الخميس، أبريل 14، 2011

تاج الثورة

الأخت الكريمه فتافيت مررت لي هذا التاج الثوري المناضل الشريف الذي يظهر في الصورة بعالية والذي يفتش في جنبات النفس الثورية المتقدة بأحاسيس الثورة المتدفقة من اللاوعي إلى براثن اللاشعور البؤري في المنطقة العمياء أسفل القولون الصاعد بقليل لذلك هيا بنا وكفانا عبثاً نحاول أن نجاوب معاً عن تلك الأسئلة الحائرة المترددة في سماء المرح وسفن أب
س  سؤال 
هل توقعت ثورة 25 يناير؟
ج جواب 
أي حد يقول كده يبقا وحش خالص وبلاش اقول عليه حاجه ليكون قريب حد ولا حاجه لكن هو بعد ثورة تونس اتكسفنا من نفسنا وقلنا مش بعيد نعمل حاجه لكن لم يكن أحد يتخيل الوضع الحالي بأي حال 
 
س سؤال تاني 
هل كنت من ثوار ميدان
التحرير _ الكنبة _ الكمبيوتر _ حدد الميدان الآخر الخاص بك
ج جواب تاني 
أنا كنت من كل هؤلاء وهذا يثبت بالضرورة نظرية أن الأنسان أصله برت بلس 

س سوال تالت (وبعديييييييييين )هه؟
مالم تنجح الثورة في تحقيقه هو...... اختار شيئا واحدا
ما لم تنجح الثورة في تحقيقه حتى الآن هو تصحيح الاتجاه الإعلامي فلازالت نفس الوجوه العكره لأنها وللأسف بلا بديل 
 
س سؤال رابع مكركر
ج جواب رابع 
أكثر شىء فرحك في هذه الثورة هو...... اختار شيئا واحدا
أكثر ما اسعدني في الثورة هو أن الشغل قفل يجي اسبوعين كده مما مكنني من الكفاح المسلح على الكنبه
 
س سؤال خامس (مش هنخلص بقا؟ )ولا ايييه؟
الشخصية التي أعجبتك خلال الثورة
ج جواااااب
بلا منازع عصام شرف
س سؤال سادس اجباري
الشخصية التي احتقرتها بسبب الثورة
ج 6
بدون منازع مرتضى منصور رغم كثرة الحقراء وما أكثرهم
 
س سؤال سابع غير اختياري
أطرف ما سمعته خلال الثورة ؟ تعليق _ نكتة _ حدث _ أخرى
شعار كان يتردد خلال اعتصامات التحرير ... دلعو يا دلعو مبارك شعبه خلعو... حللو يا حللو مبارك شعبه حله .. فقد كان يثير هذا النشيد فيا احاسيس الأفراح الشعبية والأجواء الرمضانية المشتركة بنين
 
س سؤال ثامن 
القناة التي تابعت من خلالها أحداث الثورة هي
ج اجابة (تمويه)ممممم
قناة السويس ؟ قناة بنما ؟ قناة نيكلوديان 
تقريباً كده ولا قناة هههااااي خدعة 
 
س تساؤل حائر يبحث عن اجابات
 
الجريدة التي كنت تقرأها لتتابع الثورة هي
جججججج 9
جريد النخل العالي ميل وارمي السلام ..جريدة ؟ أنا يتقالي جريدة ماشي ماشي 
 
س 10 وتتوالى الاسئلة في تتابع مثير ونصل للحظة الذروه
الكاتب المفضل خلال الثورة هو
ج
......... كاتب؟  إلا كاتب 
هو بلال فضل معقول والأسواني يعني بس نظراً لاختلاف مرجعياتي معهم فدائماً ما تصطدم عيني بمواطن الخلاف مما يعكر صفو قرأتي لهمااااااا لذلك يحصل الأول على الأول والثاني على الثاني والثالث على الثالث بلا ترتيب
 
س حادي عشر شكلنا هنبات هنا النهارده
 
    المذيع (المذيعة) المفضل خلال الثورة هو
ج 11.5
هو مش مذيع هو باسم يوسف الحقيقه لأن كل المذيعين ........يالا مش مهم
 
س ثنتي عشر (حلوة ثنتي دي ؟؟ )مع انها غلط
كلمة تقولها لشهداء وجرحى 25 يناير
ج 
مش هينفع نهرج هنا .. ممممممم
للشهداء هنيئاً لكم وللجرحى جراحاتكم وسام لم ينله الكثير
 
س 13 شكلنا كده خلاص قربنا
 
متقولش إيه إدتنا مصر وقول حندي إيه لمصر
عندك حاجة تديها لمصر؟
ج 3   1
أنا ؟؟؟؟؟ منيييييييييييين بصي يا مصر أطلبي مني أي حاجه أي حاجه إلا الفلوس

س 14 من سترشح لرئاسة الجمهورية ؟ ولماذا؟
ج 
سألت هذا السؤال لأحد المتظاهرين أبان الحرب الكورية فقل على الفور 
هرشح معزه بلدي يا أخي أي حاجه هتبقا أحسن من ده ... 
فقلت له 
شكن عفواً باي 

س 15 احنا هنعيش في المدونه شكلنا طب اروح اجيب الخيمه

لو أصبحت رئيسا لمصر ما هي أول ثلاث قرارات لك؟
ج 
ايوه كده الكلام امال ايه تعاليلي يا بطه 
أول حاجه كل واحد في مصر يتجوز أربعه ولو مكفتش مصر نستورد من روسيا حتى نقضي على ظاهرة العنوسة الوحشة وظاهرة التحرش الفزيعه وظاهرة البصبصة التي تؤرق الشعب المصري 
تاني حاجه هحكم مصر من السعودية بالفاكس علشان أأمن نفسي برضو 
ثالث حاجه هشهيص الشعب واخلي الآيس كريم رخيص وهقسم الدخل بيني وبين الشعب قسمة الحق النص بالنص مش زي جماعه   هه

س مش فاكر بأه خلاص 
لو أعطوك نصيبك من المليارات المسروقة..
ما توقعك أن يكون نصيبك منها وماذا ستفعل بهذا المال؟
ج أو ح
سأشتري صندل وجلابيه وشاليه في جمصه على الفور ونصيبي في العملية دي مقبلش إنه يكون أقل من خمشتاشر جنيه

أمرر هذا التاج إلى

إلى الأمام 
شكله كده خلص .. يا سلالالالالالالالالام
إحياة طنط شفيقه شكله خلص 
طيب معادنا الثوره الجايه بأه 
شكن عفون باي
   
  

 

هناك 8 تعليقات:

فتــافيت (رحاب الخضري) يقول...

ههههههههههههههههههههه
يالهوي يالهوي... انت إيه اللي جرالك
ده كله من عمو الفيسبوك .. ولا من فرحتك بحبس عيلاء وجيمي

ضحكتني جدا.. وانا كنت لسه ضاحكة من 10 دقايق.. كده تقلت في الضحك قبل ما انام :D

بص هو مش عارفة
بس حاسة ان المدونة اتهاكت.. وحد غيرك جاوب.. هههههههههههههههههههه
مش عارفة ليه :))

بس سيبك انت اجدع حاجة الايس كريم يرخص
عشان انا بحبه.. وغلي اوي
بالذات بعد ما عيلاء وجيمي ودخلهم مخزون الايس كريم بتاع البلد كله النهاردة :(

صباحك.. فل :)

تامر علي يقول...

فتافيت

والله يا فندم هي ممكن تكون الآثار الجانبيه للفيس بوك فعلاً .. وفعلاً انا لحد دلوقتي مش مصدق ان الناس دي هتتحاكم بجد :)

بالنسبة للمدونة فهي بخير حتى تاريخه وأنا اللي جاوبت بس قبل ما انام مباشرة وده مؤشر مش حلو علشان أنا قبل ما انام بشويه بفصل شحن خالص

بالنسبة للايس كريم اللي دخلهم ان شا الله يطفحوه ويطله مسمم بالاشعاعات اليابانية ونخلص منهم عن قريب

صباح شَريف خفيف :)

شمس النهار يقول...

:)))))))

اه الثورة قامت وهنطمع
وكل راجل هيسوق فيها ويقول لك اربع
:))
كد هنعمل زي نساء اليمن ونقوم بمليونيه
ونقول الهانم تريد تغيير الجواز
:))

شمس النهار يقول...

فكر لما قلت لك انهم بيفرفرواوهيقعوا ايه رايك بقا
:))
كله بقا في الكلابوش

تامر علي يقول...

شمس النهار

الرئيس اليمني عبدالله صالح كان بيحذر اليمنيات ينزلوا المظاهرات علشان الاختلاط :)) الاختلاط أخطر عليهم من الرصاص الحي بتاعه

طبعاً حضرتك من أوائل الناس اللي تنبأوا بسقوط الطواغيط :)
ممكن أطلب من حضرتك تتنبأي بشنق الشله كلها هههههههههه
تحياني

إيمان يقول...

ههههههههههههههههه
شكن على البوست وعلى الثورة مع ورغم انك تدعى انك برت بلاس لكنى اتوقع انك من اصحاب الميدان في أغلب الوقت
وعلى العموم ومن مربعى هذا أدعوك لأن ترشح نفسك الانتخابات الرياسه ومن غيرك لها ومين هياكلنا ايس كريم بعدك
شكن عفون باي

تامر علي يقول...

إيمان

:)
أنا هرشح نفسي فعلاً بس لرئاسة جمهوريات العالم كله علشان طموحاتي مش محليه بس :)
وبالنسبة للايس كريم انا هظبطكوا ان شاء الله وشعاري الايس كريم للجميع

Unknown يقول...

ما كنت اتوقع انك تمتك روح المرح ...
ولكن يبدو ان الثوره حولت اشياء كثيره و لم تستطع حتي الآن تحويل ارصدتهم الي اماكنها الطبيعيه ...
احيك ...