السبت، فبراير 26، 2011

صوره .....وأخرى

المراحل الانتقالية لها طبيعة خاصة جداً تتميز بالفرز والانتخاب والعشوائية والصدفة وأحياناً كثيرة  تدخلات القدر الغير متوقعة
لذلك فعند النظر لما يجري من حولنا خلال الشهر الأخير ستجد الكثير والكثير من المتناقضات الناس كلها أصبحت لاهم لها إلا التحليل السياسي وبقدرة قادر بعدما كان الشاغل الأكبر هو الكرة والفن ولقمة العيش وبنفس الطريقة أصبح معظم الناس من مؤيدي الثورة "بالطبع بعد نجاحها " على الرغم من أنه حتى خطاب التنحي الرئاسي لم يكن الناس على قلب رجل واحد هكذا أو مع الثورة بتلك الصورة , ولكن أما وأن الثورة قد نجحت فقد انضم العوام إليها وهذا مطلوب وهو المراد ولكن مع العوام انضم اليها المنافقين حتى معلومي النفاق بالاسم والصوت والصورة وهم لايخفون على عاقل وكذلك انضم اليها الساكتين حتى تظهر النتائج وهم كثير أيضاً , ولكن المثير للاهتمام أن هناك الكثير من الناس لهم رأي واحد لا يتغير وهو يتلخص في هذه العبارة "كفاية كده المكاسب التي تحققت كثيرة ومش عاوزين نعمل مشاكل ونبوظ الدنيا" أصحاب هذا الرأي كانوا هناك بعد الاقالة الصورية للحكومة في الخطاب الأول للرئيس المخلوع وكانوا هناك بعد الخطاب الثاني الموجه لربات البيوت والعاطفيين ذوي الذاكرة المعدومة وكانوا هناك قبل التنحي وبعده وعند كل بيان للمجلس العسكري وعند كل خطوة ايجابية تتحقق وهو المثير للعجب... ألا يمكن لهؤلاء فهم الواقع ؟ ألا يمكننا رؤية الأمور على حقيقتها لهذا الحد ؟  هل نجح النظام في زرع الخوف والرؤية الضبابية ونزع الأمل والحلم من ضمائرنا حتى صرنا نرضى بأنصاف الحلول والنجاح الجزئي المهدد بالفشل حتى ونحن في أشد مراحل القوة والتأثير ؟؟؟؟؟
هل يخفى على هؤلاء أن كامل النظام التنفيذي لايزال يعمل بكفاءة ولاتزال الرشوة والمحسوبيات والتلوث والغباء والزحام منتشر بنفس الآليات القديمة وأنه لو لم يتم القضاء الكامل على النظام البائد ومطاردته حتى آخره سيعود بقوة القصور الذاتي للعمل من جديد وسوف  ينتخب النظام نفسه من يقود زمامه من جديد ويحفظ له استمراريته بل ويكون مناعة جديدة كالفيروسات ضد الخبرات القديمة التي شكلت عليه خطراً في وقت ما؟
لابد من دعم كل صور التغيير ومظاهر الثورة حتى تنتصر في الحرب وليس في المعركة فالحرب عدة معارك والفوز في أحدها لايعني الفوز بالحرب , فالخبرة التاريخية تصرخ بأن الحذر واجب فكم من معركة تحول انتصارها المؤزر إلى هزيمة نكراء وكم من مرة غافل العدو صاحبه وعاد واسترد قوته , لابد من وعي كامل بطبيعة المرحلة وفهم جزئياتها والتصرف بناء على الوعي ... وليس الأماني 

بالنظر إلى الشقيقة ليبيا وما يحدث فيها نجد ان السياق العام للثورات العربية يتعالى ايقاعها ويزداد صعوبة وضراوة مع الأيام فنظام بن على تهاوى وترنح بعد معركة متوسطة وكفاح وخسائر لها قيمتها المادية والمعنوية ولكن بجهد معقول , في حين أن الايقاع والخسائر والوقت تزايد في مصر واشتدت وتيرة العنف والصلف والغباء للنظام وزاد عدد الشهداء والجرحى والمفقودين وكاد الجيش أن يتدخل لصالح النظام لولا الرحمة الالهية ثم تدخل العقلاء من الجيش في الأحداث , وبالنظر لليبيا نجد السيناريو الأسوء قد حدث وبدأ الجيش في ضرب الشعب بل واستعان بالمرتزقه والعملاء في سحق الثورة ووصفهم بنفس الصفات .. القلة المندسة والعملاء والجرذان ووصف نفسه بأنه ليس كالذين سقطوا ليستكمل نفس المشاهد بكل تفاصيلها ولكن بمزيد من الغباء والخسائر لتتضح الصورة جلية حقيقية تماماً 
هؤلاء لم يكونوا هنا كحكام أبداً .... هؤلاء كانوا هنا كرعاة حصريين لمصالحهم الشخصية ثم لربهم الأعلى المتمثل في ولي نعمتهم كل بحسب توجهاته سواء للقبلة الأمريكية أو الأوروبية أو الاسرائيلية أو لكلهم معاً ... وعند السقوط يتهم شعبه بالتهمة التي طالما حاول في قرارة نفسه أن يبرأ نفسها منها حتى صدقها وحده .... العمالة والخيانة والنهب والسلب والقتل والقمع ... صورة مهداة لباقي الأنظمة 
بسم الله الرحمن الرحيم
"قال فاذهب فإن لك في الحياة أن تقول لا مساس وإن لك موعدا لن تخلفه وانظر إلى إلهك الذي ظلت عليه عاكفا لنحرقنه ثم لننسفنه في اليم نسفا"
صدق الله العظيم

هناك 10 تعليقات:

شمس النهار يقول...

نجاح الثورة دي ان شاء الله بسبب ان الشعب كله طلع صحيح دعوة من الشباب علي الفيس وتربيطات بس الشعب كله طلع من اول بياع البطاطا الي المستشارين
وده انا شفته بنفسي ماحدش حكاهولي

وبالنسبه للناس اللي سقفت وانضمت للثورة وامنت بيها بعد مانجحت دول كتير جدا
بس عارف هي شخصاتهم كده
نظرت حولي لمن فعل ذلك علي المستوي الشخصي
وجدتهم كده في حياتهم الشخصيه
يوم الجمعه بعد التنحي والفرحه الرائعه اللي حصلت ف الميدان
وابتدي يتوافد علي الميدان ناس علشان تهيص بقاااا
وجدت ناس بتطلبني وتزن وانت عارف اصلا الاتصال كان عامل ازاي في ميدان التحرير حاجه شلل يعن
المهم بيطلبوني علشان يقولوا انهم في ميدان التحرير بيحتفلوا
الحقيقه ماقدرتش امسك نفسي من الضحك وكمان قلت لهم تعالوا نروح علشان ميدان التحرير دلوقتي بقا مش بتعنا اللحظه دي لمت المهيصجيه

وعندك حق مافيش حاجه اتغيرت كتير لكل اللي بينلوا ويتعاملوا مع المصالح الحكوميه
الحراميه والمرتشين لسه قاعدين
بس صدقني الخيط ابتدي يكر

بس برضوا مش عاجبني التقسيط اللي متبعه الجيش برغم كامل احترامي له

وفعلا ماحدش خرج عن النص من الرؤساء التلاته وانظمتهم ده يقول احنا مش زي دوكهم ودكهوم قولوا احنا مش كلكهم
والاخر بطلعوا دي كلكن ويمشوا

:)

تامر علي يقول...

شمس النهار
ربنا يكرمنا ونقدر نحافظ على الحماس والأمل ونستكمل المسيرة وهنا ييجي دور التغيير الداخلي اننا نرفض ندفع رشوة ونرفض نفرط في حقوقنا ونرفض نمارس السلبية , وإذا كانت الرؤس طارت فلازال الجسد بأكمله بحاجه إلى تطهير

فركشاوي ..ناوي يقول...

(وكاد الجيش أن يتدخل لصالح النظام لولا الرحمة الالهية ثم تدخل العقلاء من الجيش ).
السلام عليكم ...
قال رب أرني كيف تُحيي الموتي قال أولم تؤمن قال بلي ولكن ليطمأن قلبي.
أريد أن يطمأن قلبي ...جبش مصر المؤسسه الوحيده التي تكاد تكون خاليه بالقدر المعقول من الفساد ...بها ولكن هناك فروق ...فقط ...أريد أن يطمأن قلبي.
مع اطيب أمنياتي

إيمان يقول...

تعلمت من الثورة أنه وحين تفاوض يجب ان يرتفع ثقف مفاوضاتك عاليا والا ترضى بأنصاف الحلول لأنه لا يصح الا الصحيح
لا تقول نشوف يمكن الصبر نديهم فرصه.. لايصح الا الصحييييييييح

فتافيت يقول...

يا مساء خالي من أمن الدولة
النهاردة ما قدرتش ما دخلش بلوجسبوت واكتب فيه... ده يوم عيد قومي اصلا

عارف أنا خسرت ناس كتير جدا
بسبب كفاية بقى.. هاتخربوا البلد.. انتوا هاتلوعوا الدنيا.. اسرائيل هاتضربنا.. امريكا هاتحلتنا... زحل بعت جواسيس واجندات للتحرير

حاجة تفقع المرارة أصلا
يعني الأخت أو الأخ من الأول.. مش فاهم حاجة خالص

أول ما الخطاب التاني أتعمل
كفاية بقى حرام عليكم مهو كده كده راحل.. اتقوا الله لو ابوك ده يا كابتشن هاتعمل معاه كده؟؟؟

وبعد التنحي.. كفاية بقى هاتنزلوا تاني ليه؟؟.. ماهو ده اللي انتوا عايزينه ان مبارك يرحل... طيب يا راس فجلة انت وهي هو .. احنا كنا بنقول .. الشعب يريد إسقاط النظام
يعني مبارك ووزراء مبارك وحزب مبارك والمجالس المحلية بتاعة مبارك.. ورؤساء التحرير لجرايد مبارك.. والمحافظين بتوع مبارك.. ومدراء الأمن بتوع مبارك.. ورؤساء النقابات بتاعة مبارك... ده كله حصل يا فجلة منك له؟؟؟؟

وبعد ما شفيق مسك.. ايه بقى
حرام عليكم سيبوا الراجل ياخد وقته.. عشان يحقق مطالبكم
واه يا وجع قلبي وفقع مرارتي.. كل يوم كان شفيق يا راجل قاعد.. يتحرق دور الأموال العامة.. يتحرق مبنى الحسابات العامة.. تتسرق أبحاء الماء بمركز البحوث العلمي.. تتفرم أجوال ورق كل يوم... نسيب شفيق لحد ما يحفر قبر الشعب.. ونجبله الصبارة هدية؟؟

ولما شفيق مشي... وبقدرة قادر ربنا كشفه... ومجرد انه مشي من ساعة... امن دولة جاله حالة صرع وبقى عامل زي العبيط اللي راكب متوسيكل.. عمال يحرق ويفرم في ورق... ده صدفة؟!

برضو اللي مالهمش فيها نزلوا الميدان وبالدف.. ويقولوا قاعدين ليه ما تقوموا تروحوا؟؟... هي حفلة سمر؟!

والله أنا بكتب في اليوم أكتر من 50 ألف كلمة.. عشان أقول إن الثورة مستمرة

كنت شوفت لك بوست فيه للتواصل على الفيسبوك... ممكن حضرتك تحط لينك بروفيلك عشان اضيفك... لأن بروفيلات المشاهير اللي زي ^_^ ما ينفعش توصلها وتضيفها.. لازم أنا اللي أضيفك.. عشان التواصل هناك بجد أسهل وأسرع.. وفوائده كثيييييييييييرة

ومعلش طولت عليك يا فندم
ومبروك تنضيف مصر... من كوم الزبالة
اللي اسمه... قمل دولة

تامر علي يقول...

فركشاوي ..ناوي

ربنا يطمننا جميعاً والله كلنا لنا نفس القدر من القلق :)

تامر علي يقول...

إيمان

أكيد القبول بأنصاف الحلول لن يؤدي إلا إلى الهلاك ولكن فقط من لديهم نصف قدرة على رؤية الأمور على حقيقتها يرضون بأنصاف الحلول .... مره كنت بكلم واحد قاللي ان الرسول كان بيرضى ساعات بحلول جزئية مع الكفار زي صلح الحديبية حتى على غير رغبة كامل الصحابة اللي هما الشعب في الوقت ده ... وطبعاً الاجابة واضحة جداً في فرق كبير إني اعمل صفقة أو هدنة مع عدو خارجي لمصلحتي الشخصية ولو فيها شيء من التنازلات وفي فرق كبير اني لما انوي اتطهر ذاتياً وداخلياً من فساد ظاهر قابل للبتر والتراخي فيه مهدد لكيان الجسد كله
تحياتي :)

تامر علي يقول...

فتافيت

http://www.facebook.com/profile.php?id=100002061294948&ref=ts#!/

ده اللينك وعلى فكرة أنا ضايف سيادتك فعلاً لكن ممكن يكون مش واضح ان انا علشان اسمي على الفيس بوك مختلف لزوم الحيطه والحذر والخفية والاستتار وكده

والله كلام حضرتك وضبوط لازم الثورة لاتهدأ إلا بعد القضاء على الفساد لآخر فاسد في البلد وإلا الخلايا السرطانية سريعة الانتشار هترجعنا لوضع الصفر

لازم نبتدي نحس بالفرق في تعاملاتنا مع الاجهزة الحكومية وفي شكل العيش اللي بناكله وفي الهوا اللي بنتنفسه وبعد كده نقيم الثورة ونقول نجحت ولا لاء

تحياتي :)

شمس النهار يقول...

ليه مش بتكتب

الجو العام يتطلب منا الحوار والمناقشه
وخصوصا لما يكون مدون زيك
له كتاباته العميقه المؤثرة

واتمني انك تنضم لجروب المدونين علي الفيس والمجلة بأذن الله الخاصة بالمدونين
ولك كل الشكر

واحد جورنالجي يقول...

برجاء مراسلتي على الميل بخصوص مدونتكم حيث نرغب في نشر تدويناتكم على موقعنا mujaz.me

hazem9009@gmail.com