الثلاثاء، يوليو 21، 2009

استنساخ الفساد





في الفترة الأخيرة لاحظت بشكل لافت تراكم القمامة في الشوارع سواء في الأحياء الراقية أو الشعبية على السواء ... وبسؤال البعض تبين أن "الزبال" قد انحسر دوره التاريخي في حياة الشعب المصري في الفترة الأخيرة بعد القرارات الحكيمة للحكومة "الرشيدة" التي قررت حرصاً على نظافة الشوارع وتجميل الأماكن ومنع انتشار الأوبئة وزيادة أعداد الحيوانات الضالة كالقطط والكلاب والفئران والفيل أبو زلومه ... قررت أن تجمع "فلوس" الزبالة بنفسها ولنفسها وأن تكل الأمر لشركة "زبالة " بمبلغ زهيد "آخر" بالإضافة للمبالغ المحصلة من الناس ... وأهو كله بثوابه .. "يمكن الناس تنضف " وبما أن كل الأمور قد تحولت لتجارة فقد انتشر "الزبالين" المتخصصين في المناطق .... فهذا تخصص "كارتون وورق" وهذا تخصص "زجاج وبلور" وهذا تخصص " لبيسة قلم جاف" وأصبحت الشوارع تعج بالزبالة والزبالين في آن واحد ... وبرغم حكم المحكمة بعدم شرعية تحصيل القمامة "اجبارياً" مع الكهرباء أكثر من مرة إلا إن الحكومة اعتمدت على أن "الناس طيبة وبتنسى" وأقرت الأمر الواقع وسكت الناس واستمتعوا بالزبالة .
كانت الحكومة منذ فترة قد قررت استثمار أموال التأمينات والمعاشات للناس "وأهو كله بثوابه برضو" وبالفعل وضعت يدها على تلك الأموال التي صارت "مجهولة" وكعادة الحكومة الصريحة في انحيازها للفقراء ومحدودي الدخل ستترك "الأجيال" القادمة تحل هذه المشكلة لثقتها التامة في حكمة الأجيال القادمة .
صفحة جديدة فتحتها الحكومة مع المواطنين في حسابات الضرائب نتج عنها زيادة متحصلات الضرائب في الفترة السابقة عشرات المليارات تم توظيفها كأحسن مايكون في خدمة الشعب "اللي بياكل وينكر"
لحماية المنتج المحلي المتميز جداً تقوم الحكومة بفرض ضرائب وجمارك باهظة على مستوردي السيارات تصل أحياناً ل 300% من السعر الأصلي للسيارة لايتحمل منها التجار أي شيء "ونعم الحماية" فيتم معاقبة الشعب كلة لحماية "الصناعة "المحلية ... وفي الوقت الذي تنهار فيه صناعة السيارات في العالم مازال السوق المصري يقف "بكل اقتدار " في مواجهة الأزمة العالمية التي صرح المسؤلين في بلادنا المحروسه بأنها لن ثؤثر على السوق المصري ولا السياحة المصرية ولا الإقتصاد المصري في الفترة المقبلة ولكن قد يكون لها آثار شديدة "جداً" في الفترة المقبلة "برضو" لأن هذه المسائل في علم الغيب واحنا مؤمنين والكلام في الحاجات دي حرام .
انظر لكل المؤسسات الحكومية أو الخاصة أو حتى محلات الكشري والبقالة وأكشاك السجائر .... سوف يطل الفساد برأسه القبيح من كل زاوية .... فساد تم استنساخه من دائرة أعلى حتى وصل للقاع .... فساد قام بخلق بيئة طاردة لأي عنصر اصلاحي وجاذبة لكل عناصر الإفساد بكل أنواعها .... رشوة .... محسوبيات ..... ربا ..... أنانية ..... نزعات فردية متوحشة لا ترحم .... انعدام ضمير .... انعدام الذوق والنظافة واللياقة حتى صارت كلمات لاترد في القاموس .....من أين يأتي الفساد "وكلنا كويسين " ..... لابد أن هناك "ناس وحشين" أقروا الفساد وجبنوا عن مواجهته بكل أشكاله حتى صاروا جزءاً لا يتجزء منه ولو أنكروه بألسنتهم ..... هؤلاء "الناس الوحشين" قد حكم عليهم بالإعدام جوعاً وجهلاً وبطشاً وحسرة وثلوثاً ...... حكم عليهم أن يحيوا بلا كرامة ..... "الناس الوحشين" لا ترى منهم أي شحص ..فكلنا "والحمد لله " زي الفل .... عندما أجلس مع أي شخص تتحول الجلسة إلى محاضرة في الأخلاق الحميدة ... وأيام زمان .... وأيام الخير والعز .... والأحوال السيئة الحالية وكيفية التغلب عليها .... كلنا طبيب يصف الداء والدواء .... أقوم لأبحث عن المرضى وسط الآخرين فلا أجد إلا القليل من المرضى ..... ثم أتسائل هل أنا من الناس "الوحشين" ؟؟؟؟؟
لا تتعجل الإجابة ..... الإجابة صعبة جداً .... أكثر مما تتخيل .

هناك 45 تعليقًا:

إيمان يقول...

اه فعلا السؤال ده حيرنى كتييييييييير

لما كلنا كويسين وطيبين وكلنا بنعرف الداء وبنوصف الدواء بمنتهى المهاره طيب فين الناس الوحشين المجرمين اللى استسهلوا الفساد واستسهلوا أموال الربا واستسهلوا المعصيه أكيد مش أنا ولا أنت ولا هو طيب مين ؟؟!!!!!!

MaNoOoSh يقول...

هي الاجابة هتكون صعبة لما الانسان يكابر وميعترفش بالأخطاء اللي ارتكبها وبيرتكبها

اكيد محدش فينا ملاك.. واذا مكناش وحشين قوي فعلى الأقل بنقوم بدور سلبي لما نستسلم لرشوة او محسوبية أو اهمال او عدم تربية سليمة.

كلنا غلطانين بشكل ما والا مكنش المجتمع بقى كده واخلاق الناس بقت كده.. مهو احنا الناس واحنا اللى عايشين فى المجتمع

بنجاواتى يقول...

السلام عليكم

اولا بحييك على المقال المحترم جدا ده

ثانيا انا واحد من الناس اللى شايف ان سلوكيات الاشخاص فى المجتمع المصرى تتحكم فى اكتر من سبعين فى المية من التردى والسوء اللى وصلناله

وطبعا لما بنكون فى اى قعدة وكله عمال يرمى بلاويه على غيره واقول الكلام ده الاقى الناس مش عاجبهم الكلام وكل واحد شايف ننفسه فلة ومش مقصر فى حاجة

نفسى بس نوصل لمرحلة اننا نعترف اننا غلطانين ومقصرين وبعد كده هيبقى الحل ممكن لكن طول مااحنا بنكابر ونقول احنا اللى واللى يبقى مفيش امل فى حاجة كويسة خالص

تحياتى

شمس النهار يقول...

ازيك
الحقيقه الؤال ده صعب والا لوغرتمات الثانويه العامه

انا طول ماانا ماشيه في بلاد الفرنجه اللي انا فيها دي
عماله اندب
واقول احنا اقل من الناس دي في ايه
تصدق طلع في الاخلاق
اه
والالتزام
والنظافه
ازعل وانقهر علي حالنا
وعشان انا كبيره عنك شويتين تلاته كده
حضرت شوارعنا وهي نظيفه تصدق واسكندريه وهي عروسه فعلا وجمالها رباني
مش نيو لوك عيره
ماتقلبش علي المواجع كفايه اللي انا في
:)

غير معرف يقول...

الاجابه صعبه فعلا .. مش معقول كلنا صح طيب الغلط جه منين ؟!!
بس مش معقول هنقف ونقول احنا صح ولا غلط .. احنا ندور لحل للفساد ده :(

هي فعلا حاجه تحزن اوي

بجد مقالك اكتر من روعه

تسلم ايديك ويسلم قلمك..:)

د. ياسر عمر عبد الفتاح يقول...

تسلم إيدك يا عمنا
والله كلمنتين فيهم الشفا

لما كلنا كويسين وحلوين وطيبين وبنشتكي من هذا الأخر المجهول الذي لم نره بعد
الأخر ده بقي هوه سبب كل مصايبنا المتلتلة ,, لكن احنا والحمد لله مية فل وأربعتاشر


والله وحشتني مقالاتك الجامده دي

ستيتة يقول...

يا موااااااااااااااااااطن
يا شعبي الحبيب الصبور المهاود
إيه يا شعبي؟
اتجننتوا؟
اوعوا تكونوا ها تفكروا وتحرقوا ذرات خلايا مخكم الغالي؟
ايه يا شعبي؟
احترموا الإجرام اللي احنا فيه شوية

انا مقهورة من تخاذلنا كلنا وانا اولكم
اه اه احنا فاسدين مفسدين من الشوريرين الوحشين الساكتين عن الحق
ماشي؟
لك شوق في حاجة؟

مش عارفة ايه الدخلة الجامدة بتاعتي دي وليه بس مقال استفنذني

تحياتي ويا ترى انتم فين "الفوميليا كولتها" سلامي للحكومة لو سمحت

إبن مصر يقول...

السلام عليكم

ازيك يا تامر
اولا انا بهنيك من كل قلبى على المقال الجميل وبرغم انه مليئ ببعض من السخريه ولكنا السخريه اللتى تعطى المقال نكهه مثل الملح فى الطعام

وانا بقرأ المقال تذكرت موقف
انا لا اقبل ان ادفع رشوه لقضاء حوائجى فوجئت بأحد اصدقائى الكبار عنى سنا ومقاما يقول لى بلاش تبقا حنبلى اوى يا محمد بلدنا كلها ماشيه بالرشاوى

شوفت وصلنا لغاية فين الفساد فعلا بقا بالتقليد والإستنساخ

تحياتى لك والى الأمام دائما وبالتوفيق

حفيدة عرابى يقول...

عود احمد


بصراحة انا مش قادرة اجاوب على السؤال
لكن هضيف نقطة صغيرة على استنساخ الفساد
احنا وصلنا لمرحلة ان الاطفال بتقدم رشوة
طالبة عندنا معرفتش ميعاد امتحان مادة فى الدور التانى
جاتلى بمنتهى الثقة
قالت ممكن امتحن تانى وادفع فلوس
انا افتكرت ان البنت عبيطة ومش فاهمة معنى كلامها ايه
لكن طبعا انا اللى طلعت عبيطة
لما البنت لقت مفيش رجا من الكنترول راحت لمدرسة مسئولةعن مجموعات تقوية للدور التانى وعرضت عليها نفس العرض
البنت ماروحتش البيت وماقالتش لاهلها لسه ان ميعاد الامتحان فات
هى قررت ونفذت عرض الرشوة لوحدهاوباصرار
الطالبة دى فى تانية اعدادى
يعنى بالكتير 13 او 14 سنة وعرفت ان دى مش اول مرة الطالبات تقوم بالدور ده
حتى الاهالى مابقوش فاضيين يرشونا


ربنا يرحمنا برحمته ويتجاوز عن سيئاتنا علشان الابتلاء او البلاء بقى كتير اوى

رحلتنا في الحياة يقول...

لو كنا كويسين مكناش وصلنا للحال دا واللى بيدهور كل يوم عن اليوم اللى قبله احنا للاسف بقينا شعب وحش جدا حكومتنا الرشيدة قدرت تخلى من الشعب كبيره وصغيره فاسدين
هى مسئوبية مشتركة ساكتين على الفساد لغاية ما بقى مننا وفينا

غير معرف يقول...

استاذ تامر
تحياتى
طلبك التأنى فى الاجابة هو اللى خلا
الناس تنسب الوحش لنفسها
وفى مواضيع تانية ينسبوا الحلو لانفسهم
الواحد احتار مين الوحش ومين الحلو
ولو الاجابة شخصية فانا انسانة
تجمع بين الاثنين
الموضوع عاوز ترتيب اوراق ووقفة مع
النفس لعل ينصلح الحال
ربنا يبارك فيك

Ahmed يقول...

الفساد أحد عجائب الدنيا السبع عندنا
الحقيقه الفساد عندنا رااااااائع في اداءه ثابت في أهدافه واثق من نتائجه

هوا الحاجه الوحيده اللي نجحت عندنا

المثال اللي انت ضربته, العربيات

بحسب اتفاقية أغادير, العربيات المصنعه في الدول الموقعه على الاتفاقيه, تصدر السيارات لبعضها ومن دون جمارك (300% اياهم)

ومنهم العربيه الرينو

وفوجأنا ان سعر الرينو بعد التعديل أصبح 69000 يعني التخفيض في السعر وهمي
ولما سألنا عرفنا ان مجموعة بائعي السيارات اتفقوا على أن العربيه ديه ميقلش تمنها عن كده عشان الناس متسيبش بقية العربيات وتشتري ديه

والفرق كله في جيب الفساد

أمثله كتيره وأشكال أكتر

mimi يقول...

لنا الله يا تامر

بس الصورة بتاعة البوست هايلة ...ايه الجمال ده

كان زمان المناطق الشعبية بس هيا اللي زبالة

دلوقتي مصر كلها زبالة

وادينا بنتعايش

yoyeta يقول...

اولاً بالنسبة لاكياس القمامة و الزبالين فاحنا عندنا حاجة سبشيل خالص تلاقى عربية الزبالة جت علشان المفروض تشيل الزبالة اللى مليانة حوالين صندوق الزباله (الشبه فارغ) فتقوم مفضية الهوا اللى فى الصندوق و تسيب الزبالة الحواليه و تمشى و اهى عملت اللى عاليهاو زيادة
ثانياً بالنسبة لعدم تاثر مصر بالازمة العالمية فده لان مصر متاثره اصلاً من زمان بى او من غير ازمة اذن فده شىء طبيعى
ثالثاً السؤال..؟؟
فهو السؤال صعب لكن يتجاوب
اذا كنت انت و انا و كل الناس اللى بنتعامل معاهم ميت فل و عشرةو ناس كويسة
يبقى اكيد الناس الوحشين مستخبين و مش عايزين يعدوا مع الكويسين
و كلنا عارفين مين هما الناس الوحشين و هم اللى بدء فسادهم يوصل للناس الكويسين و يحولهم تدريجاً لناس وحشين
واحب اشكرك على البوست الجميل ده

غير معرف يقول...

مش عارفة اقول ايه الصراحة

ربنا يصلح الحال

ليك وحشة

بالتوفيق يارب

.... يقول...

أهم حاجة الحيوانات الضالة ,سمعت إن الفيران بتطلع للناس من قلب الكنيف ..

وأحلى حاجة إنهم بياخدوا تمن الخدمة كذا مرة ...فمع تحصيل الضرايب ..يقولون انها موارد سيادية (يعني تبع السيد الرئيس) وتنفق على الخدمات العامة ..وعند إنشاء كوبري مثلن كخدمة عامة مقدمة من الدولة..يقومون بتحصيل ضريبة عبور ..



أنا جعت ,

المتبهدلون في الأرض

بـِصَمتـِـ أميرة ــــى يقول...

اللهم ان هذا إيبتلاء منك لا قبل لنا به
لا حول ولاقوة الا بالله
نقلت الواقع
سلمت يمناك

تقبل مرورى
(ملكة بحجابى )

تامر علي يقول...

ايمان

أكيد كل واحد فينا متحمل جزء ولو بسيط من مسؤلية اللي بيحصل كل واحد على حسب مواقفه اليومية وسلبيته أو ايجابيته في المواقف
تحياتي دائماً :)

تامر علي يقول...

متفق معك تماماً الاستسلام بشكل أو بآخر للفساد هو نوع من ممارسته وهو ده اللي قصدته في البوست

تحياتي

تامر علي يقول...

بنجاواتي

وعليكم السلام ورحمة الله وبركاته

منور في أول زيارة للمدونة المتواضعة :)

نتمنى دوام التواصل

تحياتي وتقديري

تامر علي يقول...

شمس النهار

ربنا يرجعك بالسلامة لمصر المحروسه :)

لازم نقلب المواجع علشان "متلزقش " في قعر الحله :))

تحياتي

تامر علي يقول...

hager za3bal

متفق مع سيادتك تماماً وهو ده التساؤل اللي لازم كلنا نسأله لنفسنا
من أين يأتي كل هذا الفساد؟

تحياتي وتقديري دائماً

تامر علي يقول...

د. ياسر عمر عبد الفتاح

أولاً لازم اشوفك في اللقاء المرتقب
ثانياً انت نختفي فين الفترة دي بتصيف ؟؟

تحياتي :)

تامر علي يقول...

د/ستيته حسب الله الحمش

داخله جامده لكن تثير كل التساؤلات اللي يحتويها البوست في سطرين
متفق مع سيادتك تماماً :)

تحياتي

تامر علي يقول...

إبن مصر

ازيك يا محمد باشا :)

واحشني .... فعلاً الأمور دي اصبحت عادية جداً حالياً

تحياتي

تامر علي يقول...

لقد خلقنا الله احرارا

أكيد الثقافة العامة اتغيرت والجيل القادم متشرب بالثقافة دي

ربنا يستر :)
دروك مهم جداً على فكرة

تحياتي

تامر علي يقول...

آيوشه

احنا زي الفل :)

أكيد الفساد متوغل فعلاً ...لكن يجب البحث عن الذات الشريرة والفاسدة واستئصالها

تحياتي

تامر علي يقول...

أم مالك

ازي حضرتك
ان شاء الله تكوني في اتم صحة وعافية

أكيد لازم نقف مع نفسنا ونتأنى
ونجاوب بعدها الإجابة ممكن تتغير عن أول وهله

تحياتي

تامر علي يقول...

أحمـــــــــــــد أبو العلا

اولا لازم اشوفك في اللقاء المرتقب :)

ثانياً الكوري كوري برضه سيبك من المغربي :)

ثالثاً منور المدونة والمدونات المجاورة

تامر علي يقول...

mimi

خلينا متعايشين مع الزبالة :)

بس انا مش هاستسلم انا هأجر زبال مخصوص :)

تحياتي

تامر علي يقول...

القطقوطة الصغيرة

منورة في أول زيارة للمدونة المتواضعة :)

نتمنى دوام التواصل

تحياتي وتقديري

تامر علي يقول...

ঔღঔ نـــوارة ঔღঔ

منورة يا فندم

ربنا يصلحنا جميعاً

تحياتي

تامر علي يقول...

demaagh,h t3baan

اعملي معاك سندوتش حلاوة بالقشطه
حتى الكباري بيعملوها تبوظ بعد شهرين


منور

تامر علي يقول...

ملكة بحجابى

منورة يا فندم

ربنا يرفع عنا البلاء

تحياتي :)

المتبهدلون في الأرض يقول...

هو مثلن ..مثلن لو واحد عاوز يآخد إيميل حضرتك .. يعمل ايه ,,

الجواب : ممكن تآخد (أنا)إيميل الواحد ده (حضرتك) عشان تستأذنه عن طريقه ,إنك تآخد إيميله ...

تامر علي يقول...

المتبهـدلـون فـي الأرض
يا فندم انت تشرف وتنور واحنا نتشرف بك دائماً .. ايميلي
tame472
على كل حاجه بقه بس لما تستأذن ابقى استأذن بصوت واطي علشان ممكن اكون نايم ولا حاجه :)
تحياتي

فشكووول يقول...

كما تقول يا صديقى
الفساد بقى عينى عينك
اصل كل حاجه بقت فسدانه

متهيأ لى ان مصر تتحلل سياسيا واجتماعيا ... ربنا يسترها على البلد

تحياتى

المتبهدلون في الأرض يقول...

أ.تامر على باشا , فيه مسابقة كل سنة لإختيار أفضل مدونة عربية (http://arabisk-award.com/about.php

أرجو مشاركتك .. وأمل كبير مني في فوزك بها

التفاصيل على الموقع

فـُتات مشاعِر يقول...

السلام عليكم يا أستاذ تامر

فيه مسابقة عن أحسن مدونة عربية (متخصصة أو شخصية) والجائزة 4000 دولار

المعلومات والاشتراك هنا

http://arabisk-award.com/

فـُتات مشاعِر يقول...

اه معلش نسيت ..المسابقة دي تبع الجزيرة ..قناة الجزيرة..

تامر علي يقول...

أ/فشكول

طبيعي يتوحش الفساد في ظل القيادة "الرشيدة" :)
لكن ده طبعاً مش عذر لينا على الفساد اللي طالنا كمان

تحياتي :)

تامر علي يقول...

المتبهـدلـون فـي الأرض

تم الاشتراك يا باشا علشان خاطرك انت بس ...أنا كنت ناوي أحرم البشرية من اشتراكاتي لكن ما باليد حيلة :)

ألف شكر وتحياتي فوقيهم :)

تامر علي يقول...

بـلاش تـولــديـنـــيي

جزاكم الله خيراً وأكلتم طيراً :)

تم الاشتراك وان شاء الله هفرق ال4000 دولار عليكم لو كسبت (ابقوا قابلوني يعني ) :)

تحياتي وتقديري

Ahmed يقول...

يعني ياراجل ياطيب ينفع اروح لقاء المدونين ومتشرفش بأني اشوفك؟
يرضي مين ده؟

تامر علي يقول...

أحمـــــــــــــد أبو العلا

والله يابوحميد كنت أول من سيحضر لكن في آخر لحظة ظهر مشوار مع الوالد وعرفتش أفك منه:)
ملحوقه ان شاء الله قريب هاجيبك يعني هاجيبك :)