الخميس، فبراير 26، 2009

شهرزاد بعد 2000 سنة من البعاد

كانت شهرزاد قد غادرت البلاد .... بعد أعوام وأعوام من الحكايا والإنشاد ....ووجع القلوب والأكباد ... مع المدعو شهريار ذو الصلف والعناد ..... وبعد أيام من السهر والسهاد .... والأحزان والحداد ..... وبعد أن أتمت من الليالي ألفاً وزاد .... غادرت شهرزاد على غير معاد ..... وحملت على ظهرها من الماء والزاد .... بعد أن أسمعته من السباب أزواجاً وأفراد .... لانشغاله عنها وعن الأولاد .... فبعد أن تغير الزمان عن زمان الأجداد ... وعرف شهريار لعب (الجيمز) ومصاحبة الأوغاد ....وضيع ثروته على السياحة في البلاد .... وانشغل عنها بكل الأضداد والأنداد .... اعلنت شهرزاد التمرد على الظلم والاستبداد .... وقالت له أنا (سايبهالك يا واد) .... وعندما صاح شهريار صيحته الشهيرة على سيافه مسرور ..... لم يجب مسرور على سيده المغرور .... لأنه كان واقفاً في الطابور ....كي يشتري خبراً (من أبو شلن ) بالدور .... ثم ألقى سيفه من عاشر دور .... بعد أن وقف ثلاثة أيام في إشارة مرور .... فقدم استقالته بعد أن وقفت روحه (في الزور) .
هنا علم شهريار .... بأن ملكه قد انهار فقعد ينوح ويقول (يانهار) ..... فقرر شهريار بعد طول الإنتظار ... أن يكون من (الشطار) .... فأخذ شقة (إيجار جديد) في عقار .... يكاد يترنح وأوشك على الإنهيار ... فبدأ في رحلة الكفاح من أجل الأولاد .. وتنازل عن حكم البلاد .... وباع القصر والأملاك ...ليسدد الديانة ويهرب من الهلاك ...
وبعد أن تغير الزمان .... وأصبح الإنسان غير الإنسان .... أحست شهرزاد بالملل ...بعد أن أصبحت بلا عمل ...
وبعد أن توسل إليها شهريار أن تعود ... وأعطاها من المواثيق والعهود ...وبدأوا في رحلة الكفاح .... وقالوا (باي باي ) لأكل التفاح .... وهلت عليهم أيام المرمطة .... وركوب الأوتوبيس والشعبطة .. فسبحان مغير الأحوال .... ومبدل النعمة بالإذلال ..... واليكم بعض ما كان ..... في هذا العصر والأوان


كان شهريار ...يواصل الليل بالنهار .... ويعمل في إصرار من أجل ثمن كيلو (خيار) .... ونصحه بعض المعارف بمعلومة .... أن يحاول أن يجد فرصة في الحكومة ..... لأن الميري مهما كان مضمون .... وشغله (مش متعب) والحركة فيه أقل من السكون ..... ونصحه الأستاذ (عوني) .... أن يقدم في السجل المدني .... لأنهم طالبين موظفين .... وعلى طول (هايكونوا متعينين) ..... فأخذ شهريار الأوراق .... وتوجه فوراً إلى (بولاق) ... وقدم الأوراق المطلوبة .... في تلك (الشغلانة) المطلوبة ...... ففوجىء بجموع غفيرة ..... من الشباب والشابات ذوات (الضفيرة) ..... وتقاتل الجموع على تقديم المستندات ... فسحب نفسه من (سكات) ..... وخرج بعد صراع مع الزحام ..... يجرجر الجراح والآلام .... ورجع منزله بغير كلام ..... وألقى بنفسه على السرير .... وأخذ يفكر بخاطر كسير ..... فيما حدث له من (بهدله ) ..... وما أصابه من (دهوله ) ..... وهنا دخلت شهرزاد ..... وسألته عما حدث فأفاد .... وأخذ يكرر ما حدث لها وأعاد .... وطلب منها بعد استئذان .... أن تحكي له (زي زمان ) ..... فقالت بعد سرحان وتوهان .....


بلغني أيها الرجل ذو الحال المتدني .... (اللي جاي من السجل المدني) .... أنه كان من زمان ... في بلاد الفرنجة والأمريكان ..... رجل يدعى (سوبرمان).... يحل كل المشاكل والمعضلات .... ويعمل عمل الجواسيس والمخابرات .... وله من التفكير والعضلات .... ما يجعل حياة الناس (بلح أمهات) .... يحل كل المشكلات ..... ويحلل المدخلات والمخرجات ... ويجعل الحياة في بلاده بلا (مطبات)
- انتبه شهريار في الحال .... وجلس على السرير وقال .... أريد أن أكون مثل هذا (المان) ... واخترق حواجز الزمان والمكان ... وأهرب من حياة (البق والأكلان) .... وأجلس بلا عمل كسالف الأزمان .... أتزوج من النساء الحسان .... وأشرب الحليب والدخان .
- صفعته شهرزاد على وجهه في الحال .... وقالت له يا شر (البغال) .... انظر إلى حالك البطال .... أيها النذل (العويل) .... وذكرته بالكلب (أبو ذيل ) .... وقالت له مفيش حكايات (النهارده) .... ونم وضع على وجهك (مخده) لأني لا أريد رؤية وجهك (العكر) الشرير ..... (وخلي ليلتك تعدي على خير ) ....
- هنا أدرك شهريار (السباب) ..... وعلم أن (ليلته هاتكون هباب) .... فنام وغطى وجهه بالمخدات ..... وأخدت شهرزاد (الملايات) .... ونامت في فرفة الأولاد والبنات .... وعندما صحى شهريار من نومه مذعور .... وصاح فينك يا مسرور .... ردت شهرزاد بصوت فيه انتعاش ... (اتمسى ياللي ماتتسماش ) ... وعندها لم يصح الديك .... فنام وقال يا فكيك

هناك 41 تعليقًا:

الازهرى يقول...

نحجز اول تعليق

تامر علي يقول...

احجز براحتك .... بكره أجازة وبعده أجازه واحنا مع بعض والزمن طويل :)

mahasen saber يقول...

ههههههههههههه عجبنى قوى تمسيت شهرزاد على شهريار

يحمد ربنا ان مكنش تحت السرير اكياس وسكاكين

بس هيا الحياه كده يتقبل شهريار شهروزته بما عليها ولها
وتتقبل شهروزه شهريار بما فيه من البدع حلوها ومرها

بس لو تقدر ولو بدعه يمكن التعايش معاها

تامر علي يقول...

mahasen saber

أصل هو يستاهل (الدبح برضو:)

غالباً البدع بتكون واضحه نوعاً ما لكن الإنسان بيمني نفسه إنه قادر على تغيير الآخر ...وبعدين تظهر بدع جديدة وقد يحدث الإنفجار :)
شكراً لمرورك

Ahmed يقول...

ههههههههههه
حلوه أوييييييييييييي

آدي اخر كل شهريار ميدبحش القطه لشهرزاد

ستيتة يقول...

فعلا انت اكتر من رااااااااائع

لما اقرأ كلماتك اشعر براحة نفسية وكسفة من كلماتي مستخبية

لي ملاحظة
هاذوة الشهرزاد بعينه تنام في غرفة الأولاد
هي ها تخرجه ع الكنبة حتى الممات

وعيشته ها تكون فول ومفيش طبيخ
وكل يوم بالحلل ترقعه طاخ طيخ

ولو عرف يجد وظيفة ويتريس
كان في بيته مقعدش متيس

وبالنسبة للأنجنير بتاع دبح القطة
لو دبحتها يامعلم ده انت تبقى لقطة

ونعينك شهريار بحق وحقيق
وتأكلنا عيش نضيف الدقيق

لكن ها تيجي تدبح القطة
ها تقف العروسة عند هذه النقطة

وها تدخلك العروسة شتيمة وأباحة
حتى تشعر بالآمان والراحة

لأن شهرزاد هذا العصر توحشت
لما لشهريار عدل استوحشت

ودمتم

فشكووول يقول...

ازيك يا تامر على
انا حاجه وفركشاوى حاجه .. هو مدون والله غيرى تمام .. لكن هو بدايته كان بيدور على اسم وبعدين عجبه فشكول فبحث عن اسم مشابه لفشكول وعمله فركشاوى .. ارجع بقى اقرأ البوست بتاعك واعلق عليه
تحياتى

فشكووول يقول...

تصدق بالله يا تامر .. انا قاعد ميت على روحى من الضحك .. على شهريار واللى حصل له فى طوابير لما اتقدم بمستندات للوظيفه ولا مسرور اللى رمى السيف عشان رغيب عيش ولا شهرزاد اما قلبت على شهريار بعد ما كان شهريار شهريار هذا عن القصه
اما عن مدلولها فانت صورت الواقع بكل بؤسه ومرارته واقعنا المهين والمذل والراجل بتاع الدولار اللى بيذل بلاد وتيجان وقاعد يغير الادوار ويبدل الناس ويضر بالاوطان
احييك على هذا البوست الرائع والذى جاء من الشرق الى الغرب بواقع قومى مرير
تحياتى يا تامر

غير معرف يقول...

أسلوب الحكي جميل
لكن صورة شهرزاد و شهريار بعيدة
تماما عن الصورة الأصلية
لم تعد شهرزاد المرأة الذكية،المبدعة،الرقيقة
لم يعد شهرزاد الرجل العاشق،الحالم،الذي تعلم
الصبر مع شهرزاد!
أكيد أن تغيير الصورة الأصلية كان مقصودا
للضرورة الدرامية للنص؟!!:)

الازهرى يقول...

ياااااااااه

انت جبت حاجات كتيييييييير قوى
تعرف انت فكرتنى بقصة كان كاتبها واحد من اصحابى عن عنترة فى القرن العشرين
تعرف ايه كان الشرط المعجز
انه يقدر يجيب ب 100 جنيه عيش للفرح

تحياتى دوما

تامر علي يقول...

Eng. Ahmed Abo El-Ella

هو حاول يدبح القطه .. القطه شرحته وخلته مايسواش بصلة :)

بس هايحاول تاني أكيد أنت عارف ... لاتراجع ولا استسلام :)

تامر علي يقول...

أ.د/ ستيته حسب الله الحمش

فعلاً طول ما شهريار معوج الطباع .... شهرزاد هاتكون في شراسة الضباع :)

وطول ما شهريار ديله زي الكلاب ... شهرزاد وراه بالقبقاب :)

تامر علي يقول...

عمنا fashkool :)

أخبارك إيه .... أحلى حاجه فيك إنك منوفي .... أنا أعز أصدقائي من المنوفية بس نسخة محسنه :)

الواقع أليم وفين أيام زمان لما كان جوز الحمام 3 فرد ... الله يرحم زمان :)

تامر علي يقول...

Rose

أكيد تغير الصورة كان مقصود سامحيني على بعض الإغراق في المحلية ولكن أعتقد أن معظم الهموم الإنسانية مشتركه .
أسعدني مرورك ... دمت بخير

تامر علي يقول...

الازهرى

100 جنيه عيش !!!! باقولك الراجل قدم استقالته ورمى سيفه من الدور العاشر من الركنه في الطابور تقوللي 100 جنيه عيش مره واحده ... ده لو معاه 100 جنيه كان استورد عروسه من بره :)

إيمان يقول...

أنا قلت أؤجل التعليق
لما أقرأ بتمعنن أصل ريما اللئيمه بنتى
كانت عامله هليله.. ومبوظالى الليله
يا سلام على شهريار اللقطه
إللى بياخد على قفاه
ومراته مشرشحاه
أكيد من خيبته
طب يجى يشوف سى السيد إللى عندنا فى البيت لأ وايه وهو أيده نضيفه
من غير لا صوت عالى ولا حركات نص كم
كله بالسياسه يا معنم
هيييه دنيا
المشكله إن الواحده مدبحتش القطه من الأول
على العموم...كويس إن شهرزاد مندهتش لشهريار العبيط ده الواد مسرور
رااااائعه وتحفه .. بجد كاتب متميز
مش زى أى حد
ما شاء الله عليك
تحياتى وتقديرى

تامر علي يقول...

إيمان

كل واحد شخص فينا جزء من شهريار أو شهرزاد ...هي معادلة صعبة لكن مش مستحيلة .... تحياتي لك و تمنياتي بأن تصبح ريما شخصية لها قيمه :)

المتبهدلون في الأرض يقول...

العسلية مليانة رمل ..

أه دا انا على الهوا ::


السلام عليكم يا حضظابط ,,إبداع إبداع

ما يمكن مرض (اليكترا) جه لشهريار ,, ومبقاش شهر واحد ,بقة موسم وعصر وحياة ,,حرم الناس منها لمجرد إنه مريض بأوهامه ,,وأول الناس دول هما مراته خيرزاد

تامر علي يقول...

عزيزي العسلية مليانة رمل .. قصدي المتبهدلون في الأرض

اغسل العسلية وكلها وماترميهاش زي بعض المتأمرين المتفرنجين الأوغاد الإشتراكييين
شهريار أصيب بعقدة (أوديب) يعني عضة ديب واللي يتعض من الديب مالهوش حبيب :)

Lady E يقول...

اسلوبك جميل ومميز كالعادة

بس بصراحة شهريار الجديد يستاهل وشهرزاد تستاهل برضه :)

تامر علي يقول...

Lady E

ما هم لو كانوا خلوهم في عصرهم كنا خلصنا .... بس هم جاين ورانا في عصرنا كمان .... يبقوا يستاهلوا اللي يحصلهم :)

سكوت هنصوت يقول...

من فضلك زر هذا الرابط...لن تندم

http://www.tahyyes.org/2009/02/blog-post_27.html

فتــافيت (رحاب الخضري) يقول...

هو ده حال كل مغرور حقير.. فاكر ان الدنيا ستات تخاف من مسرور اللعين

وقال فاكر انها له دايمة.. اهو بقى من زوات البجامات الدايبة

كان فاكرها تفاح وخمر وستات.. اهو بقى محتاس في الشغل والبيت والموصلات

خلي يكون عبرة لكل راجل بيعتبر.. اقبل ما يفكر يفتكره ويتعظ

اهي شهرذاد خدت بتارها وذلته.. يارب كل جبار يتذل ذلته

بوست راااااااائع بجد

جنااااااااااااااااان

تامر علي يقول...

سكوت هنصوت

أنا وقعت أول ما البوست نزل وعلقت عليه ... شكراً على التنويه .

تامر علي يقول...

فتافيت

فعلاً هو أخرته وحشه بس لسه شهرزاد ما سكتتش على كده دول ليهم صولات وجولات تانيه .

المهم إيه أخبار عمليات الشرقية الإرهابية المغربية البحته ؟

تامر علي يقول...

فتافيت

فعلاً هو أخرته وحشه بس لسه شهرزاد ما سكتتش على كده دول ليهم صولات وجولات تانيه .

المهم إيه أخبار عمليات الشرقية الإرهابية المغربية البحته ؟

gogo!sf يقول...

بجد تعبير حلو اوى

هو دة حال الدنيا

بس انت طلعت شهرذات معندهاش اصل
هو اه مسرور يرمى سيفة ويجرى وراى رغيف العيش واى حد يبيعة
بس ماتوصلش لشهرذاد
دى مهما كان ام العيال يعنى لازم تكسر مناخيرة اللى طالعة فى السما عشان يفوق

على العموم احنا كدة وهنفضل كدة مهما الديك صاح
ولو الدنيا كلها ادنيت هنفضل نايمين

بجد اسلوب رائع

تقبل مرورى

فتــافيت (رحاب الخضري) يقول...

والنبي ولا اعرف حاجة
الظاهر فتفوتة اتقبض عليها .. يلا خدت الشر وراحت

البلد مرشقة كماين ولجان .. وروتب حاجة لووووووز

مستنية باقي البوستات بتاعة شهرزاد اصلي فرحانة في شهريار جدا

تامر علي يقول...

gogo!sf

مفيش حد في الواقع كله ايجابيات أو سلبيات على طول ...حسب الموقف يعني بنتفاعل مع الأحداث :)

شكراً على مرورك الكريم

تامر علي يقول...

فتافيت

خلاص لازم نطالب بالإفراج الفوري عنها حالاً وبدون شروط ونتظاهر "اننا مش من هنا" :)

الحقيقة المصرية يقول...

بشرى ساره جدا لجميع المدونين المتضامنين مع الحقيقه المصريه في كفاحها ضد شركه او مصنع تراست للكيماويات مصنع الموت ببورسعيد اليوم الاثنين طلب احاطه علجل بمجلس الشعب مقدم من عضو مجلس الشعب الدكتور اكرم الشاعر ضد الشركه وسنحضر هذه الجلسه ان شاء الله وسنعرض تفصيلها لاحقا بمشيئه الله على مدونتنا الحقيقه المصريه تحياتي تامر مبروك لكل شريف ومحترم وقف معنا في هذه القضيه سواء كان بمصر او خارجها وهذه هي اولى الخطوات للتصدي لهذه الشركه التي تريد تدمير بورسعيد الباسله على حساب مكاسبها وارباحها التي تقدر بالمليارات لزيارتنا نرجو زياره مدونه الحقيقه المصريه
http://elhakika.blogspot.com/

الحقيقة المصرية يقول...

بشرى ساره جدا لجميع المدونين المتضامنين مع الحقيقه المصريه في كفاحها ضد شركه او مصنع تراست للكيماويات مصنع الموت ببورسعيد اليوم الاثنين 2 مارس 2009
طلب احاطه علجل بمجلس الشعب مقدم من عضو مجلس الشعب الدكتور اكرم الشاعر ضد الشركه وسنحضر هذه الجلسه ان شاء الله وسنعرض تفصيلها لاحقا بمشيئه الله على مدونتنا الحقيقه المصريه تحياتي تامر مبروك لكل شريف ومحترم وقف معنا في هذه القضيه سواء كان بمصر او خارجها وهذه هي اولى الخطوات للتصدي لهذه الشركه التي تريد تدمير بورسعيد الباسله على حساب مكاسبها وارباحها التي تقدر بالمليارات لزيارتنا نرجو زياره مدونه الحقيقه المصريه
http://elhakika.blogspot.com/

تامر علي يقول...

الحقيقه المصريه

خطوة جيدة بس على الله الدكتور سرور ما يطرمخش عليها :)

ونرجو موافاتنا بأخبار القضايا أول بأول
تحياتي

dr.lecter يقول...

ياعيني عليك ياشهريار بقيت مسخه بعد ماولت مجدك واوجك

الفاتحه علي ايامه الحلوه ياخواننا وعلي ايام سي السيد العظييم

تامر علي يقول...

dr.lecter
شهريار خلاص ملكه انهار في العصر الحديث وحالياً بيبيع نوجه :)

شكراً لمرورك

GiGi world يقول...

لا مش ممكن بجد
كمان شهريار مش لاقى يجيب كيلو خيار
حتى شهريار
ياعينى عليكى يابلد

حواء يقول...

استاذ تامر
موني اخبارها ايه
وقفلت المدونه ليه
ياريت بعد اذنك تطمنا

تامر علي يقول...

GiGi
ياريتها جت على الخيار ... إحنا معدش لينا أي خيار تاني :(

شكراً لمرورك الكريم

تامر علي يقول...

حواء
مفيش حاجه وحشه الحمد لله ... بس كان في أشخاص غير مهذبين بيرسلوا رسايل غير لائقة .

شكراً لسؤالك :)

تامر علي يقول...

د.توكل مسعود

جزاك الله خيراً على التنويه ... وطبعاً كله إلا اللغة العربية لأنها وعاء القرآن وخطاب الرحمن ... دمت بخير وشكراً على مرورك الكريم

MaNoOoSh يقول...

تصدق بردو شهريار المفترى كان ليه هيبة ويتحب كدة
ههههههههههههههههه
بس جامدة وجميلة جدا وياريت يكونلها تكملة ومواقف اكتر بين شهر وشهر