يامنحوس ليه تدورعلى الفلوس
وفى بلاد الفرنجه تلف وتحوس
ارجع بلدك وعلى احلامك برجليك دوس
وايدك وش ضهرتبوس
واحفظ قفاك من اللمس
ولما تشوف عسكرى اهمس همس
وقول بلدنا كلها حريه
بنشم فيها الطعميه
بوست جميل مش عارفه اضحك ولا ابكى

Unknown يقول...

سلامو عليكم
اول زيارة لي هنا
البوست اكتر من رائع و القافية جامدة اوي

لكن بص سيبك من موال قهوة ام سالي

و غني مع انغام و مفيش حياة من غير امل

ملحوظة : انا نفسي مش مقتنع بالكلام ده!

شمس النهار يقول...

منحوس ده بصراحه النحس يقف له احتراما

بجد تدوينه لطيفه
مضحكه في ظاهرها
مبكيه علي حقيقتها

Lady E يقول...

لا الحرامية ها تخلص ولا المناحيس ها تفوق
الحالة ضلمة وكحلة ولازم مدد من فوق

على راي دكتورة ستيتة لازم مدد من فوق

ومنحوس للأسف اسم على مسمى بس مش لازم يستسلم لان لا حياة مع اليأس ولا يأس مع الحياة حتى لو كان في ام الدنيا

إيمان يقول...

البوست روعه طبعا دى حاجه مفهومه ومعروفه ولا يختلف عليها اتنين
وحضرتك أديب مفكر متميز دى حاجه مفيهاش خلاف خااااااااااااالص
وبوستاتك اللى بننتظرها وانت منشف ريقنا عليها .. دائما مميزه طبعا
لكن الجديد هنا فكرة الجمعيه اللوزعيه
يعنى لو بجد الحلم يبقى حقيقه والخاله فتكات ترخص لنا التكيه من غير اى استهبال او استعباط دى تبقى ساعة اجابه وربنا استجاب لدعائك يا ام منحوس
يارب يا فتكات يهديكى ويصلح حالك
واحوالك ويروق بالك
تحياتى وتقديرى وفى انتظار الجديد دائما

wesoooooooooo يقول...

السلام عليكم
روعه ماشاء الله عليك ياتامر
بوست متميز
وبها من الكنوز ما يعجز عن حراسته مليون غفير
والله العظيم ولا 100 مليون
بس الحراميه أكتر
ربنا معاك ياعم المنحوس ومعانا احنا كمان
ال واحد فاكر البلد هى اللى منحوسه
أتارى الواحد هو اللى منحوس وهو مش واخد باله
ربنا يفك النحس عننا قول آآآآآآآآآآمين
وانا بعتذر عن تأخرى فى الرد ع البوست واللى قبله
بس تقبل إعتذارى والله ظروف خارجه عن إرادتى
تحياتى
دمت بكل الخير

حسام غانم يقول...

الله عليك

بجد

الله عليك

مظبوطة أوي

Rosa يقول...

لا حول و لا قوة إلا بالله العلي العظيم

وجعت قلبي ربنا يرحم شباب البلد دي و يرفع غضبه و مقته عننا اللهم آمين

بس الأسلوب رائع و قدم سم الحقيقة في قطعة حلوى

دمت مبدعاً

MaNoOoSh يقول...

مش معقول كل المناحيس اللى على قهوة ام سالى
اكيد لازم نسعى للرزق حتى لو اتنحسنا شويتين تلاتة.. مش معقول نستسلم لام سالى يعنى

تامر علي يقول...

هــو..مش ..نـو

فعلاً سنظل محابيس النحس ولو في بيوتنا... التي انعدم فيها الاحساس ..بين الناس والناس :)

تحياتي :)

تامر علي يقول...

رئيس التحرير

أول الحلول هو التوصيف الدقيق للداء ... وللأسف معظمنا يعالج السرطان بدواء نزلات البرد

تحياتي :)

تامر علي يقول...

سارة احمد

خلاص أنا من نحيتي هاسأل عن الاجراءات وانتم تسألوا ونوصل للإجراءات ونمشي السكة سوياً .... ربنا يسترها علينا من فتكات .... أم كرش يبلع تريلات :)

تحياتي :)

تامر علي يقول...

عطش الصبار

منحوس اتمرمط في بلده ... وبعدها لف ودار .... اشتغل 100 شغلانة ... ما يرضى بيها الحمار .... وآخرتها كل على قفاه .... وحسبوه على الثوار :)

وعجبي :)

تحياتي وأهلاً وسهلاً في أول مرور الذي نتمنى أن يدوم ألقه :)

تامر علي يقول...

المعلم محمد صاحب المطعم - طعمية سخنة

شوف يا معلم :))) الأول بجنيه طعمية سخنه وبعدين نتكلم :)

طبعاً الأمل في وجه الله كبير لكن في بلدنا سمعت مثل جميييييل جداً بيقول

"يا مستني السمن من (تيييييت ) النمل
عمرك ما هاتقللي :)"

طول ما احنا مستنين خير من النظام ده عمرنا ما هانقللي :)

تحياتي لمرورك الأول الرائع الذي نتمنى دوامه :)

تامر علي يقول...

شمس النهار

ياااه ده مصر فيها 80 مليون منحوس :)

تحياتي وتقديري :)

تامر علي يقول...

Lady E

طبعاً لازم مدد من فوق لكن الأول لازم نستاهل المدد علشان نحصل عليه

أكيد في أمل ... وعمر كمان :)

تحياتي وتقديري :)

تامر علي يقول...

إيمان

ربنا يخرب بيتها فتكات أحسن ويخلصنا منها خالص :))))

هانسأل على الإجراءات ولو إني مبحبش أتعامل مع كل المنتمين لفتكات لكن نحتسب الأجر عند الله :)

تحياتي وتقديري دائماً :)

تامر علي يقول...

wesoooooooooo

فعلاً الحراميه أكتر بكتير .... ربنا يفك كربنا ونحسنا ويفرج همنا واياكم .... وطبعاً لكم كل العذر بدون اعتذار ووجودكم يسعدنا دائماً :)

تحياتي :)

تامر علي يقول...

حسام غانم

شكراً لمرورك الكريم :)

تحياتي :)

تامر علي يقول...

Om HAGAR

ولا وجع قلب ولا حاجه :) ده مجرد وصف لبعض حقائق الامور لمحاولة التغيير الايجابي .
أكرمكم الله ودمتم بخير

تامر علي يقول...

MaNoOoSh

أكيد مش هانستسلم لأم سالي طبعاً .... دي مجرد مرحلة ممكن تدوم لسنة أو اتنين أو تلاتة وعشرين :) لكن لايمكن تستمر :)

تحياتي وتقديري :)

غير معرف يقول...

ههههههههههههههه
والله بوست زي العسل
بجد بحييك عليه
مش بيقولو شر البليه ما يضحك

تسلم ايديك

دي اول مره ازورك بس مش هتكون الاخيره ان شاء الله

تحياتي

تامر علي يقول...

hager za3bal

أهلاً وسهلاً بك في أول مرور جميل لك ونتمنى دوام مرورك :)

تحياتي وتقديري :)

القدر و انا يقول...

تامر
اعتذر عن التاخير
مبدع .. مبدع ..
قرات البوست مرات من حلاوته
يسلم عقلك وابداعك
تسلم افكارك
منحوس يعبر عن واقع ملموس
لا تتاخر علينا بابداعك الراقى
تحياتى

Unknown يقول...

تامر
طيب قولي المثل كامل !
اصلي اول مرة اسمعه ! و بعدين الامل مش في النظام ده !

الامل في التغيير !

مجرد مدونة يقول...

أم سالى وأم أشرف وأم سيد الظاهرة دى منتشرة جدا
الظاهر فعلا مفيش أحن من الأم!!

تامر علي يقول...

القدر و انا

فعلاً منحوس يعبر عن واقعنا الملموس تحت قيادة حكومة أم حلموس :)

مفيش أي اعتذار ولا حاجة ويشرفنا مجرد المرور :)

تحياتي وتقديري

تامر علي يقول...

المعلم محمد صاحب المطعم - طعمية سخنة

مينفعش علشان الرقابة :)

طبعاً الامل في التغير لكن التغيير النابع من إرادة وليس التغيير الذي يفرضه النظام :)

تحياتي :)

تامر علي يقول...

مجرد مدونة

فعلاً مفيش أحن من الأم واللي مالوش قهوة (قصدي أم) حاله يغم :)

تحياتي للمرور الكريم :)

قلب ارهقته الاحلام يقول...

جميييله جداً بجد ماشاء الله

بس مش هو المنحوس لوحده زيه المناحيس كتير

بس يمكن هو ال اتفك النحس عنه شوية

فأتشهر وأنكتب عنه

بجد بوست هاااايل جداً

تحياتي ليك,,,

غير معرف يقول...

اول مرور على مدونتك
وباذن الله مش تالاخير
ماشاء الله عرضك للبوست جميل
واشم مابين السطور رائحة فنان مميز
اما بالنسبة للبوست فليس لى غير كلمتين
آآآآآآآآآآآآآآآآآآه يابلد
تقبل مرورى ولك تحياتى

تامر علي يقول...

قلب ارهقته الاحلام

كل ده واتفك نحسه :)))... فعلاً مصر فيها مناحيس كتيييير :)

شكراً للمرور الكريم :)

تامر علي يقول...

أم مالك

شكراً لمرورك الأول الجميل ولإطرائك الاجمل زإن كنت لا استحقه ... وأرفع صوتي مع صوتك آآآآآآآآة يا بلد :)))

تحياتي وتقديري :)

حاجات جوايا يقول...

حلوة اوى
زى حكايات الف ليلة وليلة
بس دى موديل 2009

بس فين قهوة (ام سالى ) دى ؟؟؟


.........
مررتلك تاج أخى الفاضل
انتظر قدومك لاستلامه

خالص تحيتى
سالى

تأثير الفراشة يقول...

ما شاء الله، البوست رااائع

و ربنا يسهل و يتحول كل منحوس إلى محظوظ


تحياتى، وتقبل مرورى

تامر علي يقول...

حاجات جوايا

أولاً : القهوة دي مالهاش دعوة بحضرتك نهائياً ده مجرد تشابك في الاسماك:)))

شكراً لحضرتك على التاج وسأجاوبه في البوست القادم ان شاء الله

تحياتي :)

تامر علي يقول...

تأثير الفراشة

مرحباً بك في أول زيارة شرفتنا بها ونتمنى أن تتكرر دائماً ... وندعو الله ان يفك نحس كل منحوس وأن يطرد الهكسوس من بلاد المنحوس :)

تحياتي :)

بـِصَمتـِـ أميرة ــــى يقول...

تامر
بغض النظر عن التوبيك المنسق ده
انت اعلى من انى اقيمك
بس بالذمة كل الاحداث مش حقيقية ؟؟
شمة ريحة حاجة حقيقية ياتشامر

تقبل مرورى واعجابى
ملكة بحجابى

تامر علي يقول...

م/ الحسيني لزومي
نشارك في الحملة إن شاء الله
جزاكم الله خيراً

تامر علي يقول...

ملكة بحجابى

يا فندم مفيش حد أبداً أعلى من التقييم على العكس التقييم يثري أي شخص :)..أما عن الأحداث فكلها وقعت أمام عيني (أكثر من مرة) ولكن لأشخاص مختلفين فكوّنت من التجربة خبرة عن معاناة الشباب حتى الممات في ظل حكومة فتكات :)

تحياتي وتقديري دائماً :)

عربي نيوز يقول...

السلام عليكم

أخي تامر..
حال الشباب اليوم لا يسر عدواً ولا صديق
فالشباب عماد الوطن ، لكن أمن الوطن لا يريد للشباب ان يكون لهم مكان او رأي فيما يحصل
بالفعل احداث قصتك حاصلة في زماننا ، ويعاني منها كل شاب ،، وخصوصاً أم الدنيا مصر
يعني اذا حب الشاب يقول رأيه ويقول انا مش عاجبني اللي بيصير ، بيلاقي بوكس الامن المركزي امام بيته بينتظره
وفي النهاية بيوقع على اعمال وجرائم لم يعلم اين طريقها يؤدي.؟!
فلا حول ولا قوة إلا بالله

دمت في رعاية الله اخي


لا تنسوا اخوانكم في غـزة من دعائكم

||..بحـر الدموع..||

تامر علي يقول...

بحـــر الدموع

صدقت يا أخي فعلاً معادلة صعبة ...لكن الأمل في وجه الله كبير

تحياتي :)